2е Тимофею 1
1
Павелым Тӯңлӣт Посланияңи Тимофейемун
1Укут посланият Павелымың пиңӯт апостолаңаның Христос Иисусым Кияӷныӷым пиюкылъҳакун. Каяхтыкақа̄ңа а̄пҳысқылъюку акықусяқыхкақ уңувалъық Христос Иисусымылңуқ.
2Тимофейемун пиниқыпихтыкамнун иӷнымнун. Кияӷныӷым Атам, Христос Иисусымлъю Атанымта қуяслъитын, наңлъыклъитын, ныкыхмылъылгуслъитынлъю.
Иқамсиқаюлъықлъю, Кайымылъықлъю
3Унухтӯма̄н, аӷныҳтӯма̄н юӷалъымкун игамсиқаюгвикақақа Кияӷнық лъпынун. Қыпҳа̄тақақа сыӷлыӷьюлъңунаңа, катам сивунымтун. 4Ысҳаӷьюпихтақамкын алъямың, қаюҳлъяк нықамикақа пылъҳутутақңамтуң қияка̄лӷӣтын. Ынка̄м қуяҳлъяхлъықуңа қырңуӷунъықихтыкумтуң. 5Нықамикақа ухпықилъыпӣгын. Та̄наңӯқ ата̄сиқ ухпықилъық ныңьюҳпык Лоидам, на̄хпыклъю Евникам атуқыхкаңак. Лӣсимакңўа̄ӷақа лъпыклъю атуқңўа̄н. 6Тама̄кын апалъюқлъюку нықаңуҳсюгамкын, атуқумаңинаҳу тунусян Кияӷныӷмың, тӯныхкақа̄ ӣхтиӷақңамкын. 7Кияӷныӷым таӷныӷалитылъҳитӣлъю алиңьюгналӷӣмың. Итупилъ Таӷныӷахкынка имиқақӣлъю аҳтуӷьяҳқа̄нӷилъыӷмың, пиниқылъыӷмың, нуқытылъыӷмыңлъю.
8Кайңукыхпына̄н уңипақигу Атаныҳпут, талўа кайңуягутыхпынаңа анусимиңлъяӷа̄гуңа Христос апалъюқлъюку. Итупилъ аҳтуӷьяҳқа̄нӷилъҳакун Кияӷныӷым икфиқылгусиӷңа Пинилӷӣт Уңипат апалъюқлъюки. 9Кияӷныӷым югуликақӣлъю, накмикыхкақӣлъю пылюңитысқылъюта. Таўатын пика̄гуқ апалъюқлъюки лъми катам успықылъынилъю, пиниқилъынилъю, нака̄н қыпҳалъыҳпут апалъюқлъюку. Пиниқыхкақӣлъю Христос Иисусыкун сивутҳулъюку пӣнлилъыҳқа̄н нунам. 10Иўырңа хўа̄ пиниқылъыни лӣтыста̄ хўаңкунъун тагилъҳакун Югулиӷистымта Христос Иисусым. Христосым на̄фқыхкақа̄ туқулъық, та̄хкын Пинилӷӣтхун Уңипатхун лӣтыстӣлъю туқуңигалңуӷмың уңувалъыӷмың.
11Пинилӷӣт Уңипат апалъюқлъюки Кияӷныӷым накмикыхкақа̄ңа уңипақистыңулюңа, апостолыңулюңа, апыҳтуӷистыңулюңалъю. 12Та̄кут апалъюқлъюки икфиқңӯңа. Иўырңа кайңуюнӷитуңа қаюҳлъяк лӣсимакақа кинаңутаңа ухпықыхкақа̄. Лӣсимакңўа̄ӷақа лъңан кылыңаксяқлъыгўа̄ сяңўа̄ ныӷьюкуткақа лъңанун кынляңа киңулиӷмун Аӷныӷмун. 13Малихтики апыҳтӯсяпигыт нагақуқаҳтын хўаңамның. Успута̄гут атуҳқақатын. Апыҳтӯсяқики ухпықилъыҳқунлъю, пиниқылъыҳқунлъю алъхыҳтыкақатын Христос Иисусымың. 14Кылыңакигу ипапилъық ныӷьюкуткақ лъпынун. Кылыңакигу каюткылъюкык Аглыӷналӷӣк Таӷныӷак кияҳлъыҳӣк илюмнъи.
15Лӣсимакан қамахтывзиӷлютың ухпықат Асиямылңӯт каюсиӷьюгнанӣма̄тңа, талўа Фигеллымлъю, Ермогенымлъю. 16Юӷа̄ткыңъўа̄нка Атаныӷмун наңлъыгьягутысқылъюки Онисифорым ныңлъюгутаңи, қаюҳлъяк угляӷңа̄н илютуҳсяӷақа̄ңа. Кайңуягусимаңита̄лъю анусимиңлъяӷа̄малъқа. 17Ка̄тақңами Римымун иванӷӣӷуткақа̄ңа кынляңа на̄лъкылъыӷминун. 18Атаныӷмун юӷа̄ткақақа Онисифор наңлъыгьягутысқылъюку таўани Аӷныӷми! Лӣсимакан каюткыҳлъякақақа Ефесыми.
Currently Selected:
2е Тимофею 1: ess2
Highlight
Share
Compare
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
