Tashches Juansi' 5
5
Tsun jiꞌpenjaꞌ jacches dyijyedyeꞌ
1Tyi chuc anicjeꞌ mọꞌ p̂eyacdyeꞌ yiꞌsiꞌ: "Muꞌ Jesús muꞌ nash Jiꞌc̣honacsity Muntyiꞌ muꞌ bistety jiquej in", muꞌ nash Jenꞌtyiꞌ ạvaꞌ muꞌ. Jeshaꞌ, tsun muntyiꞌ tsun mạꞌjeja yirity muntyiꞌ jụijyaꞌ, chimeꞌdye mạꞌjepja ạvaꞌ muꞌ. 2Anic mạꞌjeja Jenꞌ jụijyaꞌ judyeyaꞌ chiquepja p̂eyacdyeꞌ muꞌ, muꞌinmun chimeꞌ mạꞌjeyacsejaꞌ muꞌin Jenꞌtyiꞌ ạvaꞌ muꞌ. 3Mọꞌyaꞌ tupuj chị́jaꞌ tsun rụij mạꞌjeja Jenꞌ, ĉaĉaij na chiquepja p̂eyacdyeꞌ muꞌ. Mọꞌ p̂eyacdyeꞌ muꞌ mijam carij chicac, 4ĉaĉaij na muꞌin Jenꞌtyiꞌ ạvaꞌ in jiꞌpeñeꞌ in mọꞌ jacches dyijyedyeꞌ. ¿Jedyeꞌyaꞌ buty tupuj jiꞌpenjaꞌ mọꞌ jacches dyijyedyeꞌ? Anicyedyeꞌyaꞌ mọmoꞌ Jenꞌcheꞌ, mọꞌyamꞌ tupuj jiꞌpenjaꞌ mọꞌ jacches dyijyedyeꞌ. 5¿Tyi buty tupuj jiꞌpeñeꞌ mọꞌ jacches dyijyedyeꞌ? Muꞌin anicjety in mọꞌ p̂eyacdyeꞌ yiꞌ: "Muꞌ Jesús, muꞌ nash Jenꞌtyiꞌ Ạvaꞌ muꞌ", muꞌin mọmoꞌ jiꞌpeñeꞌ in.
Jịꞌchicacdyeꞌ junꞌ chuc muꞌ Jesucristo
6Jesús atsij jiquej ojñiꞌyaꞌ jiꞌchojti, judyeyaꞌ ĉụiꞌsiꞌ chäsh yụꞌtaqui chimeꞌ muꞌ. Jam ojñiꞌ mọmoꞌ jịꞌĉoiꞌ, ĉụiꞌsiꞌ chäsh yụꞌtaqui chimeꞌ muꞌ. Chimeꞌdye mọꞌ Jenꞌsiꞌ Ạꞌedyeꞌ muꞌ mọꞌ rụij p̂eyaquis, chimuꞌdye mọꞌ p̂eijte. 7Chibin mọꞌyaꞌ p̂eijtes in muꞌ Jesucristo junꞌ chuc muꞌ Jenꞌtyiꞌ Ạvaꞌ muꞌ: 8Jenꞌsiꞌ Ạꞌedyeꞌ muꞌ, judyeyaꞌ mọꞌ jiꞌchojtidyeꞌ ojñiꞌĉansiꞌ muꞌ, judyeyaꞌ ĉụiꞌsiꞌ chäsh chimeꞌ muꞌ. Ọij chibindye dyijyedyeꞌ in vaj cäts buꞌyiꞌ in. 9Jeshaꞌ tsun muntyiꞌ tsun vatyquej anicjeyacsebijaꞌ muntyis jịꞌchicacdyes p̂eyacdyeꞌ, mọꞌ qui namꞌ Jenꞌsiꞌ p̂eyacdyeꞌ muꞌ dadamꞌ mọjoꞌchaꞌ ferdyeꞌtumsiꞌ muꞌ, mọꞌyaꞌ muꞌ jịꞌchiqueyacsi muꞌ Jesucristo muꞌ nash Jenꞌtyiꞌ Ạvaꞌ muꞌ. 10Tyi chuc anicjeptety Jenꞌtyiꞌ Ạvaꞌ muꞌ, muꞌin meꞌchuiꞌ in ọij p̂eyacdyeꞌ Jenꞌsiꞌ muꞌ ĉojtyiꞌĉan muꞌin, mọꞌ p̂eyes muꞌ Jesucristo. Tyi chuc jam anicjete Jenꞌ in, muꞌin jeñej väñäijtyiꞌ Jenꞌ yụꞌte in, ĉaĉaij na muꞌin jam mạꞌjeꞌ anicjepte p̂eyacdyeꞌ in, mọꞌ p̂eijtes Ạvaꞌ muꞌ. 11Ọij p̂eyacdyeꞌ jiꞌchäquiyisinꞌ junꞌ chuc muꞌ Jenꞌ tsạꞌchusinꞌ tsun paj qui Jenꞌyadyety tsun, chịmoꞌdye jiꞌchäquiyisinꞌ tsun junꞌ chuc muꞌdye Ạvaꞌ muꞌ tsạꞌchusinꞌ tsun. 12Muꞌin meꞌchuptety in Jenꞌtyiꞌ Ạvaꞌ muꞌ, muꞌin Jenꞌyadyety in, tyi chuc jam meꞌchuptety in muꞌin jam Jenꞌyadyety in.
