Exodo 38
38
Jämꞌtac mọꞌ jiꞌcoꞌshayaquis bronce
1Muꞌin jämꞌtyeꞌ mọꞌ jiꞌcoꞌshayaquis Jenꞌdyes son acacia. Muꞌin jämꞌtyeꞌ mọꞌ vaj meꞌquiꞌyaꞌmun moc̣hadyemꞌ judyeyaꞌ därvedyemꞌ; päräꞌ metro päräꞌ quiꞌtac ĉanamꞌ centimetro. 2Chaꞌraiꞌ jämꞌtyeꞌ in, fajcheꞌ jämꞌtac dochtiꞌve. Mọꞌ chaꞌraras mọꞌ mọꞌcheꞌdye son jämiꞌ. Fajcheꞌ tyeij broncemꞌ räj mọꞌ jiꞌcoꞌshayaquis Jenꞌdyes. 3Muꞌin jämꞌtacsi tạꞌdyity in jecacdyes chim judyeyaꞌ jedacdyeꞌ in, jäꞌchäs in, tenedor in, pijiꞌ in, räj mọꞌin jedyeꞌ in jiꞌcoꞌshayaquis Jenꞌdyes mọꞌ bronce jämiꞌ. 4Muꞌin jämꞌtyeꞌ yiris yụꞌtacdyes mọꞌĉandyes mọꞌ jiꞌcoꞌshayaquis Jenꞌdyes. Muꞌin jämꞌtyeꞌ in mọꞌ sacvas bronce. 5Chimeꞌ muꞌin jämꞌtacsi vạjpedyeꞌ coꞌtyity in quipdyiveveyaꞌ mọꞌ yụꞌtacdyes mọꞌ jiꞌcoꞌshayacdyedyes. 6Mọꞌin cạquis son jämꞌtacsi in son acacia judyeyaꞌ mọꞌincheꞌ fajcheꞌ tyeij bronce. 7Muꞌin yụꞌtacsi mọꞌin cạquis son in coꞌtyityĉan jorojyaꞌ yụꞌtac mọꞌ jiꞌcoꞌshayaquis Jenꞌdyes pärenꞌve yụꞌtac in. Muꞌin jämꞌtyeꞌ mọꞌ jiꞌcoꞌshayaquis Jenꞌdyes jojdoiꞌ mọꞌ, tavara jämiꞌ.
Jämꞌtac mọꞌ jäꞌchäs favtidyes bronce
8Muꞌin jämꞌtyeꞌ mọꞌ jäꞌchäs favtidyes judyeyaꞌ yuj mọꞌ bronce jämi. Mọꞌin p̂en in carijtaquis sisdyeꞌyaꞌ mọꞌ Jenꞌsiꞌ acaꞌ tinates muꞌ ñịbeꞌjeyacsi ĉụiꞌsiꞌ espejo bronce jämiꞌsiꞌ in paj qui muꞌin jämꞌtyeꞌ mọꞌ jäꞌchäs favtidyes judyeyaꞌ yuj mọꞌ.
Jämꞌtac mọꞌin naꞌru cọtoij buꞌyis Jenꞌsiꞌ acaꞌ tinates muꞌ
9Muꞌin jämꞌtyeꞌ mọꞌ naꞌru cọtoij buꞌyis Jenꞌsiꞌ acaꞌ tinates muꞌ. Mọꞌ naꞌru jätisve vạjpedyeꞌ quiꞌtac vạjpedyeꞌ metro moc̣hadyemꞌ, jämi quịꞌsiꞌyaꞌ jämꞌtyiꞌ lino muꞌ. 10Muꞌyaꞌ päräꞌ quiꞌtac p̂otsoꞌvi in fajcheꞌ päräꞌ quiꞌtac dyäch buꞌyacñis bronce judyeyaꞌ mọꞌintum vij buꞌyacñis plata in judyeyaꞌ mọꞌin pan chụiꞌsiꞌ p̂otsoꞌviches in. 11Mọꞌ naꞌru rocves vạjpedyeꞌ quiꞌtac vạjpedyeꞌ metro moc̣hadyemꞌ, jämꞌtac quịꞌsiꞌ jämꞌtyiꞌ lino muꞌ. Muꞌintum päräꞌ quiꞌtac p̂otsoꞌvi in judyeyaꞌ päräꞌ quiꞌtac dyäch buꞌyacñis bronce in judyeyaꞌ vij buꞌyacñis plata in judyeyaꞌ pan chụiꞌsiꞌ p̂otsoꞌvicheꞌ in.
