Exodo 29
29
Yụꞌtacsi muꞌin carijtaquity in cudyititydyety Jenꞌcheꞌ in
1Meꞌ raꞌ mi paj qui pạrej buꞌyi yụꞌtacsi mi yụ́dyes carijtaquity in cudyititydyety Jenꞌcheꞌ in. Jecacseva yirity toro banꞌtyity judyeyaꞌ päräꞌ chivo sonꞌ jam jụꞌñity in. 2Judyeyaꞌ jämꞌtinte raꞌ pan jam jiꞌdujraquistumtyiꞌ jämꞌtyiꞌ harina, chimeꞌ jämꞌtacsi ramꞌ yoctyiꞌ pan aseijtetumtyiꞌ judyeyaꞌ yoctyiꞌ pan jeꞌñes galleta fajcheꞌ taiꞌtacsiꞌ aseijteyaꞌ. 3Yụꞌtacseva yirityĉan ụ́buꞌ chat qui raꞌ cạcsi mi ụ́buꞌĉan sisdyeꞌyaꞌ Jenꞌsiꞌĉan acaꞌ tinates muꞌ muꞌintum in muꞌ toro judyeyaꞌ muꞌin päräꞌ chivo sonꞌ in. 4Chat tucsi ram Aarón judyeyaꞌ ạvaꞌ muꞌ sisdyeꞌyaꞌ Jenꞌsiꞌ acaꞌ tinates muꞌ judyeyaꞌ jiꞌdyucsi raꞌ mi. 5Tapjeme muꞌ quịꞌsiꞌ chat qui raꞌ jịꞌquite mi muꞌ Aarón, nayaꞌtyityĉan judyeyaꞌ muꞌ coftyity judyeyaꞌ muꞌ nabactyity eꞌfeyaty judyeyaꞌ mọꞌ ñuts buꞌyis eꞌfeyaꞌ. Judyeyaꞌ muꞌ sapjetyeme muꞌ nabactyity muꞌ eꞌfeyaty mọꞌyaꞌdye mọꞌ ñutuꞌsisyaꞌ. 6Yụꞌtyeyeme ĉäs buꞌyis joꞌnoꞌcheꞌ muꞌ judyeyaꞌ mọꞌ sánacdyeꞌtumsiꞌ oro ĉästacdyeꞌches jáficheꞌ muꞌ. 7Jecvaꞌ mọꞌ chojjeyacdyes aseijte yụꞌtacdyedyes chat mọꞌyaꞌ chojjeme mọꞌ joꞌnoꞌcheꞌ muꞌ Aarón joꞌmesyaꞌ raꞌ aty yụꞌtac muꞌ. 8Tucsi ramꞌ Aaróntyiꞌ ạvaꞌ muꞌ chat jịꞌquicsi mi muꞌĉan nayaꞌtyityĉan quịꞌsiꞌ in. 9Judyeyaꞌ yụꞌtyeyacseva ĉäs buꞌyis joꞌnoꞌcheꞌ muꞌin. Chat saptyeyeyacsi qui raꞌ mi ñutuꞌsis muꞌin Aarón judyeyaꞌ ạvaꞌ muꞌ. Meꞌ buꞌyiꞌ raꞌ mọꞌ carijtacdyeꞌ cudyititydyety Jenꞌcheꞌ räjĉan. Joꞌmesyaꞌ raꞌ mi yụꞌtacsi Aarón judyeyaꞌ ạvaꞌ muꞌ.
