Proverbios 2
2
Mọꞌ rụijsis dyijyedyeꞌ där ñútyisinꞌ mọꞌ
1Ạvaꞌ, seꞌvibut raꞌ mi ọij p̂eyacdyeꞌ yụ,
jiꞌsiteꞌ ram ĉojtyiꞌĉan.
2Seꞌveꞌ ram rụijsis dyijyedyeꞌ,
judyeyaꞌ yụꞌtyevaꞌ ferdyeꞌ mi paj qui chiqueꞌ mi jedyeꞌ buty mọꞌ cạiꞌ dyijyedyeꞌ.
3Fer raꞌ cọdaqui mi paj qui soꞌmac mi anicsis chị́dyeꞌ judyeyaꞌ rụijsis dyijyedyeꞌ chimeꞌ,
yódyesdyemꞌ mọjoꞌchas jemoñeꞌsiꞌ um.
4Yojdyemꞌ muntyiꞌ coꞌshaij plataveij u in,
jacĉansiꞌ yaꞌiꞌsiꞌ jedyeꞌ in,
meꞌ buꞌyi raꞌ queveꞌ mi mọꞌ rụijsis dyijyedyeꞌ Jenꞌsiꞌ muꞌ.
5Meꞌ jụijyaꞌ mi,
irijyi raꞌ Ayoꞌchem judyeyaꞌ raꞌ jämꞌ chị́yete mi muꞌ Jenꞌ.
6Muꞌ Ayoꞌ soꞌmisinꞌtyiꞌ rụijsis dyijyedyeꞌ,
judyeyaꞌ muꞌ jísinꞌ anicsis chị́dyeꞌ paj qui meꞌ chiquejaꞌ jedyeꞌ chuc cạiꞌ dyijyedyeꞌ in.
7Muꞌ nọ́tacsi muꞌin rụijtyity in,
judyeyaꞌ ñutschucsi rụij bäꞌyity in.
8Muꞌ ñutschucsi muꞌin rụij bäꞌyity in,
meꞌ buꞌyi ĉọjcacsi muꞌin chiquetety in.
9Ạvaꞌ, seꞌveꞌ jụijyam ọij p̂eyacdyeꞌ meꞌ raꞌ chat chị́yem jụꞌñis chuc mọꞌ rụijsis dyijyedyeꞌ paj qui meꞌ rụij bäꞌyi úcheꞌ jaccheꞌ mi.
10Chat qui raꞌ ĉojtyiꞌĉan sitiꞌ mọꞌ rụijsis dyijyedyeꞌ Jenꞌsiꞌ muꞌ,
mọꞌ qui raꞌ maꞌjodyeꞌ soꞌmin.
11Rụij dyijyi jụijyam,
mọꞌ raꞌ ñutschun mi tsäquiꞌyisyaꞌ jedyeꞌ.
12Meꞌ raꞌ mọꞌ rụijsis dyijyedyeꞌ ñútyin mi paj qui jam cäc̣häꞌchucsebi mi aꞌc̣his dyijyedyeꞌ muꞌin väväjñitysiꞌ in.
13Muꞌin meꞌtyity in yacchuiꞌ in mọꞌ rụijsis majmi,
tojmadyeꞌĉan qui bäꞌyi in.
14Juchaj mọmoꞌ jämꞌ ĉọiꞌ in,
mọꞌ ac̣hiꞌtacsis, mọꞌ mọmoꞌ maꞌjotyeꞌ in.
15Mọꞌ mọmoꞌ jịjcaiꞌ in jeñej dochdochsis majmi,
meꞌ buꞌyiꞌ aꞌc̣his dyijyedyeꞌ muꞌin.
Tyi chuc rụij dyijyity in muꞌin jam voꞌvoij in
16Mọꞌ rụijsis dyijyedyeꞌ mọꞌ ñutschusinꞌ meꞌtaquisyaꞌ p̂en.
Meꞌ raꞌ tsanꞌ mọꞌ fayin jämꞌsiꞌyaꞌ p̂eyacdyeꞌ mọꞌ jiꞌmaꞌyacdyesyaꞌ,
rụij qui namꞌ dyijyi jụijyam, jam tupuj täjtyeꞌ mi.
17Vatyquej mọꞌ yacchuquis vämtyiꞌ jụijyaꞌ,
mọꞌ jäctety jiquej nanasdyemꞌ mọꞌ.
Vämiyaꞌ jiquej yụꞌtyeꞌ tsanꞌ ĉụiꞌsiꞌ p̂eyacdyeꞌ mọꞌ,
q̂uinꞌ aty vaꞌcajquiquiꞌ p̂eyacdyeꞌ mọꞌ.
Aty jam chicaĉanꞌ mọꞌ p̂eyacdyeꞌ yụꞌtyes jiquej Jenꞌsiꞌyaꞌ vej muꞌ.
Jam raꞌ täjtyeꞌ mi mọꞌ meꞌsis.
18Tyi chuc cänäꞌñety in sänꞌdyeꞌ raꞌ vaꞌtacdyeꞌ muꞌinsiꞌ in.
19Tyi chuc tapjety in,
muꞌin raꞌ jam caꞌñibun in, där raꞌ ñịbeꞌ cạveꞌ in.
20Rụij dyijyi jụijyam chat qui raꞌ mọꞌ rụijsis majmi jịjcaiꞌ mi,
meꞌ raꞌ chat rụij bäꞌyi mi.
21Muꞌin na rụij bäꞌyity in jam jụꞌñity in, yejĉoij raꞌ maꞌjodyeꞌtum bäꞌyi in.
Jam raꞌ vaꞌcac in ĉụiꞌsiꞌyaty bäꞌyedyeꞌ in.
22Muꞌin na ac̣hiꞌyity in vaꞌcac raꞌ muꞌin in,
mọꞌ raꞌ jịꞌĉojtyeꞌ in räj muꞌin juchajtumtyiꞌ in judyeyaꞌ väväjñity.
Currently Selected:
Proverbios 2: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
