Exodo 25
25
Dyimꞌtac Jenꞌdyes acaꞌ
1Ayoꞌ jajiti muꞌ Moisés:
2—Jéyacseva muꞌin Israeltyiꞌ vóshiꞌ in paj tuyin yụ in dyimꞌtacdyeꞌ muꞌin, tyijtyi chuc ĉojtyiꞌĉan mạꞌjeꞌtyiꞌ in, paj muꞌin tuyin yụ in. 3Paj meꞌ meꞌ tuyin yụ in: oro judyeyaꞌ plata, judyeyaꞌ cobre, 4judyeyaꞌ quịꞌsiꞌ: yushñuty judyeyaꞌ jäijnäty judyeyaꞌ jeꞌñety faj chimeꞌ, judyeyaꞌ yaꞌijtyiꞌ quịꞌsiꞌ lino, judyeyaꞌ chivos fin muꞌ, 5judyeyaꞌ shoꞌpamꞌ c̣huctacsiꞌ jäijnäsĉan, judyeyaꞌ yocsiꞌ shoꞌpaꞌ yaꞌiꞌsiꞌ, judyeyaꞌ jämꞌsiꞌ son acacia, 6judyeyaꞌ mạijyedyes aseijte, judyeyaꞌ jẹrejres taiꞌtacdyes aseijtetumsiꞌ, judyeyaꞌ coꞌshaiꞌsiꞌ jẹrejres 7judyeyaꞌ yaꞌijtyiꞌ mij ónice, tupuj joꞌmemety dyimꞌte in. Muꞌ mij ónice eꞌfeyadyety quịꞌsiꞌ muꞌindyety in tashcheꞌdyety cudyitity yụ́cheꞌ in. 8Ọij raꞌ dyimꞌtacdyeꞌ tuyinsiꞌ raꞌ yụ in, mọꞌ raꞌ yụꞌtac paj qui muntyiꞌ in jämꞌtyiyin acaꞌ yụ in, yụ qui raꞌ jajbuꞌyacsi. 9Jemoñeꞌ chiqueꞌ mi mọꞌ p̂eyacdyeꞌ soꞌmeyes raꞌ yụ, meꞌ raꞌ jämꞌtac mọꞌ acaꞌ tinates, räj raꞌ mọꞌĉansiꞌ jedyeꞌ in, chijoꞌmemeiꞌdye raꞌ jämꞌtacsim yódyeiꞌdyemꞌ raij jịꞌcaveyeyes u.
Cajón yụꞌtacdyeꞌtumsiꞌ p̂eyacdyeꞌ
10Jämꞌtiñeꞌ raꞌ miꞌin yiris cajón Jenꞌdyes, jämꞌsiꞌ raꞌ son acacia, mọꞌ raꞌ jämꞌtiñeꞌ. Meꞌquis raꞌ jämꞌtiñeꞌ, yiris metro judyeyaꞌ yiriꞌtac centimetro moc̣hadyemꞌ, judyeyaꞌ jäbän quiꞌtac ĉanamꞌ jiyiꞌ centimetro därvedyemꞌ, judyeyaꞌ jäbän quiꞌtac ĉanamꞌ jiyiꞌ centimetro moc̣hedyemꞌ, méquis raꞌ jämꞌtac. 11Fajcheꞌ raꞌ tyeij oromꞌ judyeyaꞌ ọĉan, judyeyaꞌ fiñeiꞌve oro yụꞌtac. 12Jämꞌtacsi ram vạjpedyeꞌ coꞌtyity oro cạquisdyes son in. Chat qui raꞌ peiꞌtacsi mi muꞌin coꞌtyity in mọꞌinyaꞌ in vạjpedyeꞌsisyaꞌ yuj cajónsiꞌ in. Päräꞌ muꞌin yirisve yụꞌtac in, päräꞌ muꞌin yocve yụꞌtac. 13Chat jämꞌtacsi ram cạquis son in mọꞌ son acacia chat fajcheꞌ raꞌ tyeij oro mọꞌ. 14Yụꞌtacsevac mọꞌin cạquis son in coꞌtyityĉan in paj qui joꞌmesyaꞌ cạiꞌ in mọꞌ cajón. 15Taĉan buꞌyiꞌ raꞌ mọꞌin cạquis son in. Jam raꞌ junꞌ meijjeyacseban miꞌin. 16Jábiyaꞌ yụ raꞌ soꞌmeye mọꞌ yụꞌtacdyeꞌtumsiꞌ p̂eyacdyeꞌ chat qui raꞌ mi mọꞌ yụꞌtyeꞌ cajónĉan.