10Tute ram muꞌ toro sisdyeꞌyaꞌ mọꞌ Jenꞌsiꞌ acaꞌ tinates muꞌ judyeyaꞌ Aarón judyeyaꞌ ạvaꞌ muꞌ yụꞌtaqui raꞌ un muꞌin joꞌnoꞌcheꞌ muꞌ toro. 11Chat ijate ram muꞌ toro muꞌyaꞌ sisdyeꞌyaꞌ Jenꞌsiꞌyaꞌ acaꞌ tinates muꞌ, Jenꞌsiꞌyaꞌ vej muꞌ. 12Jecbite ramꞌ damꞌ chäsh toros muꞌ chat yụꞌtyeꞌ raꞌ mi chaꞌrarascheꞌ in jiꞌcoꞌshayaquis Jenꞌdyes mọꞌ. C̣hirijriyaꞌ raꞌ taiꞌtacsiꞌ mi. Chat chojjeꞌ mi mọꞌ jiꞌshucdyidyeꞌ chäsh yujyaꞌ mọꞌ jiꞌcoꞌshayaquis Jenꞌdyes. 13Jequeꞌ raꞌ mi räj mọꞌ chädyeꞌ voꞌcoĉansiꞌ judyeyaꞌ fajches mọꞌ nácaty judyeyaꞌ pärenꞌdye caꞌidyeꞌ in chädyeꞌtumdye in, chat qui raꞌ mọꞌ jiꞌcoꞌshayacsi mi jiꞌcoꞌshayaquischeꞌ. 14Mọꞌ toros shush muꞌ judyeyaꞌ shoꞌpaꞌ muꞌ judyeyaꞌ voꞌco muꞌ jemoñeꞌ räj jiꞌcoꞌshayac jorojyaꞌ mọꞌ dyäquedyeꞌ. Mọꞌ shupquiꞌ mọꞌ jiꞌcoꞌshayacdyeꞌ juchadyes.
15Jecte ramꞌ yirity chivo sonꞌ judyeyaꞌ Aarón judyeyaꞌ ạvaꞌ muꞌ yụꞌtaqui raꞌ un muꞌin muꞌsiꞌcheꞌ joꞌnoꞌ. 16Ijate ram judyeyaꞌ damꞌ jäcbite mi chäsh muꞌ judyeyaꞌ fatsujjeꞌ mi mọꞌ jiꞌcoꞌshayaquischeꞌ räjcheꞌ mọꞌin vạjpedyeꞌcheꞌ naꞌru in. 17Tajtinte raꞌ muꞌ chivo judyeyaꞌ favbitinte yuj muꞌ judyeyaꞌ voꞌcoĉan. Chat raꞌ yụꞌtacsi miꞌin joꞌnoꞌtumdye jiꞌcoꞌshayaquischeꞌ. 18Jiꞌcoꞌshayac raꞌ räj muꞌ chivo jiꞌcoꞌshayaquischeꞌ. Mọꞌ shupquiꞌ p̂udaij jiꞌtyeꞌsiꞌ jiꞌcoꞌshayacdyeꞌ, mọꞌ jämꞌ jẹrejreiꞌsiꞌ Jenꞌdyes. Ọij jiꞌcoꞌshayacdyeꞌ jemoñeꞌ tŝijcheꞌ soꞌmac Jenꞌ.
19Jecte ram muꞌ yoctyiꞌ chivo sonꞌ, chat qui raꞌ Aarón judyeyaꞌ ạvaꞌ muꞌ yụꞌtaqui un muꞌin joꞌnoꞌcheꞌ muꞌ. 20Ijate ram muꞌ chivo chat qui raꞌ damꞌ jecbite chäsh muꞌ chat taiꞌjeyacsebi mi chun chäshyaꞌ tacvesyaꞌ judyeyaꞌ jäbäj yujches muꞌin judyeyaꞌ unches muꞌin. Chat qui raꞌ fatsujjeꞌ mi chäsh jiꞌcoꞌshayaquischeꞌ räjcheꞌ mọꞌin vạjpedyeꞌ naꞌru in. 21Judyeyaꞌ jeĉan raꞌ mi damꞌ chäsh jiꞌcoꞌshayaquisches judyeyaꞌ damꞌ mọꞌ taiꞌjeyacdyes aseijte yụꞌtacdyes judyeyaꞌ pärenꞌ in fatsujjeyacsi mi Aaróncheꞌ judyeyaꞌ quịꞌsiꞌcheꞌ muꞌ judyeyaꞌ ạvaꞌcheꞌ muꞌ judyeyaꞌ quịꞌsiꞌcheꞌ muꞌin. Chat qui muꞌ Aarón judyeyaꞌ ạvaꞌ muꞌ judyeyaꞌ quịꞌsiꞌ muꞌin raꞌ pạrej buꞌyi yụꞌtac in yụ́dyes carijtaqui in.
