Откровение 2

Ухпықанун Ефесымылңуӷнун

1«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Ефесым.

Хўаңаңӯқ тугумӣлык ма̄ӷраӷвинлык иӷалықыта̄ӷның аӷынқигнымкун, иглыҳтыңъӯңалъю акулңитни ма̄ӷраӷвинлык золотат кынылӷутат тунымӣтни.

2Лӣсимакамси ся̄лъыҳси, уӷлыӷӣлӷӣси, ӣлъқаюнӷитылъыҳсилъю. Лӣсимакамсилъю тугуклъӣгатаси сыӷлыӷыт югыт, иўырңа апостолыңунилӷӣт лӣтақаси ысҳапаглюки тымңиңутаңи. Та̄ўа лӣтаси иқлъыңиқыстыңӯт. 3Мыӷнӣгатуси икфиқылъыҳпысиның хўаңа апалъюқлъюңа, ӣлъқаюгигатусилъю.

4Иўырңа пиюкынӷитусиқа лъпысинун унаңӯқ, пиниқнанӣма̄ҳпысиңа, ухпықа̄лгутысилъю сивунӷани пиниқылъыҳпысистун. 5Тама̄кын апалъюқлъюку пуйгухпына̄н пиниқыҳлъягьяқыфсиңа, ухпықа̄лгутысилъю. Пиниқнаниӷаҳпысиңа пӣқылъыҳпысистун. Ынка̄м авутыҳқитык. Пиниқынқихтикут пиниқсюххуа̄лъыҳпысистун. Авутыҳқынӷилъкуфси, такулюси иқилъықақа кынылӷутаҳпыси туныма̄ ныңаның. 6Иўырңа уна пинитун пилъқаҳси: угумикаси пӣқыхкаңит Николайем малихся̄ҳтыңита, катам хўаңа угумикылъымтун.

7Сигутылгукуфси, нагатыкык Таӷныӷак сямың пӣқуткык ухпықанун! Тама̄кут кая̄лъқӣлӷӣт кая̄лъқӣлъыӷмың ныӷысқылъықанка пӣтыстыка̄ның уқфиган уңувалъҳым, таўанлыңуқ Кияӷныӷым Пӣтысиӷаӷвигани».

Посланият Юӷаӷвигитнун Ухпықат Смирнами

8«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Смирнам.

Уна уңипақ хўаңамның пиңӯқ: Сивулӣгуңалъю, киңулӣгуңалъю, туқулюңа уңувақа̄гуңа. 9Лӣсимаканка сыӷлылӣлъыси, аклъюмаңӯсилъю иўырңа аклъюңитуси! Лӣсимакақа сыӷлыӷыт акузитыт иляңита югыт пӣқыхкаңит лъпысинун. Иудеяңунӣқут, Иудеяпигунӷитыӷңа̄ӷмың. Югӯт қырңуӷуткаюгның Туӷныӷа̄м синагогаңани. 10Аликыхпынаки тама̄кут икфиқуткынъақыхкыси. Нагатык! Туӷныӷа̄м иляси анусимиңлъяҳтыснақӣ нанӷӣқуналюси. Ынка̄м икфиқылъықуси қуля аӷныӷнун. Иўырңа ата̄сӣӷмытык, қайўа туқуяҳқа̄ӷңа̄ҳпыси. Таўатын пикуфси, акилыҳтӯсялилъықамси кынлыңилңуӷмың уңувалъыӷмың.

11Сигутылгукуфси, нагатыкык Таӷныӷак сямың пӣқуткык ухпықанун!

Тама̄кут кая̄лъқӣлӷӣт кая̄лъқӣлъыӷмың, тӯңлиҳа̄н туқулъҳым ақниҳна̄нӷитӣ».

Посланият Юӷагвигитнун Ухпықат Пергамыми

12«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Пергамым.

Уна уңипақ сявихпалыгмың пиңӯқ иңлюхтун хиналык ипыхсяқамың. 13Лӣсимакамси на̄нтыстык, таўантуси Туӷныӷа̄м умӣлгутивиган ақумутахкыни. Хўаңамнун ата̄сӣӷмытуси, ухпықнанилъҳитаҳпысиңалъю. Таўатытка̄гуси талўа Антипа, ата̄сӣӷмылңуқ уңипаҳтыка, кияҳтыңъулюку. Таўани Туӷныӷа̄м кияҳфигани туқуткақа̄т.