17Chimeꞌdye raꞌ jämꞌtiñeꞌ cajónsiꞌ änꞌtacdyemꞌ, oro ramꞌ chimeꞌquiꞌyaꞌdye raꞌ muꞌ yiris metro judyeyaꞌ yiriꞌtac centimetro moc̣hadyemꞌ judyeyaꞌ jäbän quiꞌtac ĉanamꞌ jiyiꞌ centimetro därvedyemꞌ, meꞌquiꞌ raꞌ. Mọꞌ änꞌtacdyeꞌ jeꞌ in: jịꞌcavacdyes vayactacdyes juchaj, jeꞌ in. 18Chimeꞌdye raꞌ jämꞌtacsi miꞌin päräꞌ querubin buꞌyity in, yudyej ramꞌ oro jämiꞌ, martiryoyaꞌ raꞌ jämi, tätscäiꞌchecheꞌ änꞌtacdyeꞌ yụꞌtac in. 19Yirity ramꞌ tyäväꞌ oro jämꞌtac. Muꞌ yirity querubin buꞌyity tätscäiꞌcheꞌ raꞌ yụꞌtiñeꞌ miꞌin, muꞌ na yoctyiꞌ yocsiꞌcheꞌ tätscäiꞌcheꞌ, 20vaj vejti raꞌ in. Jatsaꞌ buꞌyiꞌ raꞌ pavaj jämi muꞌin paj qui juñumchubiꞌ änꞌtacdyeꞌ mọꞌsiꞌ in, mọꞌ jịꞌcavacdyes vayactacdyes juchaj, meꞌ buꞌyiꞌ raꞌ yụꞌtacsi miꞌin. 21Aty meꞌ jämꞌtac jụijyaꞌ, chat qui raꞌ muꞌĉan yụꞌtacsi miꞌin muꞌin mij yụꞌtacdyeꞌtumtyiꞌ in, muꞌ raꞌ soꞌmeyety yụ, chat qui raꞌ änꞌjetiñeꞌ mọꞌ cajón. 22Jäquiꞌve raꞌ yụ muꞌcheꞌ ĉọcye, fajcheꞌ mọꞌ änꞌtaquis dyeteꞌĉan raꞌ päräꞌ querubin in, muꞌcheꞌ raꞌ yụ ĉọcye, judyeyaꞌ raꞌ soꞌmeye räj p̂eyacdyeꞌ yụ Israeltyidyes vóshiꞌ in, mi qui raꞌ jiꞌjiyeyacsi.
Mesa yụꞌtacdyety pan Jenꞌyadyety
23Chimeꞌdye jämꞌtiñeꞌ raꞌ mesa, jämꞌsiꞌ raꞌ son acacia, mọꞌ raꞌ jämꞌtiñeꞌ miꞌin, meꞌquiꞌyaꞌ raꞌ jämꞌtiñeꞌ mọꞌ: arajtac quiꞌtac centimetro raꞌ moc̣hadyemꞌ mọꞌ, judyeyaꞌ vạjpedyeꞌ quiꞌtac ĉanamꞌ jiyiꞌ centimetro raꞌ därvedyemꞌ, judyeyaꞌ jäbän quiꞌtac ĉanamꞌ jiyiꞌ raꞌ centimetro moc̣hedyemꞌ, meꞌquiꞌyaꞌ raꞌ jämꞌtiñeꞌ miꞌin. 24Fajcheꞌ raꞌ tyeij oromꞌ judyeyaꞌ fiñeiꞌve oro yụꞌtac. 25Chimeꞌ tätscäiꞌve cọtoij mọꞌ mesa yụꞌtyeꞌ raꞌ tavara q̂uenꞌĉan centimetro mọꞌches. Fajcheꞌ raꞌ tyeij oro tavaracheꞌ judyeyaꞌ fiñeiꞌve oro yụꞌtac. 26Jämꞌtacsi ram vạjpedyeꞌ coꞌtyity oro raꞌ cạquis son in. Chat peiꞌtacsi raꞌ mi muꞌin yujcheꞌ mesas in quipdyivevej in. 27Muꞌin coꞌtyity cạquis son in jemoñeꞌ yụꞌtac c̣hẹiꞌyaꞌ mọꞌ tavara cọtoij buꞌyis paj qui tupuj c̣hẹiꞌyaꞌ buꞌyiꞌ cạquis son in. 28Jämꞌtacsi ram cạquis son in mọꞌ son acacia chat fajcheꞌ raꞌ tyeij oro mọꞌ. Mọꞌyaꞌ raꞌ cạiꞌ in mọꞌ mesa. 29Chimeꞌ raꞌ jämꞌtacsi mi pijiꞌ in judyeyaꞌ tasa in oro raꞌ. Judyeyaꞌ oro raꞌ jämꞌtacsi mi chojoꞌdacdyes in judyeyaꞌ jäꞌchäs in chojoꞌdacdyes Jenꞌsidyes tucdyeꞌ in. 30Muꞌcheꞌ raꞌ yụꞌtac pan Jenꞌyadyety, räjĉan buꞌyi raꞌ yụ́siꞌyaꞌ vej.
