Génesis 39

José jiꞌmincac Potifaryaꞌ

1José Egiptoĉan cạte in. Muꞌĉan muꞌin Ismaeltyiꞌ vóshiꞌ muꞌ jiꞌmincate Potifaryaꞌ in, muꞌ nọ́taquity Egiptoĉantyiꞌ ayoꞌ. Chimeꞌ muꞌ Potifar tashchety ĉọjcatety ayoꞌ in. 2Muꞌĉan muꞌ José Jenꞌ jañutyiti, anic jämꞌ buꞌyi muꞌtum shupqui. Potifarsiꞌĉan acaꞌ bäꞌyi muꞌ ayoꞌsiꞌ acaꞌ muꞌ. 3Chimeꞌdye ayoꞌ muꞌ chịj Jenꞌdye jañutyiti, meꞌdyes qui meꞌ jämꞌ shupqui José, 4mọꞌdyes qui ayoꞌ muꞌ anic jamaꞌjotyiti muꞌ jayuꞌti paj qui ĉọjcapte acaꞌ muꞌ räj judyeyaꞌ räj jedyeꞌ muꞌ. 5Aty meꞌ jayuꞌti muꞌ José, muꞌ qui Jenꞌ tiyacchuiꞌ yi paj qui räj jämꞌ shupquiꞌ muꞌyaꞌ Potifartyiꞌyaꞌ, judyeyaꞌ räj jedyeꞌ chimeꞌ muꞌ, acaꞌĉansimꞌ judyeyaꞌ jorojyas chimeꞌ muꞌ, Josédyes jañutyiti. 6Mọꞌdyes muꞌ Potifar aty jam jedyeꞌ dyijtuiꞌ, säcsedyemꞌ quimꞌ dyijtuiꞌ ĉaĉaij na aty José räj ĉọjcapte jedyeꞌ muꞌ.

José ĉärꞌtac

José anic jämꞌtyiꞌ muntyiꞌ ạꞌnity. 7A na men mọꞌ Potifarsiꞌ p̂en muꞌ fer mạꞌjete muꞌ José. Yirisĉan mạyedyeꞌ jajiti:

—Yụ raꞌ jạjĉoshye.

8Jam muꞌ jụjtyeꞌ José, jeꞌ mọmoꞌ muꞌ:

—Jam junꞌ, muꞌ ayoꞌ yụ yuꞌtyin yụ paj qui räj muꞌsiꞌ ĉọjcapte yụ acaꞌĉansiꞌ jedyeꞌ muꞌ, muꞌ aty jam jedyeꞌ dyijtuiꞌ. 9Yụ mujuꞌchaꞌ yụꞌtac acaꞌĉan muꞌ, mijam yiris jedyeꞌ quijatutyin yụ, meꞌdye mi mọmoꞌ quijatun ĉaĉaij na mi anicsis p̂en muꞌ. Jam mạꞌjeꞌ ac̣hiꞌtiij joꞌmesyaꞌ shapudyeꞌ, mijam mạꞌjeꞌ juchaj soꞌmete Jenꞌ yụ —yi José jeꞌ.

10Räjĉan mạyedyeꞌ jameꞌti cọdyevaꞌte mạꞌjeꞌ jạjĉoshte, jam qui namꞌ jụjtyeꞌ mijam mạꞌjeꞌ penꞌdyetuiꞌ. 11Yirisĉan mạyedyeꞌ José siti acaꞌĉan muꞌĉan carijtaqui. Itŝij yirity muꞌĉan úñity in, yirisdyety p̂en mọꞌĉan mọꞌ. 12Meꞌĉandye tap tŝọiꞌ quịꞌsiꞌchemꞌ jajämꞌchubuti tsanꞌ:

—Yụ raꞌ jạjĉoshye —jajiti.

Chat qui muꞌ c̣honjeyactaqui quịꞌsiꞌ muꞌ, muyaꞌ tŝọij ĉaꞌjoij, 13quịꞌsiꞌdyety unĉan meꞌchupte, 14chat qui äjyiꞌ fayacsebanꞌ úñity in, jéyacsiꞌ:

—Uts hebreo, úñity vämtyity yụ, jam méquiꞌ jämꞌjisinꞌ. Muꞌ sätin yụ mạꞌjeꞌ meꞌtyin yụ, chat yụ qui fer äjyiꞌ. 15Aty äjyiꞌ yụ, chat muyaꞌ tŝọ́ban farajjeyactaqui quịꞌsiꞌ muꞌ —yiꞌ jéyacsi.

16Mọꞌdye jämꞌjajibuti quịꞌsiꞌ muꞌ, ĉụiꞌdye atsijban vämtyiꞌ mọꞌ, ayoꞌ Joséty. 17Aty shupqueshan muꞌ mọꞌdye p̂eyacdyeꞌ jéyaĉanꞌ vämtyiꞌ mọꞌ:

—Muꞌ úñity hebreo tutety mi, muꞌ sätin yụ mạꞌjeꞌ meꞌtyin yụ. 18Yụ qui fer äjyi, meꞌdyes farajjeyactaqui quịꞌsiꞌ muꞌ muyaꞌ tŝọ́ban.

19Muꞌ ayoꞌ seꞌvebiꞌ p̂ensiꞌ p̂eyacdyeꞌ muꞌ junꞌ chuc muꞌ mạꞌjeꞌ meꞌtyeꞌ muꞌ José úñity muꞌ, jämꞌ fạ́coij tyeij. 20Ayoꞌ tacjajiti ĉärꞌtaquisĉan, yóĉandyemꞌ ĉäꞌrac u in muꞌin ac̣hiꞌtety jacchety ayoꞌ in. 21Meꞌ tsanꞌ muꞌ muꞌĉan, Ayoꞌ qui namꞌ räjĉan japenꞌdyetuti, muꞌ yi paj qui muꞌ ĉọjcacsity ĉärꞌtactyiꞌ in jamaꞌjotyiti muꞌ José. 22Muꞌ ĉọjcacsity jayuꞌti José, muꞌ räj ĉọjcacsi muꞌĉantyiꞌ in, muꞌsiꞌ qui p̂eyacdyeꞌ seꞌvepte in. 23Muꞌ ĉọjcacsity aty jam dyijtupte Josés ĉọjcacdyeꞌ muꞌ, ĉaĉaij na muꞌ Ayoꞌ räjĉan japenꞌdyetuti judyeyaꞌ jañutyiti paj qui räj jämꞌ shupquiꞌ carijtacdyeꞌ muꞌ Josés.

Currently Selected:

Génesis 39: CAS

Highlight

Copy