Exodo 27
27
Mọꞌ Jiꞌcoꞌshayaquis Bronce
1Chimeꞌdye jämꞌtiñeꞌ raꞌ miꞌin jiꞌcoꞌshayaquis Jenꞌdyes, son acacia jämꞌtiñeꞌ. Meꞌquis raꞌ jämꞌtiñeꞌ mọꞌ, vaj meꞌquiꞌyaꞌmun moc̣hadyemꞌ judyeyaꞌ därvedyemꞌ, päräꞌ metro päräꞌ quiꞌtac ĉanamꞌ jiyiꞌ centimetro judyeyaꞌ yiris metro päräꞌ quiꞌtac ĉanamꞌ jiyiꞌ centimetro moc̣hedyemꞌ, meꞌquiꞌ raꞌ jämꞌtiñeꞌ mọꞌ jiꞌcoꞌshayaquis Jenꞌdyes. 2Chaꞌraiꞌ raꞌ jämi, fajcheꞌ raꞌ jämꞌtac dochtiꞌve. Mọꞌ chaꞌraras mọꞌ jemoñeꞌ mọꞌcheꞌ buꞌyidye son jämiꞌ. Fajcheꞌ raꞌ tyeij broncemꞌ, räj mọꞌ jiꞌcoꞌshayaquis Jenꞌdyes. 3Judyeyaꞌ jämꞌtacsi ram tạꞌdyity in jecacdyes chim judyeyaꞌ jedacdyeꞌ in judyeyaꞌ jäꞌchäs in judyeyaꞌ tenedor in judyeyaꞌ pijiꞌ in, räj mọꞌin jedyeꞌ in jiꞌcoꞌshayaquis Jenꞌdyes in bronce raꞌ jämꞌtacsi mi. 4Jämꞌtyevac yiris yụꞌtacdyes mọꞌ jiꞌcoꞌshayaquisdyes bronce. Mọꞌ raꞌ sacvas bronce jäꞌmis. Chat qui jämꞌtacsevac vạjpedyeꞌ coꞌtyity in quipdyiveveyaꞌ mọꞌ. 5Yụꞌtyevaꞌ mọꞌ yụꞌtacdyes mọꞌ jiꞌcoꞌshayaquis Jenꞌdyes ọĉan mọꞌ jämꞌchuiꞌsiꞌ mọꞌ jiꞌcoꞌshayaquis Jenꞌdyes chidyiꞌĉanyaꞌ yụꞌtacsiꞌ. 6Jämꞌtacsevaꞌ cạquis son in jiꞌcoꞌshayacdyes son acacia chimeꞌ raꞌ fajcheꞌ tyeij broncemꞌ. 7Mọꞌin son in yụꞌtac raꞌ coꞌtyityĉan in jorojyaꞌ mọꞌ jiꞌcoꞌshayaquis Jenꞌdyes pärenꞌve yụꞌtac paj qui tupuj cạiꞌ in. 8Jämꞌtiñeꞌ ramꞌ mọꞌ jiꞌcoꞌshayaquis Jenꞌdyes jojdoij raꞌ mọꞌ tavara jämiꞌ. Jämꞌtyevac mọꞌ cäts yódyeiꞌdyemꞌ jiꞌcaveyeyes u mụcuꞌcheꞌ jiquej.
Mọꞌ p̂ejyaꞌ cọtoij buꞌyis Jenꞌsiꞌ acaꞌ tinates muꞌ
9Jämꞌtyevac yiris p̂ejyaꞌ cọtoij buꞌyis Jenꞌsiꞌ acaꞌ tinates muꞌ. Mọꞌ naꞌru jätisves vạjpedyeꞌ quiꞌtac vạjpedyeꞌ metro moc̣hadyemꞌ, jämꞌtac yaꞌijtyiꞌyaꞌ quịꞌsiꞌ lino muꞌ. 10Muꞌyaꞌ raꞌ päräꞌ quiꞌtac p̂otsoꞌvi in fajcheꞌ päräꞌ quiꞌtac dyäch buꞌyacñis broncemꞌ judyeyaꞌ mọꞌintum pan chụiꞌsiꞌ fiyero p̂otsoꞌviches in. 11Mọꞌ naꞌru mọꞌve rocves vạjpedyeꞌ quiꞌtac vạjpedyeꞌ metro moc̣hadyemꞌ, jämꞌtac yaꞌijtyiꞌyaꞌ quịꞌsiꞌ lino muꞌ. Muꞌintum päräꞌ quiꞌtac p̂otsoꞌvi in judyeyaꞌ päräꞌ quiꞌtac dyäch buꞌyacñis bronce in judyeyaꞌ vij buꞌyacñis plata p̂otsoꞌviches in judyeyaꞌ mọꞌin pan chụiꞌsiꞌ p̂otsoꞌvicheꞌ.
