Génesis 41

Faraónsiꞌ taminꞌdyeꞌ muꞌ päräꞌyis

1Aty päräꞌ yómodyeꞌ jiyiꞌ muꞌ qui Faraón tamiñi. Tamiñi muꞌ rụiꞌcujcuij caꞌ sinve cojiro Nilo. 2Ĉụiꞌdye caꞌ shupquiꞌ ojñiꞌĉan jijtuiꞌ vaca in, yävätidyeꞌ vodoꞌ in, anic mabemunsiꞌ in, yedyej cumrereiꞌtacñis vaca in, a chuc tajñiꞌĉan jịjcaiꞌ säcsiꞌ in. 3Ĉụiꞌdye cạvacsi yocsiꞌ vaca chịmoꞌĉandye shupquiꞌ in, chiyävätidyeꞌdye vodoꞌ in, yedyemunsiꞌ quenej in mạraꞌmunsiꞌ in. Mọꞌin ĉọcsequiꞌ in mabemunsiꞌ vaca in. 4Taccheꞌ tŝọiꞌ in mọꞌin mạraꞌmunsiꞌ in, jebacsiꞌ mọꞌin mabemunsiꞌ in.

Muꞌyaꞌ tsạꞌeti tsanꞌ muꞌ Faraón. 5Cuvij ĉọshan muꞌ, cuvij tamiñi, trivo qui tamintute. Yävätidyeꞌ suyuꞌ cạvete yirischeꞌ pech, moc̣haꞌmuntyiꞌ yedyej chutaꞌmuntyiꞌ trivo in. 6Jäquiꞌve cạvete yoctyiꞌ suyuꞌ chiyävätidyeꞌdye yirischeꞌ pech, jam jäjämuntyiꞌ in anic shajtataij in, tyiꞌmu tyuꞌ caꞌ meꞌjajiti. 7Muꞌin shajtaty suyuꞌ in jebacsi chutaꞌmuntyiꞌ in, meꞌ ca cạveꞌ taminꞌdyeꞌĉan muꞌ Faraón.

Quivij muꞌ Faraón tsạꞌi aty chịj muꞌ dyijtuqui taminꞌdyeꞌ muꞌ. 8Nojno mạyedyeꞌ anic fer dyijtuiꞌ mọꞌ taminꞌdyeꞌ. Fayacsi tsanꞌ räj Egiptoĉantyiꞌ chịjtyiꞌ muntyiꞌ in judyeyaꞌ cọcojsiꞌ in. Jéyacsi taminꞌdyeꞌ muꞌ mijam jụꞌñity jéte tupuj jedyeꞌ chuc mọꞌ cạiꞌ. 9Meꞌĉandye muꞌ chuquety tyédyeꞌ dyijtubanꞌ p̂eyacdyeꞌ Josés, yi jéte Faraón:

—Q̂uinꞌdyemꞌ chäyiti yụ junꞌ chuc juchaj yụ jiquej, jam jịꞌcätseꞌ p̂eyacdyeꞌ yụ, 10yoquiꞌdyemꞌ fáquitiꞌyam judyeyaꞌ muꞌ jämꞌtety pan chimeꞌ. Mi tacjitiĉaꞌ tsun miꞌin ĉärꞌtaquisĉan yóĉandyemꞌ bäꞌyi muꞌ tashchety ĉujcantyiꞌ in. 11Muꞌĉan tsun tamiñi tsun, yụ judyeyaꞌ muꞌ jämꞌtety pan jiquej, jam vaj cäts tamiñi tsun. 12Muꞌĉan chimeꞌ yirity nanaty hebreo úñity muꞌ tashchetytyiꞌ ĉọjcatety ayoꞌ muꞌin. Tsun jéte jedyeꞌ buty tamiñi tsun, muꞌ qui jin tsun jedyeꞌ chuc cạiꞌ mọꞌ taminꞌdyeꞌ tsunsiꞌ. 13Anicdye cạ̈tsiꞌ p̂eyacdyeꞌ muꞌ, quivij yuꞌtyiyibunꞌ mi carijtacdyeꞌ yụ, muꞌ na jämꞌtety pan jiꞌijatem yóyidyemꞌ muꞌ nanaty u jin tsun, cätsdye meꞌ shupquiꞌ räj —yi muꞌ chuquety tyédyeꞌ jéte.