14Иўырңа пиюкынӷитусинка лъпысинун укуңӯт: та̄ўа лъпысинитут иляңи қа̄ткулъҳӣт Валаамым апыҳтӯся̄нун. Апыҳтуқақа̄ Валак натын сыӷлыҳқыстысқылъюки Израилыӷмӣт. Ынка̄м Валакым апыҳтуқақӣ ныӷьяӷңӣта писқылъюки нықыт аҳқуткыхкат кияӷныңлъяқанун. Апыҳтуқақӣлъю итагнаӷнилюку алңунак развратылъыӷқақ. 15Таўатыҳпигақ иляси қа̄ткутут Николайем апыҳтӯся̄нун. 16Авутыҳқылъюси сыӷлыҳқынъаниҳтык! Пинӷилъкуфси қантаӷақун такулъықамси. Та̄хкын пилъюўаҳлъықанка тама̄кут югыт сявихпагмың қанымнилңуӷмың.

17Сигутылгукуфси, нагатыкык Таӷныӷак сямың пӣқуткык ухпықанун қырңуӷуткаюгның юӷаӷвигни! Маннамың ӣӷңалӷӣмың, манналилъықақа та̄на кая̄лъқӣлӷӣ Туӷныӷаӷмың. Лъңанунлъю тӯнылъықақа қатылӷӣ уйӷак, атыӷраӷаӷмың игақфикыхкақ. Китум алңунак налъюкыхка̄ атық иўырңақун алъхыҳтикаҳӣна̄м уйӷагмың лӣсимака̄».

Посланият Юӷаӷвигитнун Ухпықат Фиатирами

18«Письмогу яқулык иглыӷутилӷӣ ухпықаның қырңуӷуткаюгның юӷаӷвигани Фиатирам.

Уна уңипақ Иӷныӷаның Кияӷныӷым пиңӯқ. Ӣскык кумаӷӯгук кынӷыстун, итыгӣ қылмыҳтутка̄т сӣлюм қылмыҳсялӷатун. 19Лӣсимакамси ся̄лъыҳси. Лӣсимакақа пиниқылъыҳси, ухпықылъыҳси, қыпҳа̄тилъыҳси, нуқытутилъыҳсилъю. Лӣсимаканка тама̄кут ўата пӣқаси сивунӷани пӣқылъыҳпысиның.

20Иўырңа укуңӯт тыңвимун аюқыхканка лъпысинун: Аӷулӣҳнъыӷитаҳси аӷнақ Иезавель апыҳтуӷилӷӣ ипаңунӷилңуӷның. Ӯкналиқыстыңунӣқуқ Кияӷныӷмун. Иўырңа апыҳтуӷилъыӷмикун пӯҳтақӣ югынка развратысқылъюки, ныӷысқылъюкилъю нықыт аҳқуткыхкат кияӷныңлъяқанун. 21Пилъыҳқалиткақсяӷақа авутыҳқысқылъюку, иўырңа та̄қсюнӷитуқ алъянӣныӷмың. 22Ӣи! Милю̄нъақақа қаваӷвигмун таўани икфиқысқылъюку. Малигулъюки лъңанун милю̄лъықанка тама̄кут гылгаӷнӣлгутаңи ынка̄м икфиқыстыҳлъяхлъықанка. Таўатын пилъықуңа ўыткуқун авутыҳкыхката сыӷлытун пилъҳитның. 23Туқулъықанкалъю авақутӣ. Ынка̄м қамахлъютың ухпықат юӷаӷвигнилңӯт лӣлъықа̄тңа хўаңаңӯқ лӣсимакилӷӣ югым тамаӷаҳми сюмыҳтаӷалъҳитныңлъю, илюмикыхкӣтныңлъю. Аӷью̄ӷьяҳқақамси тамаӷаҳпыси сыӷлыҳқытулыхпысистун.

24Иўырңа иляхпыси Фиатирами, малихтылъҳитаси Иезавелым сыӷлыӷыт апыҳтуӷилъҳи. Лӣтылъҳитасилъю Туӷныӷа̄м аксяқумта̄ҳлъяги. Тама̄кын апалъюқлъюку қылӷатаӷаӷна̄нӷитамси, 25иўырңақун ухпықумаңинаҳтыху апыҳтулъыси кынляңа утыӷнилъымнун.

26Лъңа та̄на кая̄лъқӣлӷӣ кая̄лъқӣлъыӷмың, атуқилӷӣлъю аныӷныҳқилъымның кынлымун, аҳтуӷьяҳқа̄нӷилъылилъықақа иглыӷутысқылъюки народыт. 27Иглыӷутысқылюки сявикынӷаӷмың жезлылиӷлюки ынка̄м кагимнъакаңит қикумың қулмысӣтыңлъяқастун. 28Тӯнылъықанкалъю уна̄ңум иӷалықыта̄ӷаның. 29Сигутылгукуфси, нагатыкык сямың пӣқуткык Таӷныӷак ухпықанун!»

Currently Selected:

Откровение 2: ess2

Highlight

Compare

Copy