Pärä'yis Juansi' 1
1
Rụijsis p̂eyacdyeꞌ judyeyaꞌ mạꞌjitidyes
1Yụ nash ĉọjcacsity anicjetety Jenꞌ in, yụ vorjeyac miꞌin anicjetintety Jenꞌ miꞌin vajmuꞌyaijtyiꞌ yiriꞌyaꞌ miꞌin, tsimꞌtactyiꞌ Jenꞌtyiꞌ miꞌin. Yụ rụij mạꞌjeyac miꞌin, jam yụmꞌ mạꞌjeyac, tyi chuc chị́yety in mọꞌ rụijsis p̂eyacdyeꞌ Jenꞌsiꞌ muꞌ, räj muꞌin mạꞌjinac chimeꞌ in. 2Yụ meꞌ mạꞌjeyac miꞌin ĉaĉaij na vaj meꞌ meꞌchujaꞌ ĉojtyiꞌĉan tsun mọꞌ rụijsis p̂eyacdyeꞌ Jenꞌsiꞌ muꞌ, mọꞌ raꞌ yejĉoiꞌ tsuntum. 3Yụ cọdyete Jenꞌ muꞌ Ạvatusinꞌtyiꞌ tsun judyeyaꞌ muꞌ Jesucristo, Jenꞌtyiꞌ Ạvaꞌ muꞌ paj qui soꞌminac ñịbeꞌjitidyes muꞌ judyeyaꞌ paj qui ñịbeꞌ ĉúnac, paj qui soꞌminac maꞌjodyeꞌ ĉojtyiꞌĉandyes miꞌin. Muꞌ raꞌ meꞌ soꞌminac dyijyedyeꞌ paj qui meꞌ mạꞌjeyacsity bäꞌyi miꞌin judyeyaꞌ chimeꞌ paj qui meꞌchubitinte rụijsis p̂eyacdyeꞌ muꞌ.
4Anic där maꞌjoij yụ, dạcacsequi jiquej yụ pạrej miꞌintum bäꞌyity in, muꞌin cäc̣häꞌchuiꞌtyiꞌ in rụijsis p̂eyacdyeꞌ, ĉaĉaij na meꞌ jísinꞌ Jenꞌ paj qui cäc̣häꞌchujaꞌ tsun. 5Q̂uinꞌ miꞌin vojity yụ, yụ fercheꞌ jéyac jemoñeꞌ vaj meij mạꞌjitiĉaꞌ tsun. Ọij p̂eyacdyeꞌ soꞌmeyacsiꞌ q̂uinꞌ, mọꞌ jam mụiꞌsis, mọꞌdye mọmoꞌ seꞌvetiñes tashcheꞌ jiquej. 6Meꞌchujaꞌ jụijyaꞌ mạꞌjitidyes, chat qui raꞌ tupuj chiquepja Jenꞌsiꞌ p̂eyacdyeꞌ muꞌ. Mọꞌ p̂eyacdyeꞌ seꞌvetiñes tashcheꞌ jiquej mọꞌ yiꞌ: "Jemoñeꞌ räjĉan mạꞌjeyacsi bäꞌyi miꞌin", yiꞌ mọꞌ p̂eyacdyeꞌ jiquej.
Jịꞌchiyacsity in cäjsis p̂eyacdyeꞌ
7Q̂uinꞌ úcheꞌ jaccheꞌ daiꞌ muꞌyaꞌ jịꞌchiyacsity in cäjsis p̂eyacdyeꞌ jiꞌseꞌveyacsi in. Pạrej yi in: "Muꞌ Jesucristo jam rụiꞌcuꞌĉan jiꞌcaviti úcheꞌ jaccheꞌ jiquej", yi in. Muꞌin meꞌ yity in anic muꞌin cäjsis dyijyedyeꞌ cạiꞌtyiꞌ in, judyeyaꞌ fạ́quetety Cristo chimeꞌ in. 8Areꞌĉa miꞌin jam raꞌ yocve dyijyi miꞌin mijam raꞌ seꞌvacsebi miꞌin jiꞌchäyitidyeꞌ muꞌin, areꞌĉa fibis shupquiꞌ carijtacdyeꞌ Jenꞌdyes miꞌin. Damꞌdye jämꞌ yejĉoij cäc̣häꞌchutinte Jenꞌ miꞌin paj qui soꞌmac bijodyeꞌ Jenꞌyaꞌ miꞌin.
9Tyi chuc jam yejĉoij cäc̣häꞌchuiꞌ Cristos jiꞌchäyitidyeꞌ jụijyaꞌ in, yocsiꞌ qui damꞌdye mọꞌcheꞌ cächjeꞌ jụijyaꞌ in, yódyesyaꞌdyemꞌ jam jịꞌchiyacsi Cristo u, muꞌin meꞌtyity in jam meꞌchute Jenꞌ in. Tyi chuc yejĉoijtyiꞌ cäc̣häꞌchupte in Cristos jiꞌchäyitidyeꞌ muꞌ, muꞌin chat aty meꞌchute Jenꞌ in, judyeyaꞌ Jenꞌtyiꞌ Ạvaꞌ muꞌ meꞌchupte chimeꞌ in. 10Jämꞌdyeyaꞌ muꞌyaꞌ jụijyaꞌ in yocsiꞌ jiꞌchäyitidyeꞌ jam rụijsis tuiꞌtyiꞌ in, muꞌin meꞌtyity in mijam raꞌ jiꞌdyäcac acaꞌĉan in, mijam raꞌ tiĉunacdyeꞌtum vorjetinte miꞌin. 11Tyi chuc meꞌ vorjeyacsi tiĉunacsi muꞌin meꞌtyity in, muꞌ jeñej buꞌyi nọ́tacsity aꞌc̣hisyaꞌ jiꞌchäyitidyeꞌ muꞌin, meꞌ shupqui muꞌ.
Jadyiquis voryetacdyeꞌ Juansimꞌ
12Tacaꞌdye tsanꞌ daiꞌ mọꞌyaꞌ p̂eyacdyeꞌ yụ mạꞌjeꞌ tsanꞌ jéyac, jam qui namꞌ mạꞌjeꞌ sánacdyeꞌcheꞌ jéyac. Damꞌdye jämꞌ aꞌdye miꞌin jébiyac, yụ mạꞌjeꞌ paj qui vaj vejtiĉaꞌ p̂eyaĉaꞌ paj qui anic vaj meꞌ maꞌjotyitiĉaꞌ.
13Úĉantyiꞌ anicjetety Jenꞌ in tsimꞌtactyiꞌ muꞌtyiꞌ muꞌ, muꞌin vaj meꞌ vojity miꞌin, muꞌinmun chimeꞌ vorjinac in.
Currently Selected:
Pärä'yis Juansi' 1: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