14Mọꞌdyes qui muꞌ Faraón jiꞌvorvete muꞌ José ĉärꞌtaquisĉantyiꞌ. Shupquedyeꞌĉan mọmoꞌ jiꞌtätsiti chum fin muꞌ judyeyaꞌ yoctyiꞌĉan qui cäbun quịꞌsiꞌ, chat qui q̂uinꞌdyemꞌ jiꞌcaviti Faraónyaꞌ. 15Faraón jajiti José:

—Yụ nash tamiñi mijam qui namꞌ tyi jin yụ jedyeꞌ chuc mọꞌ cạiꞌ taminꞌdyeꞌ yụ. Yụ nash seꞌvaqui mi ca chịj jedyeꞌ buty cạiꞌ mọꞌ taminꞌdyeꞌ in.

16Vorjete José:

—Jam nash ĉụiꞌsiꞌyaꞌ chị́dyeꞌ yụ tupuj meꞌ yụ, Jenꞌ nash chịj, muꞌ raꞌ jin mi, ayoꞌ, jedyeꞌ chuc mọꞌ cạiꞌ, mọꞌ mạꞌjes mi mọꞌ taminꞌdyeꞌ mi.

17Faraón jéte José:

—Meꞌ tyuꞌ caꞌ tamiñi yụ, rụiꞌcujcuij tyuꞌ caꞌ yụ sinve cojiro Nilo. 18Ĉụiꞌdye toꞌ caꞌ shupquiꞌ ojñiꞌĉan jijtuiꞌ vaca in yävätidyeꞌ vodoꞌ in, anic mabemunsiꞌ in yedyej cumrereiꞌtacñis vaca in, a chuc toꞌ caꞌ tajñiꞌĉan jịjcaiꞌ säcsi in. 19Chịmoꞌdye cạvacsi yụ yocsiꞌ vaca in chịmoꞌĉandye shupquiꞌ in chiyävätidyeꞌdye vodoꞌ in, yedyemunsiꞌ quenej in mạraꞌmunsiꞌ in, jam jämꞌdyeyaꞌ joꞌmes cạveꞌ yụ Egiptoĉan. 20Chat mọꞌin mạraꞌmunsiꞌ in taccheꞌ toꞌ caꞌ tŝọiꞌ in mọꞌincheꞌ in mabemunsiꞌcheꞌ in jebacsiꞌ in. 21Meꞌ tsanꞌ ñäpjitiꞌ in jam qui namꞌ junꞌ mọꞌin mabiꞌ in, joꞌmeiꞌ mọmoꞌ in yódyeiꞌdyemꞌ jiquej o in. Chat tsạꞌi yụ.

22Quivij tamiñi yụ yävätidyeꞌ tyuꞌ caꞌ suyuꞌ trivo yirischeꞌ pech anic moc̣haꞌmuntyiꞌ in chimeꞌ anic chutaꞌmuntyiꞌ. 23Jäquiꞌve cạvete yụ yoctyiꞌ suyuꞌ chiyävätidyeꞌdye, anic shajtataij in, jam jäjämuntyiꞌ in, tyiꞌmu tyuꞌ caꞌ meꞌjajiti in. 24Chat qui cạvacsi yụ muꞌin shajtaty suyuꞌ in jebacsi muꞌin in chutaꞌmuntyiꞌ in. Jéyacsi tsanꞌ yụ uts chịjtyiꞌ muntyiꞌ in, mijam yirity jin yụ jedyeꞌ chuc cạiꞌ taminꞌdyeꞌ yụ —yi Faraón jéte José.

