Откровение 3

Уңипақ Ухпықанун Сардисымылңуӷнун

1«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Сардисым.

Та̄на Кияӷныӷым ма̄ӷраӷвинлык таӷныӷа̄ның пилык ма̄ӷрагвинлыклъю иӷалықыта̄лык, пӣқ: “Лӣсимакамси ся̄қыстык. Югыт пӣқӣси уңуванилюси иўырңа туқуңа̄си. 2Таҳтуӷлюси, икнақуҳсяҳтыху сяңўа̄ сялин лъпыси пизи туқунақылӷӣ. Лӣтанка укавантут сяңўа̄т пӣқыхкыси Кияӷныӷма писқысюлъҳаның лъпысинун. 3Нықамиклъюки апыҳтӯткат лъпысинун, нагақуқасилъю. Қа̄ткитыки, авутыҳқитыклъю сыӷлыҳқылъыҳпысиның. Иўырңа таҳтунӷилъкуфси, такулъықамси тыглыгнӣҳтытун. Налъюкылъықаҳси қакун тагилъыҳқақа лъпысинун.

4Паниның қафсиңга̄гут югыт Сардисыми а̄ткатың нукыхнаҳқылъҳилъкаңит. Иглыҳтылгусиҳлъықа̄тңа а̄лъютың қатылӷӣмың а̄ткамың қаюҳлъяк итагналӷӣңӯт. 5Кая̄лъқӣлӷӣ, лъңистун а̄лъықуқ қатылӷӣмың а̄ткамың. А̄тҳалъю ӷывысна̄нӷитақа Кынлыңилңӯм Уңувалъҳым Ига̄ның. Атамалъю яқулганлъю сивуңитни хўаңамнун пикнилъықақа. 6Сигутылгукуфси, нагатыкык сямың пӣқуткык Таӷныӷак ухпықанун!”»

Уңипақ Ухпықанун Филадельфиямылңуӷнун

7«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Филадельфиям.

Уна уңипақ Аглыӷналӷӣмың, Ипапигмың пиңӯқ. Лъңанитуқ Давидыми қипытақ. Қылъпыҳтыкумигу амик, китум алңунак умыгна̄нӷита̄. Ӯмкумигулъю амик, китум алңунак қылъпыҳна̄нӷита̄. 8Лӣсимакамси ся̄қыстық, лӣсимакамсилъю кая̄туси. Нақамлъю қа̄ткаси апыҳтӯсянка, мысиӷӣгатусилъю хўаңамнун малихся̄ҳтыкнилюси. Ӣи, қылъпыӷусима̄мси амигмың; китум алңунак умыгьяҳқақынӷилъкаңаның. 9Ӣи! Тама̄кут қырңуӷулъҳӣт Туӷныӷа̄м синагогаңани, Иудеяңунӣқут. Иўырңа иқлъыңиқыстыңӯт; Иудеяңунӷитут. Лъпысинун пислъюки қуңуҳтыснақанка сивухпысигун. Та̄хкын лӣлъықа̄т пиниқыхкымси. 10Қылъқақамси нуқытысқылъюси. Қа̄ткыхкақутыхпысиның қылӷилъқа пақнӣҳсяҳлъықамси сыӷлылӣлъыӷның ка̄нъақылӷӣның нунатаҳаӷының тамаҳа̄ның. Тама̄кут сыӷлылӣлъҳыт нанӷӣқулъықӣт қамахлъюки югыт кияҳлъыҳӣт нунами.

11Тагияҳтуҳтуңа. Айыпсюгилъюси ухпықумаңинаҳтыңъа китумун алңунак ўаянӷитысқылъюки қаҳпаси. 12Кая̄лъқӣлӷӣ аӷвыӷақыта̄ҳтыслъықақа Кияӷныӷма Храмыңани, алъямыңлъю а̄на̄нӷитуқ. Ынка̄м лъңакун игақылъықақа а̄тҳа Кияӷныӷма, а̄тҳалъю Кияӷныӷма ныҳлъяган, Иерусалимыӷраӷақ, укилӷӣ қилягмың Кияӷнымның. Лъңакунлъю игақылъықақа атыӷраӷақа. 13Сигутылгукуфси нагатыкык сямың пӣқуткык Таӷныӷак ухпықанун!»

Уңипақ Ухпықанун Лаодикиямылңуӷнун

14«Игақигу уна уңипақ яқулыгмун иглыӷутилӷӣ ухпықаның қырңуӷуткаюгның юӷаӷвигани Лаодикиям.

Уна уңипақ Аминымың пиңӯқ. Ата̄сӣӷмылңӯгуқ, ипапиҳқыңъалӷӣңӯқ лӣсимакиста. Лъңакун Кияӷныӷым улимакақа̄ сяңўа̄ қамахлъюку. 15Лӣсимакамси ся̄қыстық: исыкинанӷитуси, налиӷмың угуқнанӷитуси. Исыкиналӷӣситуқ налиӷмың угуқналӷӣситуқ! 16Ынка̄м мақаӷра̄ха̄тыхпысиның, исыкинанӷилңӯси налиӷмың угуқнанӷилңӯси, қысӣнъақамси қанымның! 17Пӣқуси аклъюңинъилюси, алъхыӷутыҳлъягақнилюси, аклъюңиганъилюсилъю. Иўырңа налъюкуси сыӷлыӷўа̄ӷӯси, наңлъыгнаҳтуси, аклъюма̄си, ая̄ңа̄си, амсикаӷмытусилъю. 18Тама̄кын апалъюқлъюку уңипа̄тамси аклъюңиӷисқылъюси тукфиҳтыху золото қигыҳтыңъўа̄қақ кыныҳқун, тыңьяҳтуҳтык хўаңамнун. Тукфиӷитыклъю хўаңамның қатылӷӣның а̄тканың ся̄пысқылъюки кайңуналӷӣт амсикаӷмытылъыси. Тукфиӷитыклъю хўаңамның аӷакаҳқамың ийыхпысинун ысҳа̄сягутысқылъюси.

19Тама̄кут пиниқыхканка налъҳусяӷақанка, аӷью̄ӷақанкалъю. Ынка̄м сягиқныӷуҳтык, авутыҳқылъюси сыӷлыҳқынъаниҳтык. 20Ӣи! Ныкывлюңа амигми тыңлюхтуҳтуңа. Китум алңунак нагақуқумигу мыка, амигмың қылъпыӷусимакаңаңа итыҳлъықуңа лъңанун. Ынка̄м ныӷылгусиҳлъықақа, лъңанлъю ныӷылгусиҳлъықа̄ңа.

21Кая̄лъқӣлюңа ынка̄м ақумга̄ңа ся̄ӷўани Атама умӣлгусӣкун ақумутахкынкун. Таўатыҳпигақ кая̄лъқӣлӷӣ ақумыслъықақа ся̄мкун умӣлгусигныкун ақумутамкун. 22Сигутылгукуфси, нагатыкык Таӷныӷак сямың пӣқуткык ухпықанун!»

Currently Selected:

Откровение 3: ess2

Highlight

Compare

Copy