Exodo 26
26
Jenꞌsiꞌ acaꞌ muꞌ
1Jämꞌtyevac mọꞌ Jenꞌsiꞌ acaꞌ muꞌ tinates yiriꞌtacyaꞌ cäch quịꞌsiꞌ jämꞌtyiꞌ lino. Muꞌin quịꞌsiꞌ in p̂anacdyeꞌ búmaꞌ; yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ yaꞌijtyiꞌ quịꞌsiꞌ lino chimeꞌ. Muꞌincheꞌ jämꞌtiñeꞌ raꞌ shásha querubin buꞌyi. 2Räj muꞌin yiriꞌtac quịꞌsiꞌ vaj meꞌquiꞌyaꞌmun tuputucdyemꞌ; yiriꞌtac päräꞌ jiyi metro moc̣hadyemꞌ judyeyaꞌ päräꞌ metro därvedyemꞌ. 3Cächtacsi ram ĉanamꞌ quịꞌsiꞌ in paj qui yiritymuntyity shupqui. Chimeꞌ muꞌin yoctyiꞌ ĉanamꞌ quịꞌsiꞌ in cächtacsi ram paj qui yoctyiꞌmuntyity shupqui. 4Dyebacseva yushñutyyaꞌ quịꞌsiꞌ fodoiꞌtacdyeꞌ yụꞌtyeyacseva tätscäiꞌve yiritymuntyity quịꞌsiꞌ muꞌ. 5Dyebacseva ĉanamꞌ quiꞌtac fodoiꞌtacdyeꞌ quịꞌsidyes in yiritymuntyity quịꞌsiꞌ judyeyaꞌ chiĉanamꞌ quiꞌtacdye tätscäiꞌve muꞌ yoctyiꞌmuntyiꞌ quịꞌsiꞌ. Muꞌin fodoiꞌtacdyeꞌtumtyiꞌ quịꞌsiꞌ in tätscäiꞌve yiritymuntyity quịꞌsiꞌ rep buꞌyi muꞌin fodoiꞌtacdyeꞌtumtyiꞌ quịꞌsiꞌ in tätscäiꞌve muꞌ yoctyiꞌtum muntyity quịꞌsiꞌ. 6Jämꞌtacseva ĉanamꞌ quiꞌtac vij buꞌyacñis quịꞌsiꞌ oro chat cächjeyacseva muꞌin päräꞌmuntyity quịꞌsiꞌ in paj qui yiritymuntyity shupqui muꞌ quịꞌsiꞌ.
7Jämꞌtacsevac yiriꞌtac yirity quịꞌsiꞌ in chivos fin muꞌ paj qui fajcheꞌ yụꞌtac in Jenꞌsiꞌcheꞌ acaꞌ tinates muꞌ. 8Räj muꞌin quịꞌsiꞌ chivos fin muꞌ vaj meij quiꞌyaꞌmun tuputucdyemꞌ; yiriꞌtac chibin jiyi metro moc̣hadyemꞌ judyeyaꞌ päräꞌ metro därvedyemꞌ. 9Cächtacsi ram ĉanamꞌ quịꞌsiꞌ chivos fin muꞌ paj qui yiritymuntyity shupqui muꞌ. Judyeyaꞌ cächtacsi ram muꞌin yoctyiꞌ jäbän quịꞌsiꞌ chivos fin muꞌ paj qui yoctyiꞌmuntyity shupqui. Ĉatsjeme muꞌ jäbänyity quịꞌsiꞌ sisdyeꞌyaꞌ Jenꞌsiꞌ acaꞌ tinates muꞌ. 10Jämꞌtacsevac ĉanamꞌ quiꞌtac fodoiꞌtacdyeꞌtumtyiꞌ quịꞌsiꞌ tätscäiꞌve yiritymuntyity quịꞌsiꞌ chivos fin muꞌ judyeyaꞌ chimeꞌ jämꞌtacsi ramꞌ ĉanamꞌ quiꞌtac fodoiꞌtacdyeꞌtumtyiꞌ quịꞌsiꞌ in tätscäiꞌve muꞌ yoctyiꞌmuntyity quịꞌsiꞌ chivos fin muꞌ. 11Jämꞌtacsevac ĉanamꞌ quiꞌtac vij buꞌyacñis quịꞌsidyety bronce chat cächjeyacsi raꞌ muꞌin päräꞌmuntyity quịꞌsiꞌ chivos fin muꞌ paj qui yirity buꞌyi shupqui muꞌ quịꞌsiꞌ. 12Muꞌ damꞌdyety quịꞌsiꞌ jiyity muꞌ choc därvedyemꞌ yirity quịꞌsiꞌ jiꞌshucdyidyeꞌ mụijyaꞌ raꞌ tŝọij muꞌ dyiꞌve Jenꞌsiꞌ acaꞌ tinates muꞌ. 13Muꞌin quịꞌsiꞌ in, chivos fin muꞌ, choc metro moc̣haꞌ raꞌ shupqui in pärenꞌve in Jenꞌsiꞌ acaꞌ tinates muꞌ. Mọꞌ jiꞌshucdyidyety quịꞌsiꞌ dadamꞌ raꞌ moc̣haꞌ tŝọij tyuj buꞌyi in paj qui jämꞌ busbite in Jenꞌsiꞌ acaꞌ tinates muꞌ. 14Jämꞌte ramꞌ yirity p̂urꞌchuiꞌtyity chivos shoꞌpaꞌ jäijnäsyaꞌ c̣huctacsiꞌ chat qui raꞌ fajcheꞌ yụꞌtyeꞌ mi mọꞌ ọĉan qui quịꞌsiꞌ chivos fin muꞌ, chimeꞌ jämꞌtyeꞌ ramꞌ yocsiꞌ buschuiꞌsiꞌ shoꞌpaꞌ mọꞌinsiꞌyaꞌ in marĉansiꞌ jeꞌñes jebaꞌbadyeꞌ in, chat qui raꞌ fajcheꞌ yụꞌtyeꞌ mi bus buꞌyis jäꞌmiiꞌsiꞌ in chivosyaꞌ shoꞌpaꞌ in.