José jéte jedyeꞌ buty cạiꞌ taminꞌdyeꞌ muꞌ

25José vorjete Faraón:

—Vaj meꞌdyemꞌ cạiꞌ taminꞌdyeꞌ mi, ayoꞌ, ĉaĉaij na Jenꞌ jäꞌmiij jiꞌĉuyin junꞌ chuc raꞌ jämꞌtaqui muꞌ. 26Mọꞌin yävätidyeꞌ mabemunsiꞌ vaca in, mọꞌ cạiꞌ yävätidyeꞌ yómodyeꞌ in jämꞌsiꞌ. Meꞌdye cạiꞌ muꞌin yävätidyeꞌ chutaty suyuꞌ trivo in, yiris shupquiꞌ mọꞌ päräꞌ taminꞌdyeꞌ mi. 27Chimeꞌdye mọꞌin yävätidyeꞌyis yedyemunsiꞌ quenej vaca in mạraꞌmunsiꞌ in, mọꞌ cạiꞌ chiyävätidyeꞌdye yómodyeꞌ. Meꞌdye mọmoꞌ cạiꞌ yävätidyeꞌ yity shajtataty suyuꞌ in tyiꞌmu jameꞌtity in, mọꞌ cạiꞌ yävätidyeꞌ dáquedyes yómodyeꞌ, meꞌ cạiꞌ taminꞌdyeꞌ mi. 28Meꞌ raꞌ jiyiꞌ räj muꞌ Jenꞌ aty jäꞌmiij jiꞌĉuyin mi, ayoꞌ, junꞌ chuc raꞌ jämꞌtaqui muꞌ. 29Dạquiqueꞌ raꞌ tupudyeꞌ anic raꞌ jämꞌ shupquiꞌ cätidyeꞌ yóquiꞌvedyemꞌ ọij jac Egipto o. Anic raꞌ jiꞌshuc daiꞌ jibitidyes, yävätidyeꞌ raꞌ yómodyeꞌ meꞌquiꞌ raꞌ jämiꞌ. 30Chat qui raꞌ jäquiꞌve dạquiqueꞌ tupudyeꞌ aty raꞌ jam jämꞌ shupquiꞌ cätidyeꞌ in, anic raꞌ jayej jibitidyes, chichimesdye raꞌ yävätidyeꞌ yómodyeꞌ, meꞌ buꞌyiꞌ. 31Anic raꞌ chäcdyis ñịbedyes ọ́ĉan Egiptoĉan, aty raꞌ jam cạvebanꞌ in jämꞌsiꞌ yómodyeꞌ, yoquiꞌdyemꞌ jiꞌshuc jibitidyes u muꞌin, anic raꞌ jayej muntyidyes in. 32Päräꞌ quiꞌ meꞌ tamiñi mi, mọꞌ jiꞌĉuyisinꞌ muꞌ Jenꞌ fer meꞌ dyijyi, cavintum raꞌ jịꞌcätsaqui ọij p̂eyacdyeꞌ muꞌ.

33Meꞌdyes yụ jéye mi, ayoꞌ, damꞌdye jämꞌ quevte mi anic dyijyedyeꞌtumtyiꞌ muntyiꞌ chị́dyeꞌtumtyiꞌ, joꞌmety raꞌ yụꞌtem paj qui muꞌ ayoꞌbuꞌyi jacdyes. 34Meꞌ raꞌ mi ayoꞌ yụꞌtacsi raꞌ mi nọ́taquity mi, paiꞌ bäꞌyity in ọij jac Egipto paj qui muꞌin pạrejjetyetacsi chum in jibitidyes, ĉanamꞌ quiꞌtacyis jibitidyes jämꞌjeꞌ chum raꞌ muꞌin in. Mọꞌyaꞌ ĉanamꞌ arova jụijyaꞌ, yiris raꞌ jämꞌjeyac, meꞌ meꞌ raꞌ muꞌin jämꞌsiꞌĉansiꞌ yómodyeꞌ. 35Meꞌ raꞌ vajmuꞌyaꞌjeyac jibitidyety q̂uinꞌ in junꞌ quiꞌ chuc dáquedyes yómodyeꞌ dạquiqueꞌ. Muꞌ jämꞌjeyactyiꞌ jibitidyety trivo, mi raꞌ ĉọjcate. Muꞌĉan raꞌ vajmuꞌyaꞌjeyac bäꞌyedyeꞌĉan in. 36Meꞌ raꞌ mi aty jadyic jụijyaꞌ jämꞌsiꞌ yómodyeꞌ, chat q̂uinꞌdyemꞌ raꞌ vanchubajte muntyidyety in paj qui jam dáquis jaꞌujati muntyiꞌ in, ĉaĉaij na chichimesdye raꞌ mọꞌ yómodyeꞌ yävätidyeꞌ jam raꞌ junꞌ jämꞌ shupquiꞌ cätidyeꞌ ọ́ĉan Egiptoĉan —yi José jéte Faraón.