Mạijyedyes Jenꞌsiꞌĉan Acaꞌ
31Chimeꞌdye raꞌ jämꞌtiñeꞌ yiris mạijyedyes Jenꞌsiꞌĉan acaꞌ tinates muꞌ oro cashacac raꞌ martiryoyaꞌ jämi. Yiris raꞌ tyäväꞌ oro jämꞌtiñeꞌ mọꞌ, yuj mọꞌ judyeyaꞌ pech mọꞌ judyeyaꞌ mọꞌin jäꞌchäs jámes mọꞌ judyeyaꞌ mọꞌin comonꞌsis jámes mọꞌ judyeyaꞌ mọꞌin aꞌ mọꞌ jámes mọꞌ. 32Jämꞌtiñeꞌ jäbän dacaꞌ mọꞌ, ọ́ve chibin ọ́ve chibin buꞌyiꞌ. 33Chibin raꞌ jäꞌchäs jámes mọꞌ jämiꞌ jeꞌñes jáme almendras mọꞌ mọꞌintum comonꞌsis jámes judyeyaꞌ mọꞌin aꞌ mọꞌ jámes mọꞌ yirischeꞌ raꞌ dacaꞌ mọꞌin in. Chichibindye raꞌ mọꞌyaꞌ yocsiꞌcheꞌ dacaꞌ judyeyaꞌ joꞌmeiꞌ raꞌ räj mọꞌin jäbändye dacaꞌ in. 34Judyeyaꞌ pechcheꞌ raꞌ mọꞌyaꞌ vạjpedyeꞌ jäꞌchäs jámes mọꞌ mọꞌtum comonꞌsis jámes judyeyaꞌ mọꞌin aꞌ mọꞌ jámes mọꞌ. 35Yiris raꞌ comonꞌsis jámes ọĉan buꞌyiꞌ yóyaꞌdyemꞌ shupquiꞌ mọꞌin tashches päräꞌ dacaꞌ o in. Yocsiꞌ comonꞌsis jámes raꞌ ọĉan buꞌyiꞌ päräꞌsis dacaꞌ in judyeyaꞌ mọꞌ chibinyis comonꞌsis jámes raꞌ ọĉan buꞌyiꞌ chibinyisyaꞌ dacaꞌ in. Jäbän dacaꞌ räjtum in. 36Mọꞌin comonꞌsis jámes in judyeyaꞌ mọꞌin dacaꞌ in jämꞌtac in muꞌyaꞌdye tyäväꞌtyityyaꞌ oro pech mọꞌ judyeyaꞌ yuj mọꞌ jämꞌtyeꞌsiꞌ in, yirityyaꞌ oro jämiꞌ mọꞌ mạijyedyes cashac martiryoyaꞌ jämiꞌ.
37Judyeyaꞌ raꞌ jämꞌtinte yävätidyeꞌ ramparina in mọꞌĉandyes mạijyedyes, chat yụꞌtacsevaꞌ mọꞌcheꞌ paj qui mạijchuiꞌ in mọꞌ vavdyeꞌ tashcheꞌyas. 38Judyeyaꞌ muꞌ tätsaquity búmaꞌ ramparinadyety judyeyaꞌ mọꞌin pijiꞌ in oro raꞌ jämiꞌ in. 39Jämꞌtacsi ram muꞌ mạijyedyes in judyeyaꞌ yocsiꞌ jedyeꞌ in mọꞌdyes mạijyedyes muꞌyaꞌ chibin quiꞌtac ĉanamꞌ jiyi quiro oro jämꞌtyiꞌ. 40Anic raꞌ jämꞌ jämꞌtacsi mi cäts yojdyemꞌ mọꞌ dyijyedyeꞌ soꞌminsiꞌ u mi muꞌ Jenꞌ jịꞌcavacdyeꞌyaꞌ mụcuꞌcheꞌ jiquej.
Currently Selected:
Exodo 25: CAS
Highlight
Share
Compare
Copy
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