Jäquiꞌves jiꞌchäyitidyeꞌ Juansimꞌ
13Ọij q̂uinꞌ sáñeꞌ yụ miꞌindyes anicjeptintety Jenꞌtyiꞌ Ạvaꞌ muꞌ, yụ jéyac ọij paj qui jämꞌ chịj miꞌin, miꞌin aty Jenꞌyadyety miꞌin.
14Tsun jam noiꞌyedyeꞌtum cọdyeja Jenꞌ, chị́yeja muꞌ jụjjibusinꞌtyiꞌ cọdacdyeꞌ tsun jedyeꞌ chuc cọdyejayaꞌ muꞌ junꞌ chuc muꞌsiꞌ dyijyedyeꞌ jụijyaꞌ muꞌ, muꞌ raꞌ seꞌvibusinꞌ cọdacdyeꞌ tsun. 15Chimeꞌdye chị́jaꞌ muꞌ Jenꞌ seꞌvibusinꞌ cọdacdyeꞌ jụijyaꞌ tsun, meꞌdye raꞌ chimeꞌ chị́jaꞌ tsun muꞌ raꞌ jụjjibusinꞌ cọdacdyeꞌ tsun cọdyejayaꞌ muꞌ.
16Cạveptinte jụijyaꞌ vojitysiꞌ juchaj muꞌ, jam qui namꞌ tuiꞌsiꞌ sänꞌdyeꞌ jụijyaꞌ muꞌ, tupuj cọdyetinte Jenꞌ muꞌdyes, chat qui raꞌ muꞌ jạtsaꞌchuti, jam raꞌ sänꞌdyeꞌ jasoꞌmiti. Mọꞌyaꞌ juchaj jiꞌsänsinꞌsiꞌ. Yụ jéyac jam raꞌ cọdyetinte Jenꞌ muꞌ meꞌtyitydyes juchaijtyidyes. 17Räj aꞌc̣his jedyeꞌ mọꞌ nash juchaj shupquiꞌ, mọꞌyaꞌ qui namꞌ juchaj jam jiꞌsänsinꞌsiꞌ tsun.
18Chị́jaꞌ tsun, muꞌin Jenꞌtyiꞌ ạvaꞌ in jam yejĉoij juchaij in, ĉaĉaij na Jenꞌtyiꞌ Ạvaꞌ muꞌ ñutsjeyacsi, mọꞌdyes qui mọꞌ Sọyoꞌ jam junꞌ täjtacsiꞌ. 19Chimeꞌdye chị́jaꞌ, tsun nash Jenꞌtyiꞌ tsun, chị́jaꞌ chimeꞌ mọꞌ Sọyoꞌ räj bächäcsiꞌ jacchety muntyiꞌ in. 20Chimeꞌdye chị́jaꞌ tsun aty atsij Jenꞌtyiꞌ Ạvaꞌ muꞌ, muꞌ soꞌmisinꞌ ĉojtyiꞌĉandyes dyijyedyeꞌ paj qui tupuj chị́yeja muꞌ anictyity Jenꞌ. Tsun anictyitytum buꞌjaꞌ Jenꞌ judyeyaꞌ Jesucristotum buꞌjaꞌ chimeꞌ, Jenꞌtyiꞌtum Ạvaꞌ muꞌ. Muꞌ Jesucristo anictyity Jenꞌ muꞌ tsạꞌchusinꞌ tsun judyeyaꞌ yuꞌsinꞌ paj qui Jenꞌyadyety tsun. 21Chätidyeꞌ ạvaꞌ yụ, jam raꞌ jacches jedyeꞌ jenꞌtutiñeꞌ miꞌin.
Currently Selected:
Tashches Juansi' 5: CAS
Highlight
Copy
Compare
Share
Want to have your highlights saved across all your devices? Sign up or sign in
Copyright 2017 Nuevo Testamento en Chimane
Jen'si' P̂eyacdye'
