Génesis 37

1Jacob taĉan Canaánĉan yóĉandyemꞌ bäꞌyi jenꞌ jiquej um. 2Ọij q̂uinꞌ p̂eyacdyeꞌ p̂eyacsiꞌ Jacobtyiꞌ ạvaꞌ muꞌ.

José judyeyaꞌ vojity muꞌ

Aty yiriꞌtac yävätidyeꞌ jiyiꞌ yómodyeꞌ tyiti muꞌ José, chat muꞌ yiriꞌyaꞌ vojitytum muꞌ ĉọjcacsi oveca in jenꞌsiꞌ muꞌ. Muꞌin ĉọjcaquity in Bilhaty ạvaꞌ mọꞌ judyeyaꞌ Zilpaty chimeꞌ mọꞌ, mọꞌin chimeꞌ jenꞌsiꞌ p̂en muꞌ. José jéyaqui jenꞌ muꞌ aꞌc̣his vojitysiꞌ dyijyedyeꞌ muꞌin.

3Muꞌ na Israel mujuꞌchaꞌ mạꞌjeyaqui José ạvaꞌ muꞌ,#37:3 Jacob yocsiꞌ qui tịj muꞌ Israel. Génesis 32:28 uyaꞌyaꞌ yoctyiꞌ ạvaꞌ muꞌ mạꞌjeyaqui, ĉaĉaij na ishodyeꞌĉan naꞌi muꞌ José. Mọꞌdyes qui muꞌ jämꞌtyeyete yirity coftyity anic jämꞌtyiꞌ. 4Aty chịjyaꞌ in muꞌin vojity muꞌ, muꞌ jenꞌ muꞌin mujuꞌchaꞌ mạꞌjete José, mọꞌjete qui fạ́quete in vojity muꞌin, aꞌc̣histum p̂eyacdyeꞌ vorjete in.

5Yirisĉan mạyedyeꞌ tamiñi muꞌ José. Jịꞌchiqueyaqui vojity muꞌ junꞌ chuc taminꞌdyeꞌ muꞌ, mọꞌdyes qui muꞌin damꞌdye mujuꞌchaꞌ fạ́quete in. 6Jéyacsi:

—Seꞌvibutiĉamꞌ taminꞌdyeꞌ yụ. 7Meꞌ tyuꞌ caꞌ tsun, vädaĉaꞌ tyuꞌ caꞌ trivo, meꞌ tyuꞌ caꞌ c̣họcoꞌtety yụ ĉụiꞌ tyuꞌ caꞌ quichyi, miꞌintyiꞌ tyuꞌ caꞌ cọij buꞌyi yụ́tyyaꞌ, chat qui dyụtsyi in yụ́tyyaꞌ c̣họcoꞌtactyiꞌyaꞌ —yi jéyacsi muꞌ José taminꞌdyeꞌ muꞌ.

8Vojity muꞌ vorjete in:

—¿Mi adac mạꞌjeꞌ ayoꞌbuꞌyi tsundyes? —jéte in.

Dadamꞌ mujuꞌchaꞌ fạ́quete in taminꞌdyedyes muꞌ judyeyaꞌ p̂eyacdyedyes muꞌ, ĉaĉaij na jéyacsi jedyeꞌ buty cạiꞌ mọꞌ taminꞌdyeꞌ muꞌ.

9Cuvij qui muꞌ José tamiñi judyeyaꞌ jéyacsi vojity muꞌ, yi muꞌ:

—Cuvij tyuꞌ caꞌ meꞌ tamiñi yụ, cạvete yụ muꞌ tsun judyeyaꞌ mọꞌ ịvaj judyeyaꞌ ọ́rotaꞌ in, yiriꞌtac yirity jiyi in, räj tyuꞌ caꞌ dyụtsyi yụ́yaꞌ in, meꞌ tamiñi yụ —jéyacsi.

10José jịꞌchiqueyaqui jenꞌ muꞌ mọꞌ taminꞌdyeꞌ. Chat qui jenꞌ muꞌ fạraꞌjeĉunꞌte p̂eyacdyeꞌyaꞌ muꞌ. Yi jéte:

—¿Junꞌ dash meꞌ tamiñi mi? ¿Meꞌ buty mạꞌjeꞌ meꞌ dyijyi mi paj qui tseꞌ mi judyeyaꞌ vojity mi judyeyaꞌ yụ chimeꞌ dyụtsyi míyaꞌ tsun?

