Josué 22
22
Caꞌñibun acaꞌyaꞌ in muꞌin ñuruꞌtyity shupquive tsun bäꞌyity in
1Josué fayacsi muꞌin Rubéntyiꞌ vóshiꞌ in judyeyaꞌ muꞌ Gadtyiꞌ vóshiꞌ in judyeyaꞌ muꞌin choc ñuruꞌtyity Manaséstyiꞌ vóshiꞌ. 2Muꞌ jéyacsi:
—Miꞌin aty jịꞌcätsetiñeꞌ mọꞌ yụꞌtacdyeꞌ soꞌminacsiꞌ jiquej muꞌ Moisésyaꞌ, Ayoꞌtyiꞌ úñity muꞌ. Chimeꞌ miꞌin aty chäquibutiĉaꞌ räj yụ́siꞌ yụꞌtacdyeꞌ miꞌindyes. 3Aty daiꞌ mạyedyeꞌ in, meꞌdye q̂uinꞌ, jam damꞌ yacchuqui chätidyeꞌ miꞌin. Miꞌin qui namꞌ jịꞌcätseptinte mọꞌ yụꞌtacdyeꞌ soꞌminacsiꞌ Jenꞌ Ayoꞌ miꞌin. 4Q̂uinꞌ muꞌ Jenꞌ Ayoꞌ miꞌin aty soꞌmacsi jịꞌjutyitidyes chätidyedyes miꞌin yoj yidyemꞌ jiquej u. Caꞌñibudac ĉụiꞌsiꞌyaꞌ acaꞌ miꞌin nopej Jordán, mọꞌ jac soꞌminacsiꞌ miꞌin Moisésyaꞌ, Ayoꞌtyiꞌ úñity muꞌ. 5Ĉujcatac miꞌin, ferdyeꞌ yụꞌtacac paj qui jịꞌcätsacsi mọꞌin dyijyedyeꞌ in judyeyaꞌ yụꞌtacdyeꞌ in soꞌminacsiꞌ muꞌ Moisésyaꞌ, Ayoꞌtyiꞌ úñity muꞌ. Mọꞌin yiꞌsiꞌ in paj qui: mạꞌjetinte muꞌ Jenꞌ Ayoꞌ miꞌin, miꞌevac muꞌsiꞌĉan majmi, jịꞌcätsebitinte raꞌ muꞌsiꞌ yụꞌtacdyeꞌ muꞌ, tapchutinte miꞌin judyeyaꞌ muꞌdyes carijtaqui miꞌin räjtum ĉojtyiꞌ judyeyaꞌ tsạꞌsiꞌ miꞌin. 6Chat qui muꞌ Josué yụꞌtyeyacsi jämꞌsiꞌ p̂eyacdyeꞌ judyeyaꞌ jịꞌjobacseban. Chat qui muꞌin caꞌñibun ĉụiꞌsiꞌyaꞌ acaꞌ in.
7Muꞌinyaꞌ muꞌ choc ñuruꞌtyity Manaséstyiꞌ vóshiꞌ in muꞌ Moisés soꞌmacsi jac Basánĉan. Muꞌinyaꞌ yoctyiꞌ choc ñuruꞌtyity Manaséstyiꞌ vóshiꞌ in muꞌ Josué soꞌmacsi jac jịjcaijcheꞌ tsun Jordánve muꞌinyaꞌ chätidyeꞌyaꞌ muꞌin. Yoquiꞌdyemꞌ jịꞌjobacsebanyaꞌ muꞌ Josué u muꞌ yụꞌtyeyacsi jämꞌsiꞌ p̂eyacdyeꞌ. 8Muꞌ jéyacsi:
—Caꞌñibudac miꞌin ĉụiꞌsiꞌyaꞌ acaꞌ miꞌin mọꞌintum daiꞌ yaꞌiꞌsiꞌ jedyeꞌ miꞌin; daiꞌ cuꞌdyeꞌ miꞌin, oro, plata, bronce, fiyero judyeyaꞌ daiꞌ quịꞌsiꞌ miꞌin. Chat qui raꞌ miꞌin jiꞌchetetiñeꞌ chätidyeꞌtum miꞌin mọꞌ bijodyeꞌ jectyetacsis miꞌin, muꞌinyaꞌ chutyetacsis miꞌin —jéyacsi Josué.