15Jämꞌtacsevac tavara in, son acacia, chat quich buꞌyi yụꞌtacsim mọꞌĉan Jenꞌsiꞌĉan acaꞌ tinates muꞌ. 16Cäts yirisisij tavara in moc̣hadyemꞌ vạjpedyeꞌ metro choc jịjcaiꞌ in judyeyaꞌ därvedyemꞌ jäbän quiꞌtac jäbän jiyi centimetro in. 17Räj tavara in yujve raꞌ päräꞌ yuj mọꞌin. Jämꞌtacsevac räj tavara in joꞌmeiꞌ yujtutum in. 18Jämꞌtacsevac päräꞌ quiꞌtac tavara in mọꞌvedyes jätisve buꞌyis Jenꞌsiꞌ acaꞌ tinates muꞌ. 19Chimeꞌ jämꞌtacsi raꞌ mi vạjpedyeꞌ quiꞌtac dyäch buꞌyacñis in plata raꞌ. Päräꞌ dyäch buꞌyacñis in yirisdyes tavara, yiris dyäch buꞌyacñis yirisdyes yuj tavaras. 20Chimeꞌ yocve rocve Jenꞌsiꞌ acaꞌ tinates muꞌ jämꞌtacsi ramꞌ päräꞌ quiꞌtac tavara in, 21judyeyaꞌ vạjpedyeꞌ quiꞌtac dyäch buꞌyacñis in plata raꞌ. Päräꞌ úĉan yiris tavara. 22Jämꞌtacsevac jäbän tavara in mọꞌdyes damꞌcheꞌ Jenꞌsiꞌ acaꞌ tinates muꞌ, jịjcaijcheꞌ tsun. 23Chimeꞌ jämꞌtacsi ram päräꞌ tavara in quipdyivedyes in, damꞌcheꞌ Jenꞌsiꞌ acaꞌ tinates muꞌ. 24Mọꞌin raꞌ vaj cäts buꞌyiꞌ mụijyaꞌ yụꞌtac in judyeyaꞌ jimijcheꞌ raꞌ muꞌyaꞌ yirity coꞌtyity roc buꞌyisdyes son paj qui jam yäcänyiꞌ mọꞌ. Mọꞌin pärenꞌ quipdyivedyes tavara joꞌmeiꞌ raꞌ vaj cäts jämꞌtac in. 25Mọꞌyaꞌ raꞌ q̂uenꞌĉan tavara in, mọꞌindyes yiriꞌtac jäbän jiyi dyäch buꞌyacñis in. Päräꞌ dyäch buꞌyacñis yirisdyes tavara.
26Jämꞌtacsevac roc buꞌyis in son acacia. Ĉanamꞌ yirisvedyes Jenꞌsiꞌ acaꞌ tinates muꞌ 27judyeyaꞌ ĉanamꞌ yocvedyes Jenꞌsiꞌ acaꞌ tinates muꞌ. Judyeyaꞌ ĉanamꞌ damꞌchedyes Jenꞌsiꞌ acaꞌ tinates muꞌ, mọꞌve jịjcaijchedyes tsun. 28Mọꞌin chidyiꞌĉanyas roc buꞌyis in jemoñeꞌ soquemjeyacsiꞌ räj tavara in naꞌrus yóyaꞌdyemꞌ yụꞌtac o in. 29Fajcheꞌ raꞌ tyeij oro mọꞌincheꞌ tavara in, chimeꞌ jämꞌtacseva coꞌtyity oro judyeyaꞌ yụꞌtacsi raꞌ mi tavaracheꞌ in paj qui muꞌinĉan tyeiꞌ mọꞌin roc buꞌyis in. Chimeꞌdye raꞌ oro fajcheꞌ tyeij mọꞌincheꞌ roc buꞌyischeꞌ in.