José yụꞌtac Egiptoĉan ayoꞌbuꞌyi

37Faraón nọ́taquitytum muꞌ anic muꞌin jämꞌsiꞌ ĉọpte in Josésiꞌ p̂eyacdyeꞌ muꞌ. 38Jéyacsi nọ́taquity muꞌ Faraón:

—Mijam tyi dạcja tsun joꞌmety dyijyedyeꞌtumtyiꞌ yojtyitydyemꞌ uts José u, ĉaĉaij uts meꞌchupte Jenꞌsiꞌ Ạꞌedyeꞌ muꞌ.

39Mọꞌdyes qui yi muꞌ Faraón jéte José:

—Jenꞌdye jin mi ọij q̂uinꞌ, anic mujuꞌchaꞌ dyijyedyeꞌtumtyiꞌ mi judyeyaꞌ chị́dyeꞌtum chimeꞌ mi, mijam jụꞌñity meꞌ yoctyiꞌ. 40Yụ raꞌ yụꞌtyeye paj qui mi ĉujcabut mi yụs acaꞌ räj, úñity yụ chäquibun raꞌ p̂eyacdyeꞌ in, yụmꞌ yirity mujuꞌchaꞌ tyitim úĉan. 41Meꞌdyesiꞌ nash yụ yụꞌtyeye räj buꞌyidyes ọij jac Egipto ayoꞌbuꞌyi raꞌ mi —yi Faraón jajiti José.

42P̂eyacdyeꞌĉandye muꞌ Faraón tọiꞌtaqui sontica muꞌ, cac̣htacdyeꞌtumtyiꞌ muꞌ, chat soꞌmete qui José. Judyeyaꞌ quịꞌsiꞌ soꞌmete jämꞌtyiꞌ lino muꞌ quịꞌsiꞌ soꞌmete, judyeyaꞌ tyicacdyeꞌ oro muꞌ. 43Chat jiꞌbojvete ayoꞌsiꞌcheꞌ careto, tashchetysiꞌ nọ́taquity Faraóntyiꞌ muꞌ. Jéyacsi úñity muꞌ: "Junaꞌ ĉụiꞌ jịjcaijyaꞌ uts José caretocheꞌ äjtacsi raꞌ muntyiꞌ miꞌin, jéyacsi: Dyenyejamꞌ." Meꞌ muꞌ Faraón jayuꞌti José paj qui ayoꞌbuꞌyi Egiptoĉan. 44Chimeꞌdye muꞌ Faraón jajiti:

—Yụ nash mujuꞌchaty ayoꞌ, ọij nash yụꞌtacdyeꞌ yụ, räj Egiptoĉantyiꞌ muntyiꞌ in chäquin raꞌ in, mijam raꞌ miquis p̂eyacdyeꞌ ñäñibun in.

45Faraón yocsiꞌ tịj soꞌmete, Egiptoĉantyis p̂eyacdyeꞌ muꞌin, Zafnat-panea, jéte qui, judyeyaꞌ jiꞌvämete Asenatcheꞌ, Potiferas ạvaꞌ muꞌ, muꞌ cudyitity jämꞌtacdyeꞌcheꞌ, On bäꞌyedyeꞌ tịj muꞌsiꞌ. Meꞌ muꞌ José jiquej tashcheꞌ buꞌyi yụꞌtac Egiptoĉan. 46Chibin quiꞌtacdyemꞌ yómodyeꞌ tyiti muꞌ Josés yoquiꞌdyemꞌ jiꞌcaviti Faraónyaꞌ u, Egiptoĉantyiꞌyaꞌ ayoꞌ.