9Chat qui muꞌin Rubéntyiꞌ vóshiꞌ in judyeyaꞌ muꞌin Gadtyiꞌ vóshiꞌ in judyeyaꞌ muꞌin choc ñuruꞌtyity Manaséstyiꞌ vóshiꞌ in yacchucsi muꞌin Israeltyiꞌ vóshiꞌ in. Muꞌin shupĉan Siloyaꞌ, mọꞌ Canaánĉansiꞌ bäꞌyedyeꞌ, chat qui ĉụiꞌsiꞌĉan jac Galaad jịjcaij in, mọꞌ jac yụꞌtyeyacsis muꞌ Ayoꞌ Moisésyaꞌ jiquej.
10Venjoijyaꞌ in Gelilotyaꞌ (yiris bäꞌyedyeꞌ Canaánĉansiꞌĉan jac c̣hẹiꞌyaꞌ muꞌ Jordán) chat qui muꞌin Rubéntyiꞌ vóshiꞌ in judyeyaꞌ muꞌin Gadtyiꞌ vóshiꞌ in judyeyaꞌ muꞌin choc ñuruꞌtyity Manaséstyiꞌ vóshiꞌ in jämꞌtyeꞌ in c̣hẹiꞌyaꞌ muꞌ Jordán yiris chäbäj jiꞌcoꞌshayaquis.
11Muꞌin Israeltyiꞌ vóshiꞌ in seꞌveꞌ in junꞌ chuc muꞌin jämꞌtyeꞌ mọꞌ jiꞌcoꞌshayaquis Israelĉansiꞌ jac, Gelilotyaꞌ c̣hẹiꞌyaꞌ muꞌ Jordán. 12Chat qui räj muꞌin Israeltyiꞌ vóshiꞌ in yiriꞌyaꞌyi in Siloyaꞌ paj qui chucsi in. 13Meꞌdyes qui muꞌin Israeltyiꞌ vóshiꞌ in jutete in muꞌ Finees, ạvaꞌ Eleazartyiꞌ muꞌ cudyitity Jenꞌcheꞌ, Galaadyaꞌ muꞌinyaꞌ in Rubéntyiꞌyaꞌ vóshiꞌ in judyeyaꞌ Gadtyiꞌyaꞌ vóshiꞌ in judyeyaꞌ muꞌin choc ñuruꞌtyity Manaséstyiꞌyaꞌ vóshiꞌ in. 14Muꞌtum jutacsi in yiriꞌtac tashcheꞌ buꞌyity in. Cäts ñuruꞌtyity Israeltyiꞌ vóshiꞌ in jutete in yirity joꞌnoꞌ buꞌyity muꞌinĉantyiꞌ ñuruꞌtyity in.