22Jequeꞌ ram mọꞌ chädyeꞌ chivos muꞌ judyeyaꞌ mọꞌ chäiꞌsiꞌ cọ́di muꞌ judyeyaꞌ mọꞌ chädyeꞌ voꞌcoĉansiꞌ muꞌ judyeyaꞌ mọꞌ chädyeꞌ fajches nácaty judyeyaꞌ mọꞌin caꞌidyeꞌ in chädyeꞌtumsiꞌ judyeyaꞌ mọꞌ jäñäc tacves muꞌ. (Uts nash muꞌ chivo sonꞌ jịꞌĉoiꞌtyiꞌ muꞌinsiꞌ yụꞌtacdyeꞌ Jenꞌdyes.) 23Jecte ramꞌ yirity pan judyeyaꞌ yirity yoctyiꞌ pan aseijtetumtyiꞌ judyeyaꞌ yiris jeꞌñes galleta ụ́buꞌĉantyiꞌ pan jam jiꞌdujraquistumtyiꞌ in aty yụꞌtactyiꞌ jiquej Jenꞌsiꞌyaꞌ vej muꞌ. 24Chat soꞌmacsi ram Aarón judyeyaꞌ ạvaꞌ muꞌ muꞌin jecactyiꞌ pan in chat raꞌ cheꞌcheꞌjete unĉan muꞌin Jenꞌsiꞌyaꞌ vej muꞌ. Chat qui raꞌ meꞌ shupquiꞌ mọꞌ cheꞌcheꞌjeyacdyeꞌ tucdyeꞌ Jenꞌdyes muꞌ. 25Chat jectyetacseban pan in unĉantyiꞌ muꞌin judyeyaꞌ jiꞌcoꞌshayacsi muꞌin pan mọꞌtum mọꞌ p̂udaij jiꞌtyeꞌsiꞌ jiꞌcoꞌshayacdyeꞌ aty yụꞌtac paj qui jämꞌ jẹrejreꞌi Jenꞌdyes. Ọij jiꞌcoꞌshayacdyeꞌ jemoñeꞌ tŝijcheꞌ soꞌmac Jenꞌ. 26Muꞌdye raꞌ chivo jịꞌĉoiꞌtyiꞌ junꞌ chuc aty yụꞌtac Jenꞌdyes muꞌ Aarón. Jecvaꞌ mọꞌ shush eꞌfeches chivos muꞌ chat raꞌ cheꞌcheꞌjeꞌ mi mọꞌ Jenꞌsiꞌyaꞌ vej muꞌ, chat qui raꞌ mọꞌ shush muꞌindyes shupquiꞌ säcsedyedyes muꞌin.
27Pạrej buꞌyiꞌ raꞌ yụꞌtyeꞌ mi mọꞌ shush chivos muꞌ muꞌindyes in Aaróndyes judyeyaꞌ ạvadyes muꞌ. Mọꞌ eꞌfeches shush cheꞌcheꞌjeyacsiꞌ jiquej judyeyaꞌ chimeꞌ mọꞌ jäñäc cheꞌcheꞌjeyacsiꞌ jiquej muꞌindyes shupquiꞌ. 28Aarón judyeyaꞌ ạvaꞌ muꞌ räjĉan raꞌ ĉụiꞌdyes jequeꞌ in jiꞌchetacdyeꞌ shush chivos muꞌ jämꞌdyeyaꞌ muꞌin Israeltyiꞌ vóshiꞌ in soꞌmeteyaꞌ Jenꞌ in jämꞌjitidyes tucdyeꞌ in.
