Chibinyis Juansi' 1
1
Juan maꞌjotyete muꞌ Gayo
1Yụ nash ĉọjcacsity anicjetety Jenꞌ in, yụ vorjeye mi Gayo, mi nash mạꞌjeyacdyety yụ anic rụij mạꞌjeye yụ.
2Mạꞌjeyacdyety chätidyeꞌ yụ, yụ cọdyete Jenꞌ paj qui jam jụñiꞌñiij bäꞌyi mi, paj qui räsh bäꞌyi chimeꞌ mi. Yódyemꞌ jämꞌ q̂uinꞌ yejĉoij bäꞌyi Jenꞌdyes um ĉojtyiꞌĉan mi, meꞌdye yụ chimeꞌ cọdyete Jenꞌ paj qui jämꞌ muꞌve mi. 3Vojity míyaty in pạrej atsij jiquej in ĉútin yụ in. Anic där maꞌjoij yuꞌtyin yụ in aty seꞌvacsebiyaꞌ yụ p̂eyacdyeꞌ muꞌin, yi jin yụ in junꞌ chuc cäc̣häꞌchuiꞌ mi mọꞌ rụijsis p̂eyacdyeꞌ Jenꞌsiꞌ muꞌ. 4Seꞌveꞌyaꞌ yụ junꞌ chuc muꞌin ạvaꞌ buꞌyity yụ in yejĉoij cäc̣häꞌchuiꞌ in mọꞌ rụijsis p̂eyacdyeꞌ Jenꞌsiꞌ muꞌ, mọꞌ soꞌmin yụ anic mọjoꞌchas maꞌjodyeꞌ.
5Chätidyeꞌ mạꞌjeyacdyety yụ, anic rụijsis shupquiꞌ carijtacdyeꞌ mi Jenꞌdyes, nọ́tacsiyaꞌ mi vojity tsun muꞌin p̂eyacdyeꞌ tuiꞌtyiꞌ in, dadamꞌ mujuꞌchaꞌ muꞌin yocvety in nọ́tyetacsiyaꞌ mi. 6Muꞌin aty jin tsun in úyaty anicjetety Jenꞌ tsun, junꞌ chuc mi meꞌ mạꞌjeyacsim judyeyaꞌ nọ́tyetacsim. Meꞌdye raꞌ q̂uinꞌ yejĉoij nọ́tyetacsi mi jedyeꞌ chuc jemoñeꞌ miꞌedyedyes muꞌin, mọꞌ nash maꞌjotyeꞌ muꞌ Jenꞌ. 7Aty sactiyaꞌ jiquej in, cạyacsi raꞌ in Jesucristos p̂eyacdyeꞌ muꞌ, muꞌin raꞌ jam jụjtacsebi nọ́tacdyeꞌ muꞌin jam anicjetetysiꞌ Jenꞌ in. 8Mọꞌdyes tsun anicjejaty Jenꞌ tsun jemoñeꞌ tsun nọ́tyetacsejaꞌ muꞌin chimeꞌ in, soꞌmacsejaꞌ jedyeꞌ chuc jemoñeꞌ muꞌin in cạiꞌtyiꞌ jụijyaꞌ in mọꞌ rụijsis p̂eyacdyeꞌ in Jenꞌsiꞌ muꞌ. Meꞌ raꞌ shupquejaꞌ vaj meꞌ carijtaĉaꞌyaꞌ Jenꞌdyes tsun.
Aꞌc̣his dyijyedyeꞌ muꞌ Diótrefessiꞌ Demetrios na jämꞌsiꞌ muꞌ
9Yụ sáñeꞌ tsanꞌ miꞌindyes jiquej, juteyeyac tsanꞌ muꞌyaty miꞌin anicjetintety Jenꞌ, muꞌ qui namꞌ Diótrefes jam méquiꞌ jụjjibun tsunsiꞌ p̂eyacdyeꞌ, ĉaĉaij na muꞌ ĉụiꞌ maꞌjotyiti ayoꞌbuꞌyi. 10Ventyecyacyaꞌ raꞌ yụ, yụ raꞌ jiꞌjäcbite aꞌc̣his dyijyedyemꞌ, junꞌ chuc väñädyeꞌyamꞌ ñäñin tsun. Jam mọꞌ mọmoꞌ, chimeꞌdye muꞌ jam jụjjeyacsi vojity tsun yocve atsijtyiꞌ in, muꞌdye dyäcjeĉunacsi tyi chuc jiꞌdyäcacsity in, judyeyaꞌ muꞌdye vaꞌcacsequi muꞌin jiꞌdyäcacsity in paj qui jam penꞌdyetucsi in anicjetety Jenꞌ in.
11Mạꞌjeyacdyety chätidyeꞌ yụ, jam raꞌ cäc̣häꞌchucsebi mi aꞌc̣his dyijyedyeꞌ muntyis muꞌin, mọmꞌ cäc̣häꞌchuvaꞌ muꞌinsiꞌ rụijtyitysiꞌ dyijyedyeꞌ in. Jụꞌñity chuc rụij bäꞌyity in, muꞌin nash Jenꞌtyiꞌ in, muꞌin na ac̣hiꞌ bäꞌyity in jam muꞌin Jenꞌtyiꞌ in, mijam chị́yete Jenꞌ in.
12Muꞌ na Demetrio jam muꞌ meꞌ, räj cạvepte in rụijsis dyijyedyeꞌ muꞌ meꞌdye tsun chimeꞌ cạvete, miꞌin chimeꞌ chäyitiĉaꞌ tsun miꞌin anic rụij p̂eyaqui tsun, mijam damꞌ väñädyeꞌ jiꞌshupqueꞌ tsun.
Jadyiquis voryetacdyeꞌ Juansiꞌ
13Tacaꞌdye mọꞌyaꞌ daiꞌ p̂eyacdyeꞌ yụ mạꞌjeꞌ tsanꞌ yụ jéye, jam qui namꞌ mạꞌjeꞌ sánacdyeꞌcheꞌ yụ. 14Damꞌdye jämꞌ aꞌdye mi jébiye, yụ mạꞌjeꞌ cạveye paj qui vaj vejtiĉaꞌ p̂eyaĉaꞌ tsun.
15Yụ cọdyete Jenꞌ paj qui muꞌ soꞌmin mi maꞌjodyeꞌ ĉojtyiꞌĉandyes mi. Úyaty penꞌdyeꞌ tsun vorjin chimeꞌ in. Yụ́siꞌcheꞌ tịj vorjeyacseva cäts yirityityij in räj muꞌĉantyiꞌ in penꞌdyeꞌ tsun.
Currently Selected:
Chibinyis Juansi' 1: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'