Exodo 28
28
Muꞌ Quịꞌsiꞌ muꞌindyes in Cudyitity Jenꞌcheꞌ in
1Jenꞌ jajiti Moisés:
—Fayete ram muꞌ Aarón, vojity mi, judyeyaꞌ ạvaꞌ muꞌ, Nadab judyeyaꞌ Abihu judyeyaꞌ Eleazar judyeyaꞌ Itamar. Pạrej raꞌ yụꞌtac in, cudyitity yụ́cheꞌ in, meꞌ raꞌ yụꞌtacsi mi. 2Jämꞌtyeyetinte raꞌ quịꞌsiꞌ Aaróndyety muꞌ. Muꞌ quịꞌsiꞌ carijtacdyety Jenꞌsiꞌĉandyety acaꞌ tinates muꞌ. Muꞌ quịꞌsiꞌ anic jämꞌtyiꞌ raꞌ paj qui mujuꞌchaꞌ buꞌyi jayuꞌti muꞌ Aarón. 3Yụ aty soꞌmacsi chị́dyeꞌ pạrej muꞌin jämꞌtety quịꞌsiꞌ in paj qui muꞌin tupuj joꞌmeij jämꞌte in quịꞌsiꞌ Aaróndyety. Chat qui raꞌ muꞌĉan quịꞌsiꞌ cofjiti judyeyaꞌ yụꞌtac muꞌ tashchety cudyitity Jenꞌcheꞌ. 4Muꞌin raꞌ jämꞌtacsi uts quịꞌsiꞌ in: Mọꞌ ñuts buꞌyis eꞌfeyaꞌ judyeyaꞌ muꞌ nabactyity eꞌfeyaty judyeyaꞌ muꞌ coftyity judyeyaꞌ muꞌ nayaꞌtyity judyeyaꞌ mọꞌ ĉäs buꞌyis muꞌ judyeyaꞌ mọꞌ ñutuꞌsis. Muꞌin raꞌ jämꞌtacsi in Jenꞌdyes carijtaquity muꞌindye raꞌ quịꞌsiꞌ jämꞌte in Aaróndyety judyeyaꞌ muꞌtyiꞌ ạvaꞌ muꞌ paj qui muꞌin tupuj carijtaqui yụ́dyes in cudyitity Jenꞌcheꞌ in. 5Muꞌin raꞌ jämꞌtacsi in oro judyeyaꞌ búmaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ yaꞌijtyiꞌ quịꞌsiꞌ lino chimeꞌ.
6Jämꞌte raꞌ mi nabactyity eꞌfeyaty oro judyeyaꞌ búmaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ yaꞌijtyiꞌ quịꞌsiꞌ lino. Paj jämꞌte muꞌ yirity chịj jämꞌtety. 7Mọꞌyaꞌ raꞌ päräꞌ q̂uep buꞌyis muꞌ nabactyitysiꞌ eꞌfeyaty. Bijbicheꞌ raꞌ tyeiꞌ q̂uep buꞌyis in, chat ọĉanyaꞌ vec buꞌban. 8Muꞌ ñutuꞌsis jämi vaj muꞌdye quịꞌsiꞌ nabactyity eꞌfeyaty. Muꞌ raꞌ jämiꞌ orotum judyeyaꞌ búmaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ yaꞌijtyiꞌ quịꞌsiꞌ lino.
9Päräꞌcheꞌ mij yaꞌijtyiꞌ ónice in sánacsebi raꞌ mij tịj muꞌin fiyeroyaꞌ muꞌinsiꞌ Israeltyiꞌ ạvaꞌ muꞌ. 10Muꞌ tashcheꞌ naꞌity tashches tịj yụꞌtac meꞌdye muꞌ jäquity, muꞌinsiꞌ tịj muꞌin tashcheꞌ jäbän naꞌity in yiritycheꞌ mij sánac judyeyaꞌ muꞌinsiꞌ tịj muꞌin jäquiꞌ jäbän naꞌity in yoctyiꞌcheꞌ mij sánac. 11Sánacsevaꞌ räj tịj muꞌin mijcheꞌ fiyeroyaꞌ yojdyemꞌ yirity carijtety yaꞌijtyety mij u jämꞌtyeꞌ yiris cac̣htacdyeꞌ ayos muꞌ. Chat yụꞌtacsi raꞌ muꞌin mij in orocheꞌ jämꞌ buꞌyi yụꞌtac, jam qui jọꞌchaij muꞌ mij. 12Dyebacsi raꞌ mi q̂uep buꞌyischeꞌ nabactyity eꞌfeyatydyety paj qui muꞌ jiꞌdyijvitidyes muꞌin Israeltyidyes vóshiꞌ in. Aarón räjĉan raꞌ bijbicheꞌ cạcsebi tịj muꞌin jiꞌdyijvitidyes muꞌyaꞌ Jenꞌsiꞌyaꞌ vej muꞌ. 13Jämꞌtacsevac jämꞌ buꞌyidyes oro cadena q̂uep buꞌyischeꞌ in. 14Judyeyaꞌ jämꞌtacsi ram päräꞌ cadena oro in jeꞌñes minacdyeꞌ in chat täyenꞌjeyacsi ram mọꞌincheꞌ jämꞌ buꞌyidyeches in.