12Mọꞌ naꞌru jịjcaijcheꞌ tsun päräꞌ quiꞌtac päräꞌ metro moc̣hadyemꞌ muꞌintum yiriꞌtac p̂otsoꞌvi in judyeyaꞌ yiriꞌtac dyäch buꞌyacñis bronce in. 13Mọꞌ naꞌru shupquive tsun päräꞌ quiꞌtac päräꞌ metro moc̣hadyemꞌ. 14Mọꞌ naꞌru tacves mọꞌ sisdyeꞌyaꞌ jäbän metro choc moc̣hadyemꞌ chibin p̂otsoꞌvi mọꞌ judyeyaꞌ chibin dyäch buꞌyacñis bronce mọꞌ. 15Judyeyaꞌ mọꞌ naꞌru q̂uimves mọꞌ sisdyeꞌ vaj cäts buꞌyiꞌ raꞌ mọꞌ. Jäbän metro choc moc̣hadyemꞌ chibintum p̂otsoꞌvi in judyeyaꞌ chibin dyäch buꞌyacñis bronce mọꞌ.
16Mọꞌ sisdyeꞌ p̂ejyaꞌ mọꞌ Jenꞌsiꞌ acaꞌ tinates muꞌ jämꞌtiñeꞌ ramꞌ quịꞌsiꞌ. Muꞌ quịꞌsiꞌ jämi búmaꞌ yushñuty judyeyaꞌ jäijnäty judyeyaꞌ jeꞌñety faj judyeyaꞌ yaꞌijtyiꞌ quịꞌsiꞌ lino chimeꞌ. Jämꞌtac yirityyaꞌ chịj p̂anaquity. Mọꞌ sisdyeꞌ muꞌyaꞌ raꞌ vạjpedyeꞌ p̂otsoꞌvi in judyeyaꞌ vạjpedyeꞌ dyäch buꞌyacñis bronce mọꞌ. 17Räj muꞌin p̂otsoꞌvi in naꞌruty in meꞌchuiꞌ raꞌ in vij buꞌyacñis plata in judyeyaꞌ pan chụiꞌsiꞌ plata judyeyaꞌ dyäch buꞌyacñis bronce in. 18Mọꞌ p̂ejyaꞌ mọꞌ Jenꞌsiꞌ acaꞌ tinates muꞌ vạjpedyeꞌ quiꞌtac vạjpedyeꞌ metro moc̣hadyemꞌ, judyeyaꞌ päräꞌ quiꞌtac päräꞌ metro därvedyemꞌ muꞌtum naꞌru quịꞌsiꞌ jämꞌtyiꞌ lino päräꞌ metro chibin quiꞌtac centimetro moc̣hedyemꞌ naꞌrusiꞌ. Mọꞌtum dyäch buꞌyacñis bronce in. 19Jedyeꞌ ĉụiꞌ damꞌdye yocsiꞌ jämꞌtacsi muꞌin mọꞌdyes Jenꞌsidyes acaꞌ tinates muꞌ bronceyaꞌ mọꞌ jämi. Jedyeꞌ ĉụiꞌ damꞌdye jemontiñes miꞌin fiyero jacĉan yụꞌtacdyes saptacdyedyes juñꞌ buꞌyis in mọꞌ Jenꞌsiꞌ acaꞌ tinates muꞌ, jam jụijyaꞌ naꞌrudyes muꞌ, jemoñeꞌ räj joꞌmes bronce jämiꞌ in.
Mọꞌ aseijte ramparinadyes
20Jéyacseva muꞌin Israeltyiꞌ vóshiꞌ in paj qui tuiꞌ in aseijte chinsiꞌ orivos mọꞌ cac̣hac jäꞌmiiꞌsiꞌ, paj qui raꞌ yejĉoiꞌ mạijyiꞌ mọꞌin ramparina in mạijyedyesches Jenꞌsiꞌĉan acaꞌ tinates muꞌ. 21Mọꞌĉan Jenꞌsiꞌ acaꞌ tinates muꞌ jorojyaꞌ muꞌ juñum buꞌyity quịꞌsiꞌ yóĉandyemꞌ mọꞌ cajón yụꞌtacdyetumsiꞌ o muꞌ Aarón judyeyaꞌ ạvaꞌ muꞌ jemoñeꞌ ĉọjcacsi ramparina in mạijyedyescheꞌ Jenꞌsiꞌĉan acaꞌ tinates muꞌ paj qui mạijyiꞌ in Jenꞌsiꞌyaꞌ vej muꞌ tiyacchutiꞌ shocam meꞌdye nạijjoij. Ọij nash yiris yụꞌtacdyeꞌ räjĉandyessiꞌ muꞌindyes in Israeltyidyes vóshiꞌ in jam mọtsis.
Currently Selected:
Exodo 27: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