29Muꞌ quịꞌsiꞌ Aaróntyiꞌ muꞌ yódyeĉandye cofjiti u muꞌ yụꞌtacyaꞌ carijtacdyeꞌĉan Jenꞌdyes. Säñiyaꞌ qui muꞌ Aarón jiꞌjiyaqui raꞌ quịꞌsiꞌ ạvaꞌ muꞌ yụꞌtactyiꞌ raꞌ tashchety cudyititydyety Jenꞌcheꞌ. Chat säñiyaꞌ muꞌ, muꞌ qui raꞌ quịꞌsiꞌ jiꞌjiyaqui muꞌ ạvaꞌ muꞌ yụꞌtactyiꞌ muꞌ paj qui muꞌ carijtaqui tashchety cudyitity Jenꞌcheꞌ. Meꞌ raꞌ jịjcaij vóshiꞌyaꞌ Aaróntyiꞌyaꞌ muꞌ jiꞌjibite in quịꞌsiꞌ muꞌ räjĉan. 30Jämꞌdyeyaꞌ muꞌyaꞌ yirity Aaróntyiꞌ vóshiꞌ muꞌ yụꞌtacyaꞌ tashchety cudyitity Jenꞌcheꞌ, muꞌ yụꞌtactyiꞌ raꞌ cofjiti Aaróntyiꞌĉan quịꞌsiꞌ muꞌ mọꞌ tashches simana yoquiꞌdyemꞌ yụꞌtac muꞌ carijtacdyeꞌĉan u. Yävätidyeꞌ raꞌ mạyedyeꞌ Aaróntyiꞌĉan quịꞌsiꞌ carijtaqui muꞌ raꞌ meꞌjeꞌ räj Jenꞌsiꞌ dyijyedyeꞌ muꞌ paj qui yụꞌtac tashchety cudyitity Jenꞌcheꞌ muꞌ.
31Sancochajjepte raꞌ mi shush chivos muꞌ yirisyaꞌ vav meꞌdyes mọmoꞌ yụꞌtac. 32Chat qui raꞌ muꞌ Aarón judyeyaꞌ ạvaꞌ muꞌ jebeiꞌ raꞌ in mọꞌ shush muꞌtum pan ụ́buꞌĉantyiꞌtum. Muꞌyaꞌ raꞌ jebeiꞌ in sisdyeꞌyaꞌ Jenꞌsiꞌ acaꞌ tinates muꞌ. 33Muꞌin mọmoꞌ tupuj jebeiꞌ in mọꞌ säcsedyeꞌ ĉaĉaij na mọꞌin tucdyeꞌ in busjeyacdyes juchaj muꞌin judyeyaꞌ jịꞌĉoiꞌ junꞌ chuc aty yụꞌtac Jenꞌsidyes carijtacdyeꞌ muꞌ. Jam tyi yoctyiꞌ tupuj jebeiꞌ mọꞌ säcsedyeꞌ ĉaĉaij na muꞌindyes mọmoꞌ in. 34Mọꞌyaꞌ jụijyaꞌ jiꞌshucdyis mọꞌ säcsedyeꞌ nojno mạyedyeꞌ muꞌin jemoñeꞌ jiꞌcoꞌshayeꞌ in. Jam raꞌ junꞌ jebeban in ĉaĉaij na aty jam rụijsis dyijyedyeꞌ shupquiꞌ Jenꞌsiꞌyaꞌ vej muꞌ paj qui yocsiꞌĉan mạyedyeꞌ jebebanyaꞌ in.
35Anic raꞌ meꞌjeꞌ mi räj yoj jeyedyemꞌ yụ u Aaróntum judyeyaꞌ ạvaꞌtum muꞌ. Yävätidyeꞌ raꞌ mạyedyeꞌ jịꞌcätsibutim yụꞌtacdyeꞌ yụ. 36Cäts raꞌ yävätidyeꞌ mạyedyeꞌ jịjcaiꞌsiꞌ jemoñeꞌ jiꞌcoꞌshayetinte yirity toro busjeyacdyes juchaj. Ọij nash mọꞌ jiꞌcoꞌshayacdyeꞌ juchadyes. Chimeꞌ raꞌ jämꞌ yụꞌtiñeꞌ mọꞌ jiꞌcoꞌshayaquis Jenꞌdyes. 37Mọꞌin yävätidyeꞌĉan mạyedyeꞌ in cäts mạyedyeꞌ jịjcaiꞌ jämꞌyụꞌtiñeꞌ raꞌ mọꞌ jiꞌcoꞌshayaquis Jenꞌdyes meꞌdyemꞌ raꞌ pạrej yụꞌtyeꞌ Jenꞌdyes mọꞌ. Chat qui raꞌ mọꞌ jiꞌcoꞌshayaquis Jenꞌdyes anic raꞌ jiyiꞌ jämꞌ buꞌyiꞌ yụꞌtac Jenꞌdyes. Jedyeꞌ ĉụiꞌ tocoꞌjeꞌyaꞌ mọꞌ jiꞌcoꞌshayaquisches Jenꞌdyes chimeꞌ raꞌ jämꞌ buꞌyiꞌ yụꞌtac.