12Mọꞌ naꞌru mọꞌve jịjcaiꞌcheꞌ tsun päräꞌ quiꞌtac päräꞌ jiyi metro moc̣hadyemꞌ muꞌintum yiriꞌtacyity p̂otsoꞌvi in, judyeyaꞌ yiriꞌtac dyäch buꞌyacñis bronce in, judyeyaꞌ vij buꞌyacñis plata in, judyeyaꞌ pan chụiꞌsiꞌ p̂otsoꞌvicheꞌ in. 13Mọꞌ naꞌru shupquive tsun päräꞌ quiꞌtac päräꞌ metro moc̣hadyemꞌ. 14Mọꞌ naꞌru tacves sisdyeꞌ jäbän metro choc moc̣hadyemꞌ chibintum p̂otsoꞌvi in judyeyaꞌ chibin dyäch buꞌyacñis bronce in. 15Judyeyaꞌ mọꞌ naꞌru q̂uimves sisdyeꞌ vaj cäts buꞌyiꞌ mọꞌ. Jäbän metro choc moc̣hadyemꞌ chibintum p̂otsoꞌvi in judyeyaꞌ chibin dyäch buꞌyis bronce in. 16Räj muꞌ quịꞌsiꞌ naꞌru cọtoij buꞌyiꞌ acas mọꞌ, jämꞌtyiꞌ quịꞌsiꞌ lino muꞌ. 17Mọꞌin dyäch buꞌyacñis p̂otsoꞌvidyes in bronce jämi. Mọꞌin vij buꞌyacñis in judyeyaꞌ mọꞌin pan chụiꞌsiꞌ in, plata jämi in. Judyeyaꞌ jimijcheꞌ muꞌin p̂otsoꞌvi in yụꞌtyeꞌ plata in. Meꞌdyes qui räj muꞌin p̂otsoꞌvi in meꞌchucsi pan chụiꞌsiꞌ in plata jämi in.
18Quịꞌsiꞌ muꞌin jämꞌtyeꞌ mọꞌ sisdyeꞌ p̂ejyaꞌ mọꞌ Jenꞌsiꞌ acaꞌ tinates muꞌ. Muꞌin jämꞌte in quịꞌsiꞌ búmaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ jämꞌtyiꞌ lino chimeꞌ. Muꞌ quịꞌsiꞌ mọꞌ jämꞌtacdyeꞌ muꞌin chịj p̂anaquity in. Muꞌ quịꞌsiꞌ sisdyeꞌyaꞌ arajtac metro moc̣hadyemꞌ judyeyaꞌ päräꞌ metro moc̣hedyemꞌ. Räj muꞌ quịꞌsiꞌ naꞌru cọtoij buꞌyi acas mọꞌ päräꞌ metro moc̣hedyemꞌ, 19muꞌintum vạjpedyeꞌ p̂otsoꞌvi in judyeyaꞌ vạjpedyeꞌ dyäch buꞌyacñis bronce in. Räj muꞌin p̂otsoꞌvi in meꞌchucsi vij buꞌyacñis in judyeyaꞌ pan chụiꞌsiꞌ in judyeyaꞌ jimijcheꞌ plata yụꞌtac p̂otsoꞌvicheꞌ muꞌ. 20Räj mọꞌin saptacdyedyes juñꞌ buꞌyis in jacĉan bronce jämi in. Mọꞌdyes Jenꞌsiꞌ acaꞌ tinates muꞌ judyeyaꞌ mọꞌin naꞌrudyes chimeꞌ.
Mọꞌin jedyeꞌ in yụꞌtac Jenꞌsidyes acaꞌ muꞌ tinates
21Ọij nash mọꞌ tuputucdyeꞌ mọꞌin jedyeꞌ in yụꞌtac Jenꞌsidyes acaꞌ muꞌ tinates. Tashcheꞌ jiquej muꞌ Moisés jéyacsi muꞌin Levítyiꞌ vóshiꞌ in paj qui sánacsi räj mọꞌin jedyeꞌ in. Chimeꞌ muꞌ Moisés yụꞌte muꞌ Itamar tashcheꞌ buꞌyity muꞌinyaꞌ in. Muꞌ Itamar muꞌdye Aaróntyiꞌ ạvaꞌ muꞌ, muꞌ cudyitity Jenꞌcheꞌ. 22Muꞌ Bezaleel Urityiꞌ ạvaꞌ muꞌ, Hurtyiꞌ vịyaꞌ muꞌ vóshiꞌ Judáty muꞌ, muꞌtyiꞌ ñuruꞌtyity muꞌ. Muꞌ Bezaleel jämꞌtacsi räj mọꞌin jedyeꞌ in yoj yiꞌdyemꞌ muꞌ Jenꞌ jajiti muꞌ Moisés jiquej u. 23Muꞌtum carijtaqui muꞌ Aholiab, Ahisamactyiꞌ ạvaꞌ judyeyaꞌ vóshiꞌ Dantyiꞌ muꞌ, muꞌtyiꞌ ñuruꞌtyity muꞌ. Muꞌ Aholiab chịj muꞌ jämꞌtacsi jedyeꞌ in judyeyaꞌ mọꞌyaꞌ dyijyedyeꞌ muꞌ junꞌ chuc tupuj meꞌjeꞌ jedyeꞌ in judyeyaꞌ muꞌ chịj p̂anaqui judyeyaꞌ junꞌ chuc jämꞌtacsi dibujo p̂anacdyeꞌyaꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ yaꞌijtyiꞌyaꞌ quịꞌsiꞌ lino chimeꞌ. 24Muꞌ oro soꞌmetety Jenꞌ muꞌinyaꞌ Israeltyiꞌyaꞌ vóshiꞌ in yụꞌte in cheꞌcheꞌjeyacdyeꞌ Jenꞌdyes. Mọꞌ tuputucdyeꞌ oro yiriꞌ mir quiro. Meꞌ buꞌyiꞌ mọꞌ tuputucdyeꞌ yojdyemꞌ muꞌin Levítyiꞌ vóshiꞌ in tuputute jiquej u in muꞌ oro carijtacdyedyes mọꞌ Jenꞌsiꞌ acaꞌ tinates muꞌ.
25Yoquiꞌdyemꞌ jiquej muꞌin tsicsi muꞌin sonꞌ Israeltyiꞌ vóshiꞌ u in, muꞌin jemoñeꞌ plata soꞌmete Jenꞌ ĉụiꞌsidyes tsạꞌsiꞌ muꞌin. Mọꞌ tuputucdyeꞌ plata jiquej chibin mir vạjpedyeꞌ quiꞌ cien chibin quiꞌtac quiro. Meꞌ buꞌyiꞌ tuputucdyeꞌ yojdyemꞌ muꞌin Levítyiꞌ vóshiꞌ u in tuputute jiquej. 26Cäts yirityityij sonꞌ Israeltyiꞌ vóshiꞌ jiquej soꞌmete Jenꞌ in yiriꞌtac yiris gramos plata yojdyemꞌ muꞌin Levítyiꞌ vóshiꞌ in tuputute jiquej u in. Meꞌdyes qui räj muꞌin Israeltyiꞌ vóshiꞌ in tsictyiꞌ jiquej in soꞌmete Jenꞌ mọꞌ plata. Muꞌyaꞌ jiquej 603.550 jiyi rụiꞌcuꞌ Israeltyiꞌ sonꞌ tsictyiꞌ jiquej. 27Muꞌin yụꞌte in 3.420 quiro plata dyäch buꞌyacñisdyes in muꞌdyes juñum buꞌyitydyes quịꞌsiꞌ. Mọꞌyaꞌ yiriꞌ cien dyäch buꞌyacñis in jämi platayaꞌ muꞌyaꞌdye 3.400 quiro plata. Yiris dyäch buꞌyis chibin quiꞌtac vạjpedyeꞌ quiro plata. 28Mọꞌ jiꞌshucdyidyeꞌ päräꞌ quiꞌtac quiro plata yụꞌtyeꞌ mọꞌindyes in vij buꞌyacñisdyes in judyeyaꞌ pan chụiꞌsiꞌ in judyeyaꞌ jimijcheꞌ muꞌin p̂otsoꞌvi naꞌrutydyety in.
29Mọꞌ bronce soꞌmetes Jenꞌ jiquej yụꞌtac cheꞌcheꞌjeyacdyeꞌ Jenꞌdyes. Mọꞌ bronce tuputucdyeꞌ 2.425 jiyi quiro. 30Muꞌin jämꞌtacsi dyäch buꞌyacñis sisdyeꞌyaꞌ Jenꞌsiꞌ acaꞌ tinates muꞌ bronce jämi in. Chimeꞌ bronce jämꞌtyeꞌ mọꞌ jiꞌcoꞌshayaquis Jenꞌdyes judyeyaꞌ mọꞌ yụꞌtacdyes jiꞌcoꞌshayaquisdyes judyeyaꞌ räj jedyeꞌ mọꞌdyes mọꞌ jiꞌcoꞌshayaquis Jenꞌdyes, räj bronce jämi. 31Räj jämꞌtacsi muꞌin dyäch buꞌyacñis mọꞌdyes naꞌru cọtoij buꞌyiꞌ acas mọꞌ bronce jämi in. Chimeꞌ räj mọꞌin saptacdyedyes juñꞌ buꞌyis in bronce jämi in. Mọꞌin sisdyedyeꞌyaꞌ in judyeyaꞌ naꞌrudyes in judyeyaꞌ chimeꞌ mọꞌin mọꞌdyes Jenꞌsiꞌ acaꞌ tinates muꞌ räj bronce jämi in.
Currently Selected:
Exodo 38: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
