2е Тимофею 2

Ата̄сӣӷмытылъық Христос Иисусымун

1Ынка̄ңам лъпык иӷнымни, икнақи атуқылъыҳпыгун пиниқылъҳа Христос Иисусым. 2Лъпыклъю таўантыкалӷитын нагаткақаси апыҳтӯсянка. Ынка̄м апыҳтӯсянка ныӷьюкутики ата̄сӣӷмылңуӷнун. Та̄хкын лъңита апыҳтӯсяқлъыгулъықӣт илямыхнун.

3Икфиқылгусиҳқут пинилӷӣтун пилъюўаҳтыңатун Христос Иисусым. 4Пилъюўаҳтым илятңалӷӣм пилъюўаҳтынун ыфқуҳсюгақа̄ умӣлыни, ынка̄м акумҳӯсигатуқ пилъюўаҳтыңунӷилңӯт кияҳта̄лъҳитнун. 5Кая̄лъқӣра̄ҳта килга̄қумун малиҳқутақынӷилъкуми лӣлиҳтӯсямыхнун, алъхыӷунъа̄нӷитуқ қаҳпаңаның кая̄лъқӣстым. 6Уӷлыӷӣҳлъякақ пӣтысиӷаҳта ныңиӷьюхўа̄ӷьяҳқа̄гуқ унатақата. 7Сюмыҳта̄ӷа̄ткики сямың пилъҳынка қаюҳлъяк Атанӷым лӣгиксягутыслъықа̄тын сямың тамаҳа̄ның.

8Нықамиклъюку Кияӷныӷым уңуваҳтыстыкақа̄ Иисус Христос туқулъыӷмың, киңунқа̄ Давидым. Тама̄куңӯт уңипақақыхкынка апынымки Пинилӷӣт Уңипат. 9Икфиқңӯңа қаюҳлъяк уңипақыхкынка Пинилӷӣт Уңипат. Талўа қӣпшаӷусиӷлюңа аюқуңа лӣлиҳтӯсямың на̄фқӣстытун. Иўырңа акузитаңи Кияӷныӷым қӣпшаӷутңитут. 10Ынка̄м икфиқусиқсюглюку аюқақа сяңўа̄ тамаҳа̄н Кияӷныӷым накмикыхкӣ югулилъыңысқылъюки Христос Иисусыкун. Югулилъыӷмыхтыхун ниӷуҳқылъыңылъықут кынлыңилңуӷмың.

11Ма̄кут пилъҳыт ипаңӯт:

«Туқулгусӣмакумтыху, кияҳтылгусиҳлъықаҳпут.

12Ӣлъқаюнӷилъкумта, иглыӷутилгусиҳлъықаҳпут.

Налъюнқыхкумтыху, лъңанлъю налъюнқылъықӣлъю.

13Ата̄сӣӷмынъыӷилъкумта, лъңа ата̄сӣӷмытақуқ қаюҳлъяк та̄қна̄нӷитуқ ата̄сӣӷмынъыӷмың».

Итагнақыхкақ Қыпҳаҳта

14Китумун алңунак пуйгустыхпынаки тама̄кут. Кияӷныӷым нагасиманӷани, кылыңася̄ҳқи қаниқутуткыфқӣта акузитыт писқылъюки. Қаниқутылъҳат каютңуна̄нӷитуқ, на̄фқыңъинаҳлъықа̄т ухпықилъҳат нагалъҳӣт. 15Та̄куңинаҳа̄гның қыпҳа̄ Кияӷныӷмун итагнақысқылъютын. Қыпҳаҳтыңу кайңукиңигалңуқ қыпҳақаминың. Ылъқуӷаҳлъюкулъю апыҳтӯсяқигу Кияӷныӷым уңипаҳпига̄. 16Иқитңалютын тымңитхўаның, сямың писӣнӷилңуӷның алыҳқӯтылъыӷның. Таўатылңӯт алыҳқӯтылъҳыт уява̄таӷаҳлъықӣт югыт Кияӷныӷмың. 17Таўатылңӯт тымңитхўат апыҳтӯсят ақниӷныӷыстун аюқут миңиткаюгыт ма̄мьяҳқа̄нӷилңӯт. Именейемлъю, Филитылъю апыҳтуӷилъҳик таўатылңӯгут. 18Пыхтыкақӣк апыҳтӯсяпигыт қаюҳлъяк пӣқук сӣңынлъю туқукат уңуваҳтысиманилюки. Ынка̄м иляңитнун ухпықнаниҳтыстыкақа̄к ипапилъық. 19Иўырңа аюгилңуқ тунымақ Кияӷныӷым ныкыхтыка̄ қапшахтыпагниңитуқ. Та̄хун тунымакун игақңа̄т акузитыт:

«Атанӷым лӣсимакӣ лъми пини».

Хўатынлъю игақңа̄қ:

«Кина алңунак туқлъюӷилӷӣ а̄тҳаның Атаныӷым, сыӷлытун пиныӷмың та̄қлъи».

20Мыңтыӷаҳлъягми алъя̄ҳӣнаӷмың сялӷутаҳтӯқ: иляңи улима̄ӷӯт золотамың, серебромың, унаҳсимың, қикумыңлъю. Иляңи сялӷутат мыгнуналӷӣнун атӯгут, иляңи сямун алңунак. 21Кина алңунак лъминың катам пылюңиҳсяқуми сыӷлыӷмың, сялӷутаҳтун атуҳқа̄ҳлъықуқ мыгнуналӷӣмун. А̄фтыка̄ҳлъықуқ атӯлюни мыңтыӷам юганун. Та̄хкын атуҳқа̄ҳлъықуқ алңунак пинилӷӣмун қыпҳақамун. 22Иқитңалютын сямың сыӷлыӷмың аңлинҳат атуқсюгақыхкаңитның. Қӯнпың атуқақигу ылъқуӷутңалъық. Ата̄сӣӷмылъютын, пиниқиңалютын, ныкыхмылъютынлъю. Тама̄кут атуқики, малигулъютың туқлъюӷилӷӣнун Атаныӷмун қамакын пылюңилңуӷмың илюмыхның. 23Иқитңалютын тымңитхўаның алыҳқӯтылъҳитның югыт акузиткилӷӣның лӣгикумаңилъкымыхның. Лӣсимакатын а̄ҳтӣра̄ӷутыстикаюгӯт. 24Атанӷым қыпҳаҳтыңа а̄ҳтӣра̄ҳтыңунӷитуқ. Итупилъ наңлъыхтаӷьяҳқа̄гуқ тамаңанун. Пинилӷӣңуяҳқа̄гуқ апыҳтуӷиста. Нуқынъыҳтуяҳқа̄гуқ. 25Атанӷым қыпҳаҳтыңа кавьюгисяҳқа̄гуқ апыҳтуӷикуми кипулъхина̄лӷӣнун. Ўалъю̄млъю Кияӷныӷым авутыҳқыстақлъики ухпықысқылъюку ипапилъық. 26Ынка̄м лӣся̄ӷаӷьяқумың анагнаяӷа̄т Туӷныӷа̄м ныгаӷа̄. Туӷныӷа̄м на̄псиманыӷминики а̄ҳқутақақӣ.

Currently Selected:

2е Тимофею 2: ess2

Highlight

Compare

Copy