Josué 23
23
Josuésiꞌ jadyiquis p̂eyacdyeꞌ muꞌindyes ayoꞌ buꞌyity in
1Jiyiꞌ tupudyeꞌ aty ishoꞌ muꞌ Josué. Daiꞌ yómodyeꞌ tyitiꞌ muꞌ judyeyaꞌ chimeꞌ muꞌ Ayoꞌ aty jịꞌjutyitidyeꞌ soꞌmacsi muꞌin Israeltyiꞌ vóshiꞌ in muꞌinyaꞌ chucsityyaꞌ in. 2Muꞌ Josué fayacsi muꞌin Israeltyiꞌ vóshiꞌ in: muꞌin joꞌnoꞌ buꞌyity in, muꞌin tashcheꞌ buꞌyity in, muꞌin jịꞌcäts yụꞌtacsity in judyeyaꞌ muꞌin ayoꞌ buꞌyity in. Chat qui Josué jéyacsi:
—Aty ishoꞌ yụ judyeyaꞌ daiꞌ yómodyeꞌ tyitiꞌ yụ. 3Miꞌin cạvetiñeꞌ räj jämꞌtaquis muꞌ Ayoꞌ miꞌindyes jiquej. Muꞌ Jenꞌ Ayoꞌ miꞌin chucsi yoctyiꞌ muntyiꞌ in miꞌindyes. 4Dyijtubadac miꞌin junꞌ chuc yụ jiꞌcheteꞌ mọꞌ jac ĉụiꞌdyes miꞌin. Mọꞌ jac yoquiꞌdyemꞌ tacaꞌ muꞌyaꞌ yoctyiꞌ muntyiꞌ bäꞌyi u in, judyeyaꞌ mọꞌ jac jiꞌpenacsiꞌ yụ jiquej. Mọꞌ jac dyeteꞌĉan muꞌ Jordán judyeyaꞌ mọꞌ Mar Mediterraneo#23:4 Mar Grande jịjcaijcheꞌ tsun. 5Muꞌ Jenꞌ Ayoꞌ miꞌin ĉụiꞌ raꞌ jiꞌshupcacsi muꞌin junaꞌ chuc jịjcaij miꞌin, chat qui miꞌin raꞌ ĉụiꞌdyestucsebi jac muꞌin yoj yidyemꞌ muꞌ Jenꞌ Ayoꞌ miꞌin jínac jiquej u.
6Fer buꞌvac miꞌin, ĉujcatac. Dyijyedyeꞌtum raꞌ chäquibutiĉaꞌ miꞌin mọꞌ yụꞌtacdyeꞌ soꞌminacsiꞌ Moisésyaꞌ jiquej. Jeñej yirity chụiꞌ jịjcaijtyiꞌ meꞌ raꞌ miꞌin chiquetiñeꞌ. Jam raꞌ tacve jịjcaij miꞌin, mijam raꞌ q̂uimve jịjcaij miꞌin. 7Jam raꞌ penꞌdyetucsi miꞌin muꞌin yoctyiꞌ muntyiꞌ in miꞌinsiꞌĉantyiꞌ jac bäꞌyity in. Jam raꞌ p̂eyacsebi tịj miꞌintyiꞌ jenꞌ buꞌyity in, mijam raꞌ tsäquiꞌyis p̂eyacdyeꞌ jiꞌjäctiñeꞌ muꞌinyaꞌ in. Jam raꞌ úñiꞌ miꞌin muꞌintyidyes jenꞌ buꞌyity in, mijam raꞌ dyụtsyi muꞌyaꞌ miꞌin. 8Miꞌin qui na ramꞌ tapchutinte muꞌ Jenꞌ Ayoꞌ miꞌin yojdyemꞌ meꞌjetiñeꞌ miꞌin jiquej junꞌ quiꞌ chuc q̂uinꞌ.
