Génesis 40

José jịꞌchiqueyacsi taminꞌdyeꞌ muꞌin

1Aty men muꞌĉan ĉärꞌtaquisĉan muꞌ José, chat qui muꞌ Faraón, Egiptoĉantyiꞌ ayoꞌ, fạ́quete muꞌ tashchety chuquety tyédyeꞌ in judyeyaꞌ muꞌ tashchety jämꞌtety pan in, 2pärenꞌdye fạ́cacsi muꞌ ayoꞌ. 3Mọꞌdyes qui muꞌ tacjeyacsi ĉärꞌtaquisĉan, yóĉandyemꞌ bäꞌyi u muꞌ tashchety ĉọjcatety ayoꞌ in. Muꞌĉan ĉäꞌrac in muꞌin ac̣hiꞌtety ayoꞌ in, muꞌĉan muꞌ José chimeꞌdye. 4Muꞌ tashchety ĉọjcatety ayoꞌ in soꞌmete José paj qui muꞌ ĉọjcacsi muꞌin päräꞌ nọ́taquity in. Men muꞌĉan bäꞌyi in.

5Yirisĉan mạyedyeꞌ muꞌ tashchety chuquety tyédyeꞌ in judyeyaꞌ muꞌ tashchety jämꞌtety pan in, pärenꞌdye muꞌin tamiñi in, jam qui namꞌ cäts tamiñi in. 6Aty nojno mạyedyeꞌ muꞌ José cạvacsequi där yoqui dạcacsequi. 7Jéyacsi José:

—¿Junꞌ meꞌ där yoquevaꞌjoij u miꞌin?

8Vorjete muꞌin in:

—Tsun nash inoj tamiñi, jam qui namꞌ tyi jin tsun junꞌ buty cạiꞌ mọꞌ taminꞌdyeꞌ tsun.

Vorjeyacsi José:

—Jenꞌ nash yirity tupuj mumꞌ jiꞌchäquiyisinꞌ taminꞌdyeꞌ tsun. Jeshaꞌ, jítiĉamꞌ junꞌ chuc taminꞌdyeꞌ miꞌin.

9Muꞌ chuquety tyédyeꞌ jéte José junꞌ chuc tamiñi muꞌ, yi muꞌ jéte:

—Taminꞌdyeꞌĉan cạveꞌ yụ yiris cätidyeꞌ ova, 10chibin toꞌ caꞌ dacaꞌ mọꞌ cạvebiꞌ yụ. Coꞌñeyebanꞌ toꞌ caꞌ vatyquej cạveꞌ yụ, judyeyaꞌ toꞌ caꞌ jámiꞌ, judyeyaꞌ väshiꞌ, judyeyaꞌ intsiiꞌ. 11Unĉan meꞌchupte yụ Faraónsiꞌ tyéquis muꞌ, mọꞌĉan cubeꞌ yụ mọꞌ sacacdyeꞌ. Yụ́dye tyuꞌ caꞌ chuquebajte Faraón mọꞌ cubes yụ tyéquisĉan mọꞌ fiꞌ ovas mọꞌ —yi muꞌ jéte José.

12José jéte:

—Meꞌ cạiꞌ mọꞌ taminꞌdyeꞌ mi, mọꞌ chibin dacaꞌ cạveꞌsiꞌ mi, mọꞌin chibin mạyedyeꞌ cạiꞌ in. 13Chibin raꞌ mạyedyeꞌ muꞌ Faraón jiꞌshupjun raꞌ mi, cuvij raꞌ yuꞌtyiyibun carijtacdyeꞌ, yojdyemꞌ jiquej um, cuvij raꞌ chuquebajtem. 14A raꞌ meꞌ jụijyaꞌ mi dyijtubunꞌ ram, meꞌ raꞌ ñịbeꞌjitim, jéte ram Faraón paj qui muꞌ jiꞌshupjun yụ úĉantyiꞌ yụ. 15Yụ nash hebreosĉan jac bäꞌyi jiquej, tash caꞌ jiꞌmincan yụ in úĉan jijtuyin yụ in. Itŝiꞌ méquis juchaj yụ ọ́yaꞌ, uts na jibiꞌyaꞌ ĉärꞌtyin yụ in —yi José jéte muꞌ muntyiꞌ.

16Muꞌ na jämꞌtety pan seꞌvepte Josés p̂eyacdyeꞌ muꞌ junꞌ chuc p̂eijbite taminꞌdyeꞌ muꞌ chuqueꞌtyiꞌ tyédyeꞌ, anic jämꞌsiꞌ cạiꞌ mọꞌ p̂eyacdyeꞌ meꞌ seꞌveꞌ. Chat muꞌ qui jéte José chimeꞌ:

—Meꞌ tyuꞌ caꞌ yụ chimeꞌ tamiñi. Chibin tyuꞌ caꞌ pantumtyiꞌ ụ́buꞌ joꞌnoꞌcheꞌ yụ tamiñi yụ. 17Muꞌ fajchety ụ́buꞌ yụ yịjyi tyuꞌ caꞌ muꞌĉan Faraóndyety pan. Ayij toꞌ caꞌ jaijtyiꞌ in, jebete pan in muꞌ joꞌnoꞌchety yụ ụ́buꞌĉantyiꞌ yụ —yi muꞌ jämꞌtety pan.

18Vorjete José:

—Meꞌ cạiꞌ mọꞌ taminꞌdyeꞌ mi: muꞌin chibin ụ́buꞌ in mọꞌ cạiꞌ chibin mạyedyeꞌ in. 19Meꞌ nash raꞌ chibin mạyedyeꞌ muꞌ Faraón jiꞌtätsibun raꞌ joꞌnoꞌ mi judyeyaꞌ raꞌ soncheꞌ titsoꞌ buꞌyiꞌ yuꞌbun aꞌ mi, chat qui raꞌ jaijtyiꞌ ayij in mọꞌin raꞌ jibibun shush in —yi José jéte.

20Aty chibin mạyedyeꞌ chaꞌshepte in naꞌedyeꞌ Faraónsimꞌ, mọꞌdyes qui muꞌ jämꞌtyeyeyacsi därsiꞌ feshta räj fayacsi nọ́taquity muꞌ. Muꞌinsiꞌyaꞌ vej muꞌin, muꞌ yụꞌtyeꞌ p̂eyacdyeꞌ, jiꞌvorvete muꞌ chuquety tyédyeꞌ judyeyaꞌ jämꞌtety pan muꞌin ĉärꞌtactyiꞌ in. 21Ayoꞌ quivij jayuꞌbun muꞌ chuquety tyédyeꞌ, quivij qui chuquebajtety muꞌ ayoꞌ. 22Muꞌ na jämꞌtety pan, muꞌ ayoꞌ jaꞌijati, soncheꞌ titsoꞌ buꞌyiꞌ aꞌ jayuꞌbuti. Meꞌdye muꞌin pärenꞌ shupqui in yóyidyemꞌ muꞌ José jéyacsi jiquej u junꞌ chuc taminꞌdyeꞌ muꞌin. 23Meꞌ tsanꞌ jéte jiquej muꞌ José, muꞌ chuquety tyédyeꞌ yaquintubanꞌ mọmoꞌ p̂eyacdyeꞌ, mijam dyijtubajte José.

Currently Selected:

Génesis 40: CAS

Highlight

Copy