2е Тимофею 3

Киңулӣт Аӷныӷыт

1Лӣсимакысюгамкын киңулиӷни аӷныӷни сыӷлылӣҳлъягуяҳқа̄гуқ. 2Югыт лъмыхның пиниқылъықут, маниюныҳтулъықут, ямшатулъықут, а̄ңа̄юхлъықутлъю. Сыӷлықӯҳлъықӣт илятың, қа̄ткынъа̄нӷитӣт аңаюқатың, игамсиқаюгна̄нӷитут, ўа̄кнаниҳлъықа̄тлъю Кияӷнық. 3Пиниқина̄нӷитут, сыӷывутина̄нӷитут, иқлъыңиқуткилъықут, сю̄хлъюгулъықут, амьюқытиқылъықут, угумикылъықа̄тлъю сяңўа̄ алңунак пинилӷӣ. 4Увыҳпагулъықӣт илятың, наңьӣӷулъықут, қука̄юхтыҳлъяхлъықут, тыӷигниқылъық пиниқатаӷаҳлъықа̄т пакихулъюку Кияӷныӷмың. 5Қа̄ймыхтыхун ухпықа̄юхлъықут, иўырңа кияҳта̄лъҳита апыҳлъықа̄т аваңитулңи Кияӷныӷым аҳтуӷьяҳқа̄нӷилъҳаның. Иқитңалютын таўатылңуӷның югның. 6Иляңи тама̄кут нынун ӣтҳа̄таҳлъықут а̄ҳқутақыпигыснаӷналюки налъыкаӷнилңӯт аӷнат. Тама̄кут аӷнат сыӷлыҳқылъҳита уқихтуқусиҳлъяхлъықӣ, сыӷлыӷымлъю пиюкылъылӷутңита а̄ҳқутақылъықӣ. 7Тама̄кут аӷнат нагалъықут апыҳтуӷилъҳанун китум алңунак, та̄ўаңинақ лӣнъа̄нӷита̄т ипапилъық. 8Тама̄кут апыҳтуӷилӷӣт лъңитнун кипулъхина̄ҳлъықа̄т ипапилъық, катам Ианнийым Иамврийым кипулъхина̄лъҳыхкытун Моисей. Умьюгаҳлъю̄хлъықут, ухпықилъҳатлъю ипаңунӷилъықуқ. 9Иўырңа таўатын пилъҳат мулюна̄нӷитуқ. Тымңитхўалъҳат алӣлъықуқ тамаңанун, катам Ианнийым, Иамврийым тымңитхўалъҳак алӣтңалъҳатун.

Павелым Киңулӣт Апыҳтӯсӣ

10Иўырңа лъпык лӣсимакңўа̄ӷатын апыҳтуӷилъҳынка, кияҳта̄лъқа, апалъя̄лъю кияҳтылъыӷма. Лӣсимаканлъю ухпықилъқа, ӣлъқаюнӷитылъқа, пиниқилъқа, аӷулӣлъка̄малъқа. 11Лӣсимакан амьюқыта̄ткысилъқа, икфиқылъқалъю. Лӣсимакан таўатын пикақа̄тңа Антиохиями, Икониями, Листрамилъю. Угляӷңа̄н амьюқыта̄ткылъыңыхка̄гуңа, таўалъӣма Атанӷым югуликақа̄ңа тамаҳӣтның. 12Тамаҳаӷми амьюқыта̄ткылъыңылъықуқ кияҳсюлӷӣ Кияӷныӷым пиюкылъҳатун Христос Иисусыкун. 13Сыӷлыӷыт югыт, пӯҳтистытлъю, сыӷлыӷуҳтаӷаҳлъықут. Пӯҳқуҳлъықут, лъңитлъю пӯҳтылъыңылъықут. 14Иўырңа лъпык атуқумаңинаҳқи апыҳтӯсят лӣткаҳтын, ухпықыпӣкаҳтын. Лӣсимакатын ипаңутаңи, қаюҳлъяк лӣсимакатын кинкуңутаңи апыҳтуӷистыкыхкаҳтын. 15Има таӷнуҳа̄тыхпының лӣсимакыхкақатын аглыӷналӷӣт Акузитыт Игақыхкат. Акузитыт Игақыхкат апыҳтуӷьяқлъыгўа̄тын югулилъыҳқамың ухпықилъыҳпыгун Христос Иисусыкун. 16Қамахлъютың Акузитыт Игақыхкат Кияӷныӷым аныӷзӣлъқӣ. Ынка̄м апыҳтуӷисиҳқа̄гут, аӷью̄ӷусиҳқа̄гут, налъҳуся̄сиҳқа̄гут анахутылъыӷмун, апыҳтуӷисиҳқа̄гутлъю пинитун кияҳта̄лъыҳқамун. 17Ынка̄м атуқлъюки Акузитыт Игақыхкат, Кияӷныӷым қыпҳаҳтыңа пыҳқихсяӷўа̄ӷңалъықуқ, ята̄ҳқыңъалъықуқлъю тамаҳа̄нун аныӷныҳқилъыӷмун.

Currently Selected:

2е Тимофею 3: ess2

Highlight

Compare

Copy