9Muꞌ Ayoꞌ aty jiꞌpenacsi miꞌindyes därsiꞌ bäꞌyedyeꞌ in judyeyaꞌ jiꞌshupcacsi ferdyeꞌtumtyiꞌ muntyiꞌ in. Meꞌdye q̂uinꞌ itŝij tyi tupuj sóñiꞌyi in runꞌquenꞌyi in chunac miꞌin. 10Yirity miꞌinĉantyiꞌ raꞌ jinchacacsi mir muꞌin ĉaĉaij na muꞌ Ayoꞌ chuti raꞌ miꞌindyes yojdyemꞌ muꞌ jínac jiquej u. 11Meꞌdyes qui anic jämꞌ ĉujcatac miꞌin paj qui yejĉoij anicjetinte muꞌ Jenꞌ Ayoꞌ miꞌin.
12Yocve dyijyi jụijyaꞌ miꞌin, chat qui penꞌdyetucseban muꞌin yoctyiꞌ muntyiꞌ taĉantyiꞌ in miꞌinsiꞌĉantyiꞌ jac bäꞌyity in, judyeyaꞌ miꞌin jụijyaꞌ vämi muꞌincheꞌ in judyeyaꞌ yiriꞌyaꞌ bäꞌyi muꞌintum in, 13chat qui tupuj chịj miꞌin junꞌ chuc muꞌ Jenꞌ Ayoꞌ miꞌin jam raꞌ junꞌ jiꞌshupcacsi muꞌin junaꞌ chuc jịjcaijyaꞌ miꞌin. Dadamꞌ raꞌ muꞌin shupqui jeñej buꞌyi jibej judyeyaꞌ quepyis miꞌindyes, siꞌbacdyeꞌ murujruches miꞌin judyeyaꞌ yutij vejĉan miꞌin. Meꞌ raꞌ jiyiꞌ junꞌ quiꞌ chuc jịꞌmotsac miꞌin ọijĉan jämꞌsiꞌĉan jac soꞌminacsiꞌ Jenꞌ Ayoꞌ miꞌin.
14Aty c̣hẹiꞌyaꞌ tupudyeꞌ yụ́dyes paj qui säñi yụ yojdyemꞌ jiyiꞌ räj jacchety tsạꞌsiꞌtumtyiꞌ u in. Chịj miꞌin räjtum ĉojtyiꞌ miꞌin judyeyaꞌ räjtum tsạꞌsiꞌ miꞌin junꞌ chuc jam jayej jịꞌcätsac yiris jämꞌsiꞌ p̂eyacdyeꞌ soꞌminacsiꞌ muꞌ Jenꞌ Ayoꞌ miꞌin. Räj muꞌsiꞌ p̂eyacdyeꞌ jịꞌcätsac in. Mijam yiris p̂eyacdyeꞌ muꞌsimꞌ jayej jịꞌcätseꞌ mọꞌ. 15Paj tsanꞌ meꞌ yojdyemꞌ muꞌ Jenꞌ Ayoꞌ miꞌin jịꞌcätsaqui räj muꞌsiꞌ jämꞌsiꞌ p̂eyacdyeꞌ miꞌindyes jiquej u, vaj cäts raꞌ muꞌ Ayoꞌ jịꞌcätsaqui mọꞌ aꞌc̣his p̂eyacdyeꞌ vaꞌtacdyes muꞌ, meꞌ vaꞌquectinte jụijyaꞌ miꞌin. Muꞌ raꞌ yejĉoij vaꞌtacdyeꞌ soꞌminac miꞌin junꞌ quiꞌ chuc jịꞌmotsnac miꞌin ọijĉan jämꞌsiꞌĉan jac soꞌminacsiꞌ Ayoꞌ miꞌin. 16Muꞌ Jenꞌ Ayoꞌ miꞌin aty yuꞌtyiyinac p̂eyacdyeꞌ muꞌ. Jam jịꞌcätseptinte jụijyaꞌ muꞌsiꞌ yụꞌtacdyeꞌ miꞌin judyeyaꞌ yocve qui jịjcaij miꞌin judyeyaꞌ úñi yoctyidyes jenꞌ buꞌyity in judyeyaꞌ dyụtsyi muꞌinyaꞌ in, meꞌ jụijyaꞌ miꞌin, muꞌ Ayoꞌ raꞌ jiꞌcaviyinac fạ́codyeꞌ muꞌ judyeyaꞌ miꞌin raꞌ jịꞌmotsac ọijĉan jämꞌsiꞌĉan jac soꞌminacsiꞌ Ayoꞌ miꞌin.
Currently Selected:
Josué 23: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