11Muꞌin qui vojity muꞌ jịꞌfajqueꞌ in mọꞌ p̂eyacdyeꞌ, muꞌ na jenꞌ muꞌ anic dyijtupte p̂eyacdyeꞌ muꞌ.

José jiꞌmincate in vojity muꞌ

12Yirisĉan mạyedyeꞌ muꞌin Josétyiꞌ vojity muꞌ Siquemve jịjcaij in, quevti in tajñiꞌ ovecadyety in jenꞌtyidyety muꞌin. 13Aty meꞌsiꞌ chat qui muꞌ Israel jéte José:

—Aty Siquemve q̂uinꞌ vojity mi, ĉọjcaiꞌ cuꞌdyeꞌ in. Yụ mạꞌjeꞌ paj qui muꞌve ĉọcseĉan.

José vorjete:

—Jụdyej, meꞌ tyuꞌ u —yi.

14Israel jéte:

—Tänꞌjeyacsecada junꞌ chuc muꞌin in vojity mi, chat qui raꞌ jíbunꞌ mi.

Meꞌdye qui muꞌ Israel jutete José, mojijĉan Hebrónĉan shupqui muꞌ. Chat qui muꞌ José venjoij muꞌ Siquemve. 15Mijam dạcacsequi vojity muꞌ meꞌĉandye moñi. Muꞌĉantyiꞌ yirity muntyiꞌ janaijti muꞌ José, cäjyaꞌ cọijtyivaꞌti muꞌ quevacseban tsanꞌ muꞌ. Chat qui jajiti:

—¿Jedyeꞌ caꞌ quevaĉan mi?

16José vorjete:

—Vojity nash quevacseshan yụ. ¿Jam mi chịj u, junaꞌ buty muꞌyaꞌ in ĉọjcaiꞌ oveca in?

17Muꞌ muntyiꞌ vorjajiti:

—A nash jọban in, yụ nash seꞌvacsebi p̂eyacdyeꞌ muꞌin: "Dotánve jịjcabajshaꞌ", yi in.

Chat qui muꞌ José muꞌve jịjcaij q̂uinꞌdyemꞌ muꞌve chaꞌshacsi Dotánve. 18Tacaꞌ moch tyivaꞌti, jịꞌĉojtuyeĉunꞌte in. Jambiꞌ ventacsequi muꞌyaꞌ, aty muꞌin jäꞌmij dyijyi in mạꞌjeꞌ ijate in. 19Yi jítidyeij in:

—Muꞌdye caꞌ tamiñity meij jijtuij. 20Jeshaꞌ damꞌdye jämꞌ ijaja, chat qui raꞌ vaꞌqueĉa toꞌĉan, judyeyaꞌ qui raꞌ yéjaꞌ: "Vajedyedyeꞌ jajibitaque." Cạvejaꞌdye raꞌ junꞌ chuc raꞌ taminꞌdyeꞌ muꞌ —yi jíti in.

21Rubén na seꞌvacsebi p̂eyacdyeꞌ muꞌin dyijyi tsanꞌ jiꞌc̣honte vojityyaꞌ muꞌin paj qui jam ijate in. Yi jéyacsi:

—Junꞌtyejadyemꞌ ijaja, 22mijam raꞌ jiꞌchäsheja. Damꞌdye jämꞌ toꞌĉan mọmoꞌ vaꞌqueĉa, jam qui na ramꞌ junꞌ areꞌtyeja.

Yi jéyacsi Rubén ĉaĉaij na ĉụiꞌ dyijyi yi: "Yụ raꞌ jịꞌjobajte jịꞌcaꞌñebajteij jenꞌyaꞌ muꞌ."

23José ventacseti vojity muꞌ. Chutyete chum in jämꞌtyiꞌ quịꞌsiꞌ muꞌ 24chat qui tapjete in toꞌĉan vaꞌquecte in chañesĉan. 25Aty muꞌ toꞌĉan jụijyaꞌ chat vojity muꞌ bäꞌyi in säcsi in.