15Jämꞌtyevac yiris ñuts buꞌyis eꞌfeyaꞌ chị́yacdyes Jenꞌsiꞌ dyijyedyeꞌ muꞌ mọꞌ jämꞌtac yirityyaꞌ chị́jtyiꞌ jämꞌtyeꞌtyiꞌ. Jämꞌtyevaꞌ mọꞌ yódyeiꞌdyemꞌ muꞌ nabactyity eꞌfeyaty u, orotum judyeyaꞌ búmaꞌyaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ yaꞌijtyiꞌ quịꞌsiꞌ lino. 16Jämꞌtyevac mọꞌ ñuts buꞌyis eꞌfeyaꞌ yirity quịꞌsiꞌ ĉats buꞌyi paj qui vaj méquiꞌyaꞌmun shupquiꞌ moc̣hadyemꞌ judyeyaꞌ chichimecve därvedyemꞌ päräꞌ quiꞌtac päräꞌ centimetro mọꞌ. 17Yụꞌtacsi raꞌ mi vạjpedyeꞌ fectidyeꞌ yaꞌijtyiꞌ mij muꞌcheꞌ tashches fectidyeꞌ muꞌyaꞌ raꞌ mij in sárdica judyeyaꞌ topacio judyeyaꞌ carbunclo. 18Päräꞌyisyaꞌ fectidyeꞌ muꞌyaꞌ raꞌ yụꞌtac mij in esmeralda judyeyaꞌ zafiro judyeyaꞌ diamante. 19Chibinyisyaꞌ fectidyeꞌ muꞌyaꞌ raꞌ yụꞌtac mij in jacinto judyeyaꞌ ágata judyeyaꞌ amatista. 20Vạjpedyeꞌyisyaꞌ fectidyeꞌ muꞌyaꞌ raꞌ yụꞌtac mij in berilo judyeyaꞌ ónice judyeyaꞌ jaspe. Yụꞌtacsevac räj muꞌin mij in orocheꞌ chat dyebacsi miꞌin mọꞌcheꞌ buꞌyi ñuts buꞌyischeꞌ eꞌfeyaꞌ. 21Muꞌyaꞌ raꞌ yiriꞌtac päräꞌ jiyi mij in, yirity mij yiritydyety ñuruꞌtyity Israeltyiꞌ vóshiꞌ in, cäts yirityityijdye tịj Israeltyiꞌ ạvaꞌ muꞌ ĉụiꞌtyiꞌchechej mij sánac tịj muꞌin. Meꞌdye yiriꞌtac päräꞌ jiyiꞌ tịj muꞌin sánac yiriꞌtac päräꞌ jiyicheꞌ mij in. Räj tịj sánac mijcheꞌ fiyeroyaꞌ yirityyaꞌ chị́jtyiꞌ.