Chat muꞌ José farajjete muꞌ Faraón, paiꞌ bäꞌyedyeꞌ ĉọ́queꞌ Egiptoĉansiꞌ. 47Anicdye meꞌ, yävätidyeꞌ yómodyeꞌ anic jämꞌ shupquiꞌ sicdyeꞌ mọꞌ, anic jiyiꞌ shupquiꞌ jibitidyes. 48José jéyacsi paj qui vajmọꞌyaꞌjeꞌ in jibitidyes muꞌin, jämꞌjeꞌ in, c̣hẹiꞌyasĉaĉan bäꞌyedyeꞌ yụꞌtyeꞌ in. 49Anic jiyiꞌ daiꞌ trivo vajmuꞌyaꞌte muꞌ José, yoquiꞌdyemꞌ marĉantyiꞌ jáman u, meꞌquiꞌ muꞌ trivo jämꞌte in. Aty jam tupuj sánac ĉaĉaij na junꞌtum raꞌ muꞌ, aty jam chimeꞌ tupuj tuputuc muꞌ trivo, meꞌquimꞌ shachshachjete in.

50Jambiꞌdyemꞌ dạquiqueꞌ in mọꞌ dáquedyes yómodyeꞌ in, chat muꞌ José päräꞌ ạvaꞌyi Asenatĉan. 51Tashchety ạvaꞌ muꞌ Manasés yụꞌtyeyete tịj, ĉaĉaij yi muꞌ, "Jenꞌ yi paj qui yaquinjoij yụ ñịbedyesĉan jịꞌĉojtyeꞌ úĉan jiquej yụ judyeyaꞌ paj qui yaquin chätidyeꞌ yụ chimeꞌ." 52Muꞌ päräꞌyity ạvaꞌ muꞌ jịꞌtiꞌaqui Efraín, ĉaĉaij na yi muꞌ: "Jenꞌ yi paj qui ạvaꞌyi yụ úĉan, yóĉandyemꞌ ñịbeꞌ cạveꞌĉan uij", yi muꞌ José.

53Aty meꞌquiꞌdye jiyiꞌ Egiptoĉan mọꞌin yävätidyeꞌyis yómodyeꞌ jämꞌsiꞌ in, 54yoj yidyemꞌ José jiquej u. Yojyojdyemꞌ bäꞌyedyeꞌ o, meꞌ meꞌ dáqui muntyiꞌ in, meꞌdye yiris mọmoꞌ jac Egipto meꞌchuiꞌ jämꞌjeyacsiꞌ jibitidyes säcsedyeꞌ. 55Muꞌĉantyiꞌ chimeꞌ jayejjotaqui jibitidyes in. Faraón tsanꞌ cọdyetyecte trivo in. Muꞌ na jéyacsi:

—José raꞌ ĉọctinte, seꞌveptinte raꞌ p̂eyacdyeꞌ muꞌ, jätäjjinac chuc.

56Chimeꞌdye mọꞌĉan dáquis Egiptoĉan, räj buꞌyiꞌdye mọꞌ, chat qui muꞌ José vanchute trivo, tiyacchuti jiꞌmincayacsi, meij mọmoꞌ jịjcaiꞌ dáquis. 57Chimeꞌdye yocvety muntyiꞌ atsij ĉọshte in, paiꞌ paiꞌ bäꞌyedyeꞌ atsij in, Egiptoĉan yaꞌiyeti säcsedyeꞌ in, muꞌ José jiꞌmincayacsi, ĉaĉaij na räj buꞌyiꞌ jac jayejjotaqui säcsedyeꞌ in.

Currently Selected:

Génesis 41: CAS

Highlight

Copy