1е Тимофею 6

1Қамахлъютың қыпҳаҳтыля̄ӷыт сӣвакыҳлъяглитки тама̄кут пилӣтистытың, ынка̄м китум алңунак сыӷлытун акузиткынӷилъикык а̄тҳа Кияӷныӷым, апыҳтуӷилъыҳпутлъю. 2Қыпҳаҳтыля̄ӷыт пилӣтистыңит ухпықа̄лгутңуката сӣвакатаӷаӷлитки қаюҳлъяк ухпықа̄лгуткыхкаңит. Ынка̄м қыпҳа̄таӷаӷлитки қаюҳлъяк каюсӣңўӣт ухпықа̄лгутытың пиниқыхкатың. Тама̄кут апыҳтӯсяқикилъю, уңипақикилъю.

3Кина алңунак апыҳтуӷикуми алъяңулюку тама̄куның апыҳтӯсяның, итагнақынӷитӣ апыҳтӯсяпиги Атанымта Иисус Христосым. Лъңан апыҳтӯся̄н уңипа̄тӣлъю Кияӷныӷым пиюкылъҳатун кияҳтылъыҳқамың. 4Кина алңунак алъятун апыҳтуӷилӷӣ а̄ңа̄югныҳлъягӯқ, лӣгикигатуқ сямың алңунак. А̄ҳтӣра̄ӷьюныҳтӯқлъю, қаниқсюныҳтӯқлъю акузитның. Таўатын пилъҳым алъхыҳтақӣ: ақиналъық, аӷиватылъық, сыӷлықӯӷутылъық, ухпықунъанилъық. 5Таўатылңӯт қӯнпың а̄ҳтӣра̄ӷутыстӣқут. Умьюгӣт сюмыӷныҳлъю̄хтақут ынка̄м лӣсимакнаниӷақа̄т ипапилъық. Сюмыӷмыхни қыпҳа̄скумыхтыху Кияӷнық аклъюңиӷилъықнилютың пӣқут. 6Иўырңа алъхыӷутыҳлъяхлъықукут кияҳтыкумта Кияӷныӷым кияҳтысқысюлъҳатун итагнақлъюку пикатуталвут. 7Алъхыӷақңамта нунамун кылъқутңитукут, туқукумталъю кылъқутылгуна̄нӷитукут. 8Ынка̄м итагнаҳлъықукут нықылгукумта, а̄ткалгукумта. 9Иўырңа тама̄кут аклъюңиӷиюлӷӣт нанӷӣқулъыңақут. Сыӷлыӷым пиюкылъҳита тугўа̄қӣ ынка̄м тымңитхўаҳлъягуҳтақут. Та̄хкын пиюкылъҳита сяюгақӣ на̄фқылъыӷмун. 10Манимың пиниқылъық акуқа̄ қамахлъюни сыӷлыӷым. Иляңита югыт пыхтақа̄т ухпықилъыҳтың қаюҳлъяк манитуҳқа̄ҳлъягьюлӷӣт. Ынка̄м лъңит қивӷуҳлъягуҳтақут.

Нықамиксяҳқат

11Иўырңа лъпык Кияӷныӷым юка̄тын, ынка̄м иқитңалютын тама̄куның. Сягиқутики ылъқуӷутңалъық, кияҳтын Кияӷныӷым кияҳтысқылъҳатун, ухпықилъылиӷлютын, пиниқилъылиӷлютын, нуқынъыҳтулютын, наңлъыхтаӷлютын. 12Пилъюўа̄тигу ухпықилъық қаюҳлъяк таўатын пилъюўалъық пинилӷӣңӯқ. Тугугулъю кынлыңилңуқ уңувалъық. Кияӷныӷым тахсиқақа̄тын тугуклъӣсқылъюку та̄на уңувалъық а̄пҳақңавгу ухпықилъҳын ухпықалӷутнун. 13Қылыӷнақамкын нагасиманӷани Кияӷныӷым, уңувалъылитикам сямун тамаҳа̄нун уңувалӷӣнун, нагасиманӷанилъю Христосым Иисусым, кӣмсиӷиля̄тақуӷикам Понтий Пилатым. 14Қылӷамкын пира̄мсилютын қа̄ткысқылъюки қамахлъюки қылгутканка лъпынун. Нагныӷутики кынляңа Атанымта Иисус Христосым утыӷнинқихлъыӷанун. Таўатын пикувык китум алңунак анахунилютын пина̄нӷита̄тын. 15Кияӷныӷым пилъыҳқаҳлъюўