Exodo 39
39
Quịꞌsiꞌ carijtacdyedyes Jenꞌsiꞌĉan acaꞌ tinates muꞌ
1Muꞌin jämꞌtacsi quịꞌsiꞌ carijtacdyedyes Jenꞌsiꞌĉan acaꞌ tinates muꞌ. Muꞌ quịꞌsiꞌ jämi búmaꞌ yushñuty, judyeyaꞌ jäijnäty, judyeyaꞌ jeꞌñety faj. Chimeꞌ muꞌin jämꞌtacsi muꞌ quịꞌsiꞌ Aaróndyety. Muꞌin jämꞌtacsi cäts yojdyemꞌ muꞌ Jenꞌ jajiti muꞌ Moisés jiquej u.
2Muꞌin jämꞌte muꞌ nabactyity eꞌfeyaꞌ oro judyeyaꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ chimeꞌ yaꞌijtyiꞌ quịꞌsiꞌ lino. 3Muꞌin cash cashjete oro anic shim yụꞌte in chat tätsjete in paj qui jeꞌñeij búmaꞌ shupquiꞌ mọꞌ oro. Chat qui muꞌin p̂ante in oro búmaꞌtum yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ muꞌ jämꞌtyiꞌ lino. Meꞌ jämꞌte in chịj p̂anaquity in. 4Muꞌin jämꞌtacsi mọꞌin q̂uep buꞌyis in nabactyitydyes eꞌfeyaꞌ. Mọꞌin q̂uep buꞌyis in täyenꞌjeyac quipdyivevej muꞌ. 5Mọꞌ ñutuꞌsis jämꞌtyeꞌ muꞌin muꞌyaꞌdye quịꞌsiꞌ jämꞌte in muꞌ nabactyity eꞌfeyaꞌ. Muꞌin jämꞌte muꞌ oro, judyeyaꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ chimeꞌ yaꞌijtyiꞌ quịꞌsiꞌ lino. Muꞌin jämꞌtyeꞌ in cäts yojdyemꞌ muꞌ Jenꞌ jajiti muꞌ Moisés jiquej u.
6-7Muꞌin yụꞌtacsi muꞌin päräꞌ yaꞌijtyiꞌ mij ónice q̂uep buꞌyischeꞌ in. Muꞌin mij peiꞌ buꞌyi orocheꞌ yụꞌtac in. Muꞌin fiyeroyaꞌ sánacsebi tịj muꞌin Israeltyis ạvaꞌ muꞌin mijcheꞌ. Muꞌin tịjtumtyiꞌcheꞌ mij in shupqui jiꞌdyijvacdyes muꞌin Israeltyiꞌ ạvaꞌ in. Meꞌ buꞌyi yoj yidyemꞌ muꞌ Jenꞌ jajiti muꞌ Moisés jiquej u.
8Muꞌin jämꞌtyeꞌ in mọꞌ ñuts buꞌyis eꞌfeyaꞌ muꞌin chịj jämꞌtyeꞌtyiꞌ in. Muꞌin jämꞌte in yojdyemꞌ nabactyity quịꞌsiꞌ u. Mọꞌ ñuts buꞌyis eꞌfeyaꞌ jämꞌtyeꞌ muꞌin oro, judyeyaꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ chimeꞌ yaꞌijtyiꞌyaꞌ quịꞌsiꞌ lino. 9Muꞌin jämꞌtyeꞌ mọꞌ ñuts buꞌyis eꞌfeyaꞌ yirityyaꞌ quịꞌsiꞌ cäts buꞌyi paj qui shupqui vaj meꞌquiꞌyaꞌmun moc̣hadyemꞌ judyeyaꞌ chichimecve därvedyemꞌ, päräꞌ quiꞌtac päräꞌ centimetro mọꞌ. 10Muꞌin yụꞌtacsi vạjpedyeꞌyaꞌ fectidyeꞌ yaꞌijtyiꞌ mij muꞌcheꞌ. Tashchesĉan fectidyeꞌ muꞌyaꞌ mij in sardio, judyeyaꞌ topacio, judyeyaꞌ carbunclo. 11Päräꞌyisĉan fectidyeꞌ muꞌyaꞌ mij in esmeralda judyeyaꞌ zafiro judyeyaꞌ diamante. 12Chibinyisĉan fectidyeꞌ muꞌyaꞌ mij in jacinto judyeyaꞌ ágata judyeyaꞌ amatista. 13Vạjpedyeꞌyisĉan fectidyeꞌ muꞌyaꞌ mij in berilo judyeyaꞌ ónice judyeyaꞌ jaspe. Räj muꞌin yụꞌtac orocheꞌ chat dyebacsi muꞌcheꞌ ñuts buꞌyischeꞌ eꞌfeyaꞌ. 14Muꞌyaꞌ yiriꞌtac päräꞌ jiyi mij in, yirity mij yiritydyety ñuruꞌtyity Israeltyiꞌ vóshiꞌ in. Cäts yirityityijdye tịj Israeltyiꞌ ạvaꞌ muꞌ ĉụiꞌtyiꞌchechej mij sánac tịj muꞌin. Meꞌdye yiriꞌtac päräꞌ jiyi tịj muꞌin sánac yiriꞌtac päräꞌ jiyicheꞌ mij in. Mọꞌin tịj in sánac yirityyaꞌ chịj mijcheꞌ sánaquity.
15Muꞌin jämꞌtacsi mọꞌin cadena buꞌyis oro jeꞌñes minacdyeꞌ. 16Muꞌin jämꞌtacsi päräꞌ coꞌtyity oro mọꞌcheꞌdyes mọꞌ ñuts buꞌyis eꞌfeyaꞌ, chat qui muꞌin quipdyivevej yụꞌtacsi in. 17Muꞌin täyenꞌ buꞌyi yụꞌtacsi päräꞌ cadena oro muꞌinyaꞌ in päräꞌ coꞌtyity in quipdyivevej yụꞌtac mọꞌcheꞌ mọꞌ ñuts buꞌyis eꞌfeyaꞌ. 18Damꞌcheꞌ cadena in muꞌin täyenꞌ buꞌyi yụꞌtacsi orocheꞌ aty yụꞌtac q̂uep buꞌyischeꞌ in, muꞌcheꞌ muꞌ nabactyity eꞌfeyaty. 19Chimeꞌ muꞌin jämꞌtacsi päräꞌ coꞌtyity oro chat yụꞌtacsi úĉan mọꞌ ñuts buꞌyis eꞌfeyaꞌ. Quipdyivevej yụꞌtacsi muꞌin c̣hẹiꞌyaꞌ muꞌ nabactyity quịꞌsiꞌ. 20Muꞌin jämꞌtacsi päräꞌ yoctyiꞌ coꞌtyity oro judyeyaꞌ yụꞌtacsi yóyaꞌdyemꞌ mọꞌ q̂uep buꞌyis yiriꞌyaꞌ muꞌtum muꞌ nabactyity eꞌfeyaty u, c̣hẹiꞌyaꞌ mọꞌ dyebacdyeꞌ judyeyaꞌ ọ́cheꞌ buꞌyiꞌ mọꞌ ñutuꞌsis. 21Muꞌin saptacsi muꞌin coꞌtyity oro in úĉan mọꞌ ñuts buꞌyis eꞌfeyaꞌ yushñutyyaꞌ búmaꞌ muꞌinyaꞌ coꞌtyity oro q̂uep buꞌyischeꞌ yụꞌtac in. Meꞌ yi in paj qui jam turenꞌyi mọꞌ ñuts buꞌyis eꞌfeyaꞌ. Meꞌ buꞌyi yoj yídyemꞌ muꞌ Jenꞌ jajiti muꞌ Moisés jiquej u.
22Muꞌin chịjtyiꞌ p̂anaquity in jämꞌte muꞌ coftyity úĉan buꞌyi yụꞌtac muꞌ nabactyity quịꞌsiꞌ. P̂ante in yudyej búmaꞌ yushñuty. 23Muꞌin jämꞌtyeꞌ yiris jojdojdos chidyiꞌĉanyaꞌ muꞌ coftyity. Chimeꞌ muꞌin yụꞌtyeyete yiris jämꞌchuiꞌsiꞌ jojdojdos paj qui jam shẹiꞌyi muꞌ coftyity. 24Muꞌin jämꞌtacsi miquiꞌmunsiꞌ jeꞌñes sacacdyeꞌ granada in. Muꞌin jämꞌtacsi mọꞌin búmaꞌyaꞌ yushñuty, judyeyaꞌ jäijnäty, judyeyaꞌ jeꞌñety faj. Chat qui muꞌin yụꞌtacsi in vec buꞌyi ĉaptacdyeꞌve muꞌ coftyity. 25Muꞌin jämꞌtacsi miquiꞌmunsiꞌ carpana oro in judyeyaꞌ yụꞌtacsi chidyiꞌĉanyaꞌ muꞌin jeꞌñes sacacdyeꞌ granada vec buꞌyi ĉaptacdyeꞌve muꞌ coftyity. 26Meꞌdyes qui mọꞌin jedyeꞌ in vec buꞌyis in ĉaptacdyeꞌve shupquiꞌ yiris carpana chat yiris jeꞌñes sacacdyeꞌ granada jiꞌcavitis. Meꞌ jịjcaiꞌ in cọtoij buꞌyiꞌ mọꞌ ĉaptacdyeꞌve coftyity. Muꞌin meꞌ jämꞌtacsi in yojdyemꞌ muꞌ Jenꞌ jajiti muꞌ Moisés jiquej u.
27Muꞌin jämꞌtacsi nayaꞌtyity in Aaróndyety judyeyaꞌ ạvadyety muꞌ. Muꞌin chịj jämꞌtety in nayaꞌtyity yaꞌijtyiꞌ quịꞌsiꞌ lino muꞌ. 28Judyeyaꞌ muꞌin chimeꞌ jämꞌtyeꞌ mọꞌ ĉäs buꞌyis yaꞌijtyiꞌ quịꞌsiꞌ lino. Chimeꞌ mọꞌin yocsiꞌ ĉäs buꞌyis in muꞌindyes Aaróntyidyes ạvaꞌ muꞌ, judyeyaꞌ úĉantyiꞌdyety quịꞌsiꞌ jämi yaꞌijtyiꞌ quịꞌsiꞌ lino. 29Muꞌin jämꞌte in muꞌ nayaꞌtyity yaꞌijtyiꞌ quịꞌsiꞌ lino judyeyaꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj. Muꞌin chịj p̂anaquity jämꞌte in cäts yojdyemꞌ muꞌ Jenꞌ jajiti muꞌ Moisés jiquej.
30Muꞌin jämꞌtyeꞌ mọꞌ sánacdyeꞌtumsiꞌ oro ĉästacdyeꞌches judyeyaꞌ mọꞌcheꞌ sáñeꞌ fiyeroyaꞌ yojdyemꞌ yiris cac̣htacdyeꞌ o. Mọꞌ p̂eyacdyeꞌ oroches yiꞌ, "Pạrej Yụꞌtac Jenꞌdyes". 31Chat qui muꞌin saptyeꞌ mọꞌ sánacdyeꞌtumsiꞌ oro ĉästacdyeꞌches búmaꞌ yushñuty ĉäs buꞌyischeꞌ Aarónsiꞌ muꞌ. Meꞌ jämꞌtyeꞌ in cäts yojdyemꞌ muꞌ Jenꞌ jajiti muꞌ Moisés jiquej u.
Ijaij mọꞌ carijtacdyeꞌ Jenꞌsiꞌ acaꞌ tinates muꞌ
32Meꞌ buꞌyi muꞌin ijaij räj mọꞌ carijtacdyeꞌ Jenꞌsiꞌ acaꞌ tinates muꞌ. Muꞌin Israeltyiꞌ vóshiꞌ in jämꞌtacsi räj jedyeꞌ in cäts yojdyemꞌ Jenꞌ jajiti muꞌ Moisés jiquej u. 33Chat qui cạcsi in Moisésyaꞌ räj mọꞌin jedyeꞌ in mọꞌdyes Jenꞌsidyes acaꞌ tinates muꞌ, cạiꞌ in mọꞌ acaꞌ, judyeyaꞌ räj mọꞌĉansiꞌ jedyeꞌ in, judyeyaꞌ mọꞌtyiꞌ tapchuquity quịꞌsiꞌ in, tavara in, roc buꞌyacñis in, p̂otsoꞌvi in, judyeyaꞌ dyäch buꞌyacñis in. 34Chimeꞌ muꞌin cạiꞌ Moisésyaꞌ in mọꞌ fajcheꞌ Jenꞌsiꞌ acaꞌ tinates jämi chivosyaꞌ shoꞌpaꞌ jäijnäs c̣huctacdyeꞌ, judyeyaꞌ mọꞌ yocsiꞌ fajcheꞌ acaꞌ jämi shoꞌpaꞌ mọꞌin marĉansiꞌ jeꞌñes jebaꞌbadyeꞌ in, judyeyaꞌ muꞌ juñum buꞌyity quịꞌsiꞌ. 35Chimeꞌ mọꞌ cajón cạiꞌ in Moisésyaꞌ, mọꞌ cajón yụꞌtacdyeꞌtumsiꞌ p̂eyacdyeꞌ judyeyaꞌ cạquis son mọꞌsiꞌ in judyeyaꞌ änꞌtacdyemꞌ mọꞌsiꞌ. 36Judyeyaꞌ muꞌ mesa judyeyaꞌ räj muꞌsiꞌ jedyeꞌ in judyeyaꞌ muꞌ pan Jenꞌdyety. 37Chimeꞌ cạcsi in Moisésyaꞌ mạijyedyes in judyeyaꞌ mọꞌin ramparina judyeyaꞌ räj yocsiꞌ jedyeꞌ in mạijyedyes in judyeyaꞌ mọꞌ aseijte ramparinadyes. 38Judyeyaꞌ mọꞌ jiꞌcoꞌshayaquis jẹrejres judyeyaꞌ mọꞌ aseijte Jenꞌdyes judyeyaꞌ mọꞌ jẹrejres Jenꞌsiꞌĉandyes acaꞌ muꞌ, judyeyaꞌ muꞌ quịꞌsiꞌ sisdyeꞌyadyety Jenꞌsiꞌ acaꞌ muꞌ. 39Chimeꞌ cạiꞌ Moisésyaꞌ in mọꞌ jiꞌcoꞌshayaquis Jenꞌdyes bronce jämiꞌsiꞌ, judyeyaꞌ mọꞌ yụꞌtacdyes bronce jiꞌcoꞌshayaquisdyes mọꞌ judyeyaꞌ mọꞌsiꞌ cạquis son in judyeyaꞌ räj yocsiꞌ jedyeꞌ mọꞌsiꞌ in. Chimeꞌ muꞌin cạcsi in Moisésyaꞌ jäꞌchäs favtidyes judyeyaꞌ yuj mọꞌ. 40Judyeyaꞌ muꞌ quịꞌsiꞌ naꞌrudyety cọtoij buꞌyi acas mọꞌ, judyeyaꞌ muꞌin p̂otsoꞌvi in judyeyaꞌ dyäch buꞌyacñis in judyeyaꞌ muꞌ quịꞌsiꞌ sisdyeꞌyaty judyeyaꞌ räj mọꞌin soga in judyeyaꞌ muꞌin fiyero saptacdyedyes juñꞌ buꞌyis in jacĉan yụꞌtacsi in, judyeyaꞌ räj mọꞌin jedyeꞌ in yụꞌtac mọꞌĉan Jenꞌsiꞌĉan acaꞌ tinates muꞌ. 41Chimeꞌ muꞌin cạcsi Moisésyaꞌ räj muꞌin quịꞌsiꞌ in muꞌindyety in carijtaquitydyety in muꞌĉan Jenꞌsiꞌĉan acaꞌ tinates muꞌ. Muꞌ quịꞌsiꞌ Aaróndyety judyeyaꞌ ạvadyety muꞌ junꞌsiꞌ chuc muꞌin carijtaqui Jenꞌsiꞌĉan acaꞌ muꞌ.
42Muꞌin Israeltyiꞌ vóshiꞌ in ijaij carijtacdyeꞌ muꞌin, anic chiquepte in Ayoꞌsiꞌ p̂eyacdyeꞌ muꞌ, mọꞌ jasoꞌmitis Moisés jiquej. 43Moisés jämꞌ cạvacsebi carijtacdyeꞌ muꞌin, anic jämꞌ jịꞌcätsepte in Ayoꞌsiꞌ p̂eyacdyeꞌ muꞌ, mọꞌdyes qui muꞌ Moisés cọdyete Jenꞌ paj qui muꞌ ñịbeꞌjeyacsi.
Currently Selected:
Exodo 39: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