22Jämꞌtacsevac cadena oro jeꞌñes minacdyeꞌ in mọꞌdyes ñuts buꞌyisdyes eꞌfeyaꞌ. 23Jämꞌtacsevac päräꞌ coꞌtyity oro mọꞌdyes ñuts buꞌyis eꞌfeyaꞌ chat quipdyivevej raꞌ yụꞌtacsi in. 24Täyenꞌ buꞌyiꞌ yụꞌtacsevac mọꞌin päräꞌ cadena oro in päräꞌ coꞌtyityyaꞌ in quipdyivety in mọꞌ ñuts buꞌyisdyesyaꞌ eꞌfeyaꞌ. 25Damꞌcheꞌ mọꞌin cadena in täyenꞌjeyacsevac mọꞌincheꞌ in jämꞌ buꞌyidyescheꞌ in aty yụꞌtac q̂uep buꞌyischeꞌ. 26Jämꞌtacsevac päräꞌ coꞌtyity oro chat qui raꞌ yụꞌtacsi mi úĉan quipdyivevej mọꞌ ñuts buꞌyis eꞌfeyas nabactyitycheꞌ buꞌyi eꞌfeyaty. 27Jämꞌtacseva pärädyety coꞌtyity oroyaꞌ judyeyaꞌ yụꞌtacseva yóyaꞌdyemꞌ mọꞌ q̂uep buꞌyis yiriꞌyaꞌ muꞌtum muꞌ nabactyity eꞌfeyaty u, c̣hẹiꞌyaꞌ mọꞌ dyebacdyeꞌ judyeyaꞌ ọ́cheꞌ buꞌyiꞌ mọꞌ ñutuꞌsis. 28Muꞌin coꞌtyity oro in yụꞌtac úĉan buꞌyi mọꞌ ñuts buꞌyisyaꞌ eꞌfeyaꞌ muꞌin saptac raꞌ yushñutyyaꞌ búmaꞌ muꞌin coꞌtyity oro in yụꞌtac q̂uep buꞌyischeꞌ in paj qui jam turenꞌyiꞌ mọꞌ ñuts buꞌyis eꞌfeyaꞌ.
29Jämꞌdyeyaꞌ muꞌ Aarón sitiyaꞌ mọꞌ Tsäquiꞌsisĉan Vavdyeꞌ muꞌ raꞌ cạcsebi tịj muꞌinsiꞌ Israeltyiꞌ ạvaꞌ ĉojtyiꞌyaꞌ muꞌ mọꞌcheꞌ mọꞌ ñuts buꞌyisyaꞌ eꞌfeyaꞌ chị́yacdyes Jenꞌsiꞌ dyijyedyeꞌ muꞌ. Paj qui räjĉan jiꞌdyijvitidyes shupquiꞌ Jenꞌsiꞌyaꞌ vej muꞌ. 30Bijtacseva muꞌin Urim judyeyaꞌ Tumim mọꞌ ñuts buꞌyisĉan eꞌfeyaꞌ paj qui muꞌin c̣hẹiꞌyaꞌ buꞌyi Aaróntyiꞌyaꞌ ĉojtyiꞌ muꞌ junꞌ chuc siti Jenꞌsiꞌyaꞌ vej muꞌ. Meꞌdyes raꞌ muꞌ Aarón rụijsisyaꞌ dyijyedyeꞌ jéyacsi muꞌin Israeltyiꞌ vóshiꞌ in ĉaĉaij na aty meꞌ yụꞌtac muꞌin c̣hẹiꞌyaꞌ buꞌyi ĉojtyiꞌ muꞌ.
31Jämꞌtinte raꞌ muꞌ coftyity úĉan muꞌ nabactyity quịꞌsiꞌ yudyej yushñuty búmaꞌ. 32Jämꞌtyeyemac yiris jojdojdos chidyiꞌĉanyaꞌ muꞌ coftyity joꞌnodyes. Judyeyaꞌ yụꞌtyeyete ram yiris jämꞌchuiꞌsiꞌ jojdojdos jam qui shẹiꞌjoij muꞌ coftyity. 33Jämꞌtacsevac jeñej buꞌyiꞌ mọꞌ sacacdyeꞌ granada búmaꞌyaꞌ yushñuty judyeyaꞌ jäijnäty judyeyaꞌ jeꞌñety faj. Yụꞌtacsi ram vec buꞌyacñi ĉaptacdyeꞌve muꞌ coftyity judyeyaꞌ yiris raꞌ ñụiꞌ yụꞌtacsi mi mọꞌintum in miquiꞌmunsiꞌtum carpana in. 34Yiris jeꞌñes mọꞌ sacacdyeꞌ granada chat yiris carpana, meꞌ meꞌ raꞌ jịjcaiꞌ in ĉaptacdyeꞌve cọtoij buꞌyi. 35Aarón raꞌ quị́te muꞌ coftyity junꞌsiꞌ chuc raꞌ carijtaqui Jenꞌsiꞌĉan acaꞌ tinates muꞌ. Seꞌvac raꞌ mọꞌin carpana in sitiyaꞌ muꞌ Aarón mọꞌ Tsäquiꞌsis Vavdyeꞌ Jenꞌsiꞌyaꞌ vej muꞌ, judyeyaꞌ seꞌvac raꞌ carpana aty shubanyaꞌ muꞌ, jam qui säñi muꞌ.