15Chat qui muꞌin Galaadyaꞌ jịjcaij in, muꞌinyaꞌ in Rubéntyiꞌyaꞌ vóshiꞌ in judyeyaꞌ Gadtyiꞌyaꞌ vóshiꞌ in judyeyaꞌ muꞌin choc ñuruꞌtyity Manaséstyiꞌyaꞌ vóshiꞌ in, judyeyaꞌ jéyacsi muꞌin ayoꞌ buꞌyity in:
16—Meꞌ yi räj muꞌin Ayodyes vajmuꞌyaijtyiꞌ in. ¿Junꞌ buty meꞌ miꞌin yacchutiñeꞌ anicyedyeꞌ muꞌcheꞌ Ayoꞌ Israeltyiꞌcheꞌ in? ¿Junꞌ buty murujrutyetinte muꞌ Ayoꞌ judyeyaꞌ jämꞌtiñeꞌ yiris jiꞌcoꞌshayaquis vaꞌquectinteyaꞌ Ayoꞌ q̂uinꞌ miꞌin? 17¿Miquis buty ĉọ́tiñeꞌ miꞌin mọꞌ juchaj Peorĉan jiquej? Meꞌdye q̂uinꞌ mạyedyeꞌ yejĉoiꞌ mọꞌ vaꞌtacdyeꞌ tsuncheꞌ ọijdyes juchaj, paj tsanꞌ jiquej yiris tsäquiꞌsis japacjodyeꞌ tŝọcsiꞌ muꞌin Ayoꞌtyiꞌ muntyiꞌ in. 18¿Miꞌin buty q̂uinꞌ yacchutinte muꞌ Ayoꞌ? Meꞌ jụijyaꞌ q̂uinꞌ murujrutyebajtinte muꞌ Ayoꞌ miꞌin, nojno raꞌ muꞌ fạ́cacsi räj muꞌin Israeltyiꞌ vóshiꞌ in.
19Ọctumsiꞌ ĉọ́tiñeꞌ jụijyaꞌ jac miꞌin, nopvac Ayosyaꞌ jac yóyaꞌdyemꞌ Jenꞌsiꞌ acaꞌ tinatesyaꞌ, judyeyaꞌ tsuntum raꞌ bäꞌyi miꞌin. Jam raꞌ yacchutinte muꞌ Ayoꞌ miꞌin mijam raꞌ yacchutiĉamꞌ tsun jämꞌtaquiyaꞌ yiris jiꞌcoꞌshayaquis ĉụiꞌdyes, jam mọꞌ Jenꞌdyes Ayoꞌ tsun. 20Jiquej yoquiꞌdyemꞌ muꞌ Acán, Zeratyiꞌ vóshiꞌ, juchaij u muꞌ jam jịꞌcätsepte Ayoꞌsiꞌ yụꞌtacdyeꞌ muꞌ p̂eyeꞌsiꞌ mọꞌin jedyeꞌ pạrej yụꞌtacsiꞌ Jenꞌdyes in, ¿jam adac Ayoꞌsiꞌ vaꞌtacdyeꞌ räjcheꞌ tŝọiꞌ muꞌin Israeltyiꞌyaꞌ vóshiꞌ in? Jam muꞌ Acán yirity mọmoꞌ säñi juchadyes muꞌ —yi muꞌin ayoꞌ buꞌyity jiꞌdyijvacseban in muꞌin chibinĉantyiꞌ ñuruꞌtyity in.
21Chat qui muꞌin Rubéntyiꞌ vóshiꞌ in judyeyaꞌ Gadtyiꞌ vóshiꞌ in judyeyaꞌ muꞌin choc ñuruꞌtyity Manaséstyiꞌ vóshiꞌ in vorjeyacsi muꞌin ayoꞌ buꞌyity in:
22—Muꞌ Mujuꞌchaꞌ Ferdyeꞌtumtyiꞌ, muꞌ Jenꞌ, muꞌ Ayoꞌ, muꞌ Mujuꞌchaꞌ Ferdyeꞌtumtyiꞌ, muꞌ Jenꞌ, muꞌ Ayoꞌ muꞌ nash chịj. Meꞌ jụijyaꞌ tsun aty murujrutyebajsha Ayoꞌ jam raꞌ muꞌ jiꞌc̣honsinꞌ tsun. 23Meꞌ jụijyaꞌ tsun aty jämꞌtyeꞌ mọꞌ jiꞌcoꞌshayaquis paj qui murujrutyete tsun muꞌ Ayoꞌ, paj qui mọꞌcheꞌ yụꞌtyeꞌ tsun p̂udaij jiꞌtyeꞌsiꞌ jiꞌcoꞌshayacdyeꞌ in, jam jụijyaꞌ tucdyeꞌ harina, jam jụijyaꞌ jämꞌjitidyes tucdyeꞌ, meꞌ jụijyaꞌ dyijyedyeꞌ tsun paj muꞌdye Ayoꞌ vaꞌtacdyeꞌ soꞌmin tsun.