Atsij vatyquej muntyiꞌ in, Ismaeltyiꞌ vóshiꞌ muꞌ, Galaadvety in. Cameyocheꞌ tuiꞌ in jẹrejres in judyeyaꞌ mirra in judyeyaꞌ pịñidyeꞌ bálsamo tuiꞌ in, ĉaĉaij na muꞌin jiꞌmincaquity in, Egiptoĉan jịjcaij in. 26Judá jéyacsi vojity muꞌ:

—Anic raꞌ fibiꞌ ijaja uts vojity tsun, judyeyaꞌ ticamepja sänꞌdyeꞌ muꞌ. 27Damꞌdye jämꞌ jiꞌmincaja utsyaꞌ in Ismaeltyiꞌyaꞌ vóshiꞌ in. Jam raꞌ ijaja ĉaĉaij na ĉụiꞌtyiꞌ vojity tsun —yi jéyacsi Judá.

Vojity muꞌ jụjte in. 28Aty cajnacsi muꞌin in jiꞌmincaquity in, Madiánĉan bäꞌyity in, muꞌ vojity muꞌin vaꞌcactyiꞌ tsanꞌ toꞌĉan muꞌin jäĉajte in, chat qui jiꞌmincate in Ismaeltyiꞌyaꞌ vóshiꞌ in, querec̣hayaꞌ jiꞌmincate in, päräꞌ quiꞌtac ficha plata meꞌtum soꞌmacsi in. Chat qui Egiptoĉan cạte in muꞌ José.

29Rubén shupqueti toꞌyaꞌ jijtuij, aty jam dạquishajte muꞌ José. Där muꞌ tári, muꞌyaꞌ shẹiꞌjeyaqui quịꞌsiꞌ muꞌ táredyedyety.#37:29 Yicdyeꞌ jiquej muꞌin anic fersiꞌ táredyeꞌ tŝọ́tacsiꞌ muꞌin chat qui shẹiꞌjeyaqui quịꞌsiꞌ muꞌin. 30Chat qui ĉọcsequi vojity muꞌ jéyacsi:

—¡Aty itŝij muꞌ nanaty! ¿Junꞌ qui bu raꞌ q̂uinꞌ yụ? —yi muꞌ.

31Chat ijaqui in yirity chivo judyeyaꞌ c̣hucjepte quịꞌsiꞌ chäshĉan in. 32Chat jịꞌcayaĉan jenꞌ muꞌin, paj qui muꞌ cạvete, meꞌ buꞌyiꞌ juteꞌ p̂eyacdyeꞌ muꞌin yi: "Uts quịꞌsiꞌ coftyity dạcte tsun, jämꞌ cạveme vatyquej raꞌ ạvaꞌtyiꞌ Joséty mi", yiꞌ p̂eyacdyeꞌ.

33Jacob cavintum chị́yepte quịꞌsiꞌ muꞌ, yi muꞌ:

—Muꞌtyiꞌdye u Joséty, aty vajedyedyeyaque jajibitaque —yi.

34Jacob shẹiꞌjeyaqui quịꞌsiꞌ muꞌ táredyedyety, p̂oc̣hiꞌc̣hiijtyiꞌĉan quịꞌsiꞌ cäbun, men táraqui ạvaꞌ muꞌ. 35Räj ạvaꞌ muꞌ, sonꞌ in judyeyaꞌ p̂en ạvaꞌ muꞌ, mạꞌjeꞌ tsanꞌ jiꞌjiyepte táredyeꞌ in, jam qui namꞌ méquiꞌ jụjyi muꞌ. Yi mọmoꞌ:

—Yụ raꞌ yejĉoij tári junꞌ quiꞌ chuc säñitysiꞌ bäꞌyedyeꞌ dạquiqueꞌ yụ, muꞌĉan raꞌ chaꞌshaqui yụ.

36Muꞌin na Madiánĉan bäꞌyity in aty muꞌin Egiptoĉan venjoij in. Muꞌĉan jiꞌmincacte José in, Potifar yaꞌij, nọ́taquity Faraóntyiꞌ muꞌ, Egiptoĉantyiꞌ ayoꞌ. Chimeꞌ muꞌ Potifar tashchety ĉọjcatety ayoꞌ muꞌin.

Currently Selected:

Génesis 37: CAS

Highlight

Copy