36Jämꞌtyevac mọꞌ sánacdyeꞌtumsiꞌ oro ĉästacdyes judyeyaꞌ mọꞌcheꞌ sánac fiyeroyaꞌ yojdyemꞌ yiris cac̣htacdyeꞌ mọꞌ p̂eyacdyeꞌ: "Pạrej Yụꞌtac Jenꞌdyes". 37Mọꞌ sánacdyeꞌtumsiꞌ oro ĉästacdyes tashcheꞌyaꞌ raꞌ saptac yushñutyyaꞌ búmaꞌ mọꞌcheꞌ ĉäs buꞌyischeꞌ muꞌ. 38Mọꞌ raꞌ jáficheꞌ buꞌyiꞌ muꞌ Aarónsiꞌ. Mọꞌ raꞌ shupquiꞌ jịꞌĉocdyes junꞌ chuc jiꞌmeꞌtacdyeꞌ muꞌdyes jụꞌñis ĉụiꞌ jiꞌcoꞌshayacdyeꞌ Jenꞌdyes jam jụijyaꞌ yocsiꞌ tucdyeꞌ Jenꞌdyes muꞌinsiꞌ Israeltyiꞌ vóshiꞌ in. Mọꞌ raꞌ räjĉan jáficheꞌ buꞌyiꞌ muꞌ Aarónsiꞌ paj qui muꞌ Jenꞌ jụjjeyacsebi muꞌinsiꞌ jiꞌcoꞌshayacdyeꞌ jam jụijyaꞌ tucdyeꞌ muꞌin.
39Jämꞌtyemac muꞌ nayaꞌtyity. Yiris raꞌ p̂anacdyeꞌ muꞌ jämꞌtyeyetinte yaꞌijtyiꞌyaꞌ quịꞌsiꞌ lino. Chimeꞌ jämꞌtyevac mọꞌ ĉäs buꞌyis muꞌ jämꞌtyiꞌyaꞌ lino. Mọꞌ ñutuꞌsis jemoñeꞌ jämiꞌ yirityyaꞌ chịj p̂anaquity. 40Jämꞌtacsevac nayaꞌtyity in judyeyaꞌ ñutuꞌsis in judyeyaꞌ ĉäs buꞌyis in muꞌindyes in Aaróntyidyes ạvaꞌ muꞌ paj qui mujuꞌchaꞌ buꞌyi yụꞌtac muꞌin in. 41Aty jịꞌquicsiyaꞌ in Aarón judyeyaꞌ ạvaꞌ muꞌ chat chojjeyacsi in judyeyaꞌ yụꞌtacsi in. Meꞌ buꞌyi raꞌ pạrej yụꞌtac in yụ́dyesiꞌ carijtacdyeꞌ paj qui muꞌin carijtaqui cudyititydyety Jenꞌcheꞌ in.
42Jämꞌtyeyacsevac muꞌindyety úĉantyiꞌ quịꞌsiꞌ in. Muꞌ raꞌ quịꞌsiꞌ tiyacchuti fidyeꞌĉan jäñäcyaꞌ buꞌyi. 43Aarón judyeyaꞌ ạvaꞌ muꞌ jemoñeꞌ cofjiti in muꞌĉan úĉantyiꞌ quịꞌsiꞌ in junꞌsiꞌ ĉụiꞌ siteyaꞌ mọꞌ Jenꞌsiꞌ acaꞌ tinates muꞌ, jam jụijyaꞌ junꞌsi ĉụiꞌ c̣hẹiꞌyaꞌjeꞌ in mọꞌ jiꞌcoꞌshayaquis jẹrejres mọꞌĉan Tsäquiꞌsis Vavdyeꞌ paj qui meꞌjeꞌ in carijtacdyeꞌ muꞌin. Jam meꞌ cofjiti jụijyaꞌ in juchaj raꞌ shupqui muꞌin chat qui raꞌ säñi muꞌin.
Ọij yụꞌtacdyeꞌ jam raꞌ junꞌ mọtsiꞌ Aaróndyes judyeyaꞌ ạvadyes muꞌ judyeyaꞌ vóshidyes muꞌ.
Currently Selected:
Exodo 28: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