Mọꞌin jiꞌcoꞌshayacdyes räjdyes mạyedyeꞌ
38Räjĉan raꞌ cäts mạyedyeꞌ jịjcaiꞌsiꞌ jiꞌcoꞌshayacsi ram päräꞌ banꞌmuntyiꞌ oveca in, yiris yómodyeꞌyity in. 39Yirity raꞌ jiꞌcoꞌshayetem pamꞌ judyeyaꞌ yoctyiꞌ yómoꞌ. 40Pamꞌ raꞌ jiꞌcoꞌshayete mi muꞌ oveca päräꞌtum ritro harina judyeyaꞌ yiris ritro aseijte orivos judyeyaꞌ yiris ritro vino. Mọꞌ vino shupquiꞌ mọꞌ tucdyeꞌ Jenꞌdyes. 41Yómoꞌ raꞌ jiꞌcoꞌshayete mi muꞌ yoctyiꞌ oveca vaj cäts yojdyeꞌ mọꞌ pamꞌsiꞌ jiꞌcoꞌshayacdyeꞌ o, mọꞌintum tucdyeꞌ harina judyeyaꞌ tucdyeꞌ vino. Ọij jiꞌcoꞌshayacdyeꞌ jämꞌ jẹrejreiꞌsiꞌ Jenꞌyaꞌ, tŝijcheꞌ raꞌ soꞌmetinte muꞌ Jenꞌ.
42Räjĉan raꞌ meꞌ jiꞌcoꞌshayaqui miꞌin Jenꞌsiꞌyaꞌ vej muꞌ mọꞌyaꞌ sisdyeꞌyaꞌ Jenꞌsiꞌ acaꞌ tinates muꞌ. Chat qui raꞌ yụ rébeyac muꞌyaꞌ judyeyaꞌ p̂eyeyac. 43Chimeꞌ raꞌ yụ rébacsi muꞌin Israeltyiꞌ vóshiꞌ in, judyeyaꞌ yóyaꞌdyemꞌ rébeyacyaꞌ yụ u, mọꞌyaꞌ raꞌ jämꞌsiꞌ buꞌyiꞌ yụꞌtac mọꞌ vav. Yụ raꞌ tsäquiꞌ buꞌyiꞌ yụꞌtyeꞌ mọꞌ vav ĉụiꞌsiꞌyaꞌ jämꞌyedyeꞌ yụ.
44Yụ raꞌ jämꞌ buꞌyiꞌ yụꞌtyeꞌ mọꞌ Jenꞌsiꞌ acaꞌ tinates muꞌ judyeyaꞌ mọꞌ jiꞌcoꞌshayaquis judyeyaꞌ Aarón judyeyaꞌ ạvaꞌ muꞌ paj qui muꞌin carijtaqui yụ́dyes in cudyititydyety Jenꞌcheꞌ. 45Chat qui raꞌ yụ bäꞌyi muꞌintum Israeltyiꞌtum vóshiꞌ in judyeyaꞌ yụ raꞌ muꞌintyiꞌ Jenꞌ buꞌyi. 46Muꞌin raꞌ anic chịj in junꞌ chuc yụ Jenꞌ Ayoꞌ muꞌin, muꞌdye jiꞌc̣honactyiꞌ Egiptoĉan jiquej paj qui yụ muꞌintum bäꞌyi. Yụ nash Ayoꞌ, Jenꞌ muꞌin.
Currently Selected:
Exodo 29: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