30Jämꞌtyevaꞌ mọꞌ Jenꞌsiꞌ acaꞌ tinates muꞌ cäts yojdyemꞌ mọꞌ dyijyedyeꞌ o jiꞌcaviyinsiꞌ mi muꞌ Jenꞌ mụcuꞌcheꞌ jiquej.
Juñum buꞌyity vavdyety judyeyaꞌ jiꞌcoꞌshayacdyeꞌ
31Chimeꞌdye jämꞌtinte raꞌ yirity juñum buꞌyity, quịꞌsiꞌ raꞌ jämꞌtinte, yushñuty, judyeyaꞌ jäijnäty, judyeyaꞌ jeꞌñety faj judyeyaꞌ jämꞌtyiꞌ lino chimeꞌ. Muꞌcheꞌ juñum buꞌyitycheꞌ jämꞌtiñeꞌ raꞌ shásha querubin buꞌyity muꞌinyaꞌ in chịjtyiꞌ p̂anactyiꞌ in. 32Aty jämiꞌyaꞌ chat qui raꞌ yụꞌtac vij buꞌyacñis oro in, muꞌ raꞌ tap buꞌyi muꞌcheꞌ. Muꞌ raꞌ tapchute vạjpedyeꞌ p̂otsoꞌvi, son acacia, chijoꞌmeijdye orotum fajcheꞌ jämi p̂otsoꞌvi, muꞌ cach buꞌyicheꞌ yudyej plata. 33Yụꞌtinte raꞌ muꞌ juñum buꞌyity vij buꞌyacñischeꞌ, chat qui raꞌ mọꞌvetaque yụꞌtac raꞌ cajón yụꞌtacdyeꞌtumsiꞌ. Muꞌ juñum buꞌyity quịꞌsiꞌ pạrej buꞌyiꞌ yụꞌtacsiꞌ vavdyeꞌ, ovetaques vavdyeꞌ jeꞌ in: Tsäquiꞌsis Vavdyeꞌ, mọꞌ na mọꞌvetaques vavdyeꞌ jeꞌ in: Vavdyeꞌ Mọjoꞌchaꞌ Tsäquiꞌsis, jeꞌ in, mọꞌĉan mọꞌ cajón yụꞌtacdyetumsiꞌ p̂eyacdyeꞌ. 34Änꞌjetiñeꞌ ramꞌ mọꞌ änꞌtaquis mọꞌcheꞌ mọꞌ cajón yụꞌtacdyetumsiꞌ p̂eyacdyeꞌ chat yụꞌtiñeꞌ vavdyeꞌĉan Mọjoꞌchaꞌ Tsäquiꞌsisĉan. 35Judyeyaꞌ yụꞌtiñeꞌ mọꞌ mesa jorojyaꞌ muꞌ juñum buꞌyity quịꞌsiꞌ rocve buꞌyi yụꞌtac muꞌĉan Jenꞌsiꞌĉan acaꞌ tinates muꞌ judyeyaꞌ quic̣henꞌ buꞌyiꞌ yụꞌtiñeꞌ mọꞌ mạijyedyes Jenꞌsiꞌĉan acaꞌ tinates muꞌ jätisve.
36Sisdyeꞌyaꞌ raꞌ Jenꞌsiꞌ acaꞌ tinates muꞌ yụꞌtinte raꞌ yirity chụiꞌdyeyadyety quịꞌsiꞌ. Jämꞌtyemac muꞌ quịꞌsiꞌ búmaꞌ yushñuty, judyeyaꞌ jäijnäty, judyeyaꞌ jeꞌñety faj, judyeyaꞌ yaꞌijtyiꞌ quịꞌsiꞌ lino chimeꞌ. Paj muꞌin chịj p̂anaquity in muꞌin meꞌjeꞌ in mọꞌ carijtacdyeꞌ jämꞌteyaꞌ in muꞌ quịꞌsiꞌ. 37Jämꞌtacsevac ĉanamꞌ p̂otsoꞌvi son acacia in muꞌintum ĉanamꞌ oro vij buꞌyacñis in quịꞌsidyety sisdyeꞌyadyety Jenꞌsiꞌ acaꞌ tinates muꞌ. Chat qui fajcheꞌ raꞌ tyeij oro p̂otsoꞌvicheꞌ. Judyeyaꞌ jämꞌtacsi ram ĉanamꞌ dyäch buꞌyacñis in bronce.
Currently Selected:
Exodo 26: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