24Jam meꞌ dyijyedyeꞌ tsun. Tsun mọꞌ jämꞌtyeꞌ ĉaĉaij na cajotyiti tsun dyijyi tsun vatyquej yirisĉan mạyedyeꞌ miꞌintyiꞌ vóshiꞌ in jéyacsi tsuntyiꞌ vóshiꞌ in, "¿Junꞌ buty meꞌ ĉútiĉamꞌ tupuj timaꞌquetinte muꞌ Ayoꞌ Israeltyiꞌ vóshiꞌ in? 25Muꞌ Ayoꞌ aty yụꞌte muꞌ Jordán feiꞌtacdyes dyeteꞌĉan miꞌin judyeyaꞌ tsun, miꞌin Rubéntyiꞌ vóshiꞌ in judyeyaꞌ Gadtyiꞌ vóshiꞌ in. Muꞌ Ayoꞌ jam miꞌintyiꞌ, tsuntyiꞌ mọmoꞌ muꞌ Ayoꞌ." Vatyquej raꞌ meꞌ jéyacsi vóshiꞌ miꞌin chat qui miꞌintyiꞌ vóshiꞌ raꞌ yi in paj qui tsuntyiꞌ vóshiꞌ in farajjeꞌ ạ̈räjyedyeꞌ Ayoꞌcheꞌ in.
26Meꞌdyes qui dyijyi tsun, "Jämꞌtaĉaꞌ raꞌ tsun yiris jiꞌcoꞌshayaquis, jam qui namꞌ mọꞌindyes in p̂udaij jiꞌtyeꞌsiꞌ jiꞌcoꞌshayacdyes mijam tucdyes." 27Yocve buꞌyiꞌ tsunsiꞌ dyijyedyeꞌ. Dyijyi tsun paj qui mọꞌ raꞌ shupquiꞌ yiris jịꞌĉocdyes miꞌindyes, tsundyes, räjdyes vóshiꞌ miꞌintyiꞌ in judyeyaꞌ tsuntyiꞌ in. Mọꞌ jịꞌĉoiꞌ junꞌ chuc tsun raꞌ timaꞌqueja muꞌ Ayoꞌ judyeyaꞌ muꞌsiꞌyaꞌ acaꞌ tsun raꞌ soꞌmete jiꞌcoꞌshayacdyeꞌ in, tucdyeꞌ in judyeyaꞌ jämꞌjitidyes in. Chat qui yirisĉan mạyedyeꞌ miꞌintyiꞌ vóshiꞌ in jam raꞌ tupuj jéyacsi tsuntyiꞌ vóshiꞌ in, "Jam Ayoꞌtyiꞌ muntyiꞌ miꞌin", vatyquej raꞌ jéyacsi in, meꞌ ĉúti tsun.
28Yi tsun, meꞌ jụijyaꞌ muꞌin p̂iijsinꞌ ọijtum p̂eyacdyeꞌ jam jụijyaꞌ vóshiꞌyaꞌ tsun, muꞌin tupuj raꞌ jéyacsi in: "Cạvevac mọꞌ jiꞌcoꞌshayaquis jämꞌtac muꞌinyaꞌ jenꞌyaꞌ tsun. Ọij jiꞌcoꞌshayaquis jeñej buꞌyiꞌ Ayoꞌsiꞌ jiꞌcoꞌshayaquis paj tsanꞌ meꞌ jam jiꞌcoꞌshayacdyedyes mọꞌ. Ọij jịꞌĉocdyes mọmoꞌ, yiris jịꞌchicacdyes miꞌindyes judyeyaꞌ tsundyes", tupuj meꞌ jéyacsi miꞌin. 29Jam raꞌ junꞌ tsun yacchute muꞌ Ayoꞌ, mijam raꞌ murujrutyete tsun jämꞌtacyaꞌ ĉụiꞌsiꞌ jiꞌcoꞌshayaquis yụꞌtac jiꞌcoꞌshayacdyes in, tucdyes in judyeyaꞌ jämꞌjitidyes in. Jam meꞌ dyijyedyeꞌ tsun. Yiris mọmoꞌ mọꞌyaꞌ jiꞌcoꞌshayaquis meꞌdyes yụꞌtac, mọꞌ jiꞌcoꞌshayaquis muꞌsimꞌ Jenꞌ Ayoꞌ tsun, mọꞌ yụꞌtac tashcheꞌ buꞌyiꞌ Jenꞌsiꞌyaꞌ acaꞌ muꞌ —muꞌin jéyacsi muꞌin ayoꞌ buꞌyity in.
30Chat qui Finees muꞌ cudyitity Jenꞌcheꞌ judyeyaꞌ muꞌin muꞌtumtyiꞌ tashcheꞌ buꞌyity in, muꞌindye joꞌnoꞌ buꞌyity in muꞌinĉan ñuruꞌtyity Israeltyiꞌ vóshiꞌ in, muꞌin maꞌjotacsebi p̂eyacdyeꞌ seꞌvacsebis muꞌinyaꞌ in Rubéntyiꞌyaꞌ vóshiꞌ in, Gadtyiꞌyaꞌ vóshiꞌ in judyeyaꞌ Manaséstyiꞌyaꞌ vóshiꞌ in. 31Muꞌ Finees, ạvaꞌ Eleazartyiꞌ muꞌ cudyitity Jenꞌcheꞌ, jéyacsi muꞌin Rubéntyiꞌ vóshiꞌ in, Gadtyiꞌ vóshiꞌ in judyeyaꞌ Manaséstyiꞌ vóshiꞌ in:
—Q̂uinꞌ mạyedyeꞌ chịj tsun junꞌ chuc muꞌ Ayoꞌ tsuntum ĉaĉaij na ọijtum dyijyedyeꞌ miꞌin jam yacchutinte muꞌ Ayoꞌ. Miꞌin aty jiꞌc̣honac Israeltyiꞌ vóshiꞌ vaꞌtacdyeꞌyaꞌ Ayosĉan un muꞌ.
32Chat qui muꞌ Finees, ạvaꞌ Eleazartyiꞌ muꞌ cudyitity Jenꞌcheꞌ, judyeyaꞌ muꞌin tashcheꞌ buꞌyity in caꞌñibun Canaánĉan in judyeyaꞌ jéyacseban muꞌin Israeltyiꞌ vóshiꞌ in jätäjyi chuc muꞌin Rubéntyiꞌ vóshiꞌ in, Gadtyiꞌ vóshiꞌ in judyeyaꞌ Manaséstyiꞌ vóshiꞌ in. 33Maꞌjoij qui muꞌin Israeltyiꞌ vóshiꞌ in judyeyaꞌ timaꞌquete Jenꞌ in. Aty jam p̂eyeꞌ in chutidyes muꞌindyes in Rubéntyiꞌ vóshiꞌ in judyeyaꞌ Gadtyiꞌ vóshiꞌ in paj qui jịꞌmotsacsebi bäꞌyedyeꞌ in.
34Muꞌin na Rubéntyiꞌ vóshiꞌ in judyeyaꞌ Gadtyiꞌ vóshiꞌ in jịꞌtiꞌeꞌ muꞌinsiꞌ jiꞌcoꞌshayaquis "Yiris jịꞌchicacdyes tsundyes junꞌ chuc muꞌ Ayoꞌ anictyity Jenꞌ", meꞌ buꞌyiꞌ jịꞌtiꞌeꞌ in.
Currently Selected:
Josué 22: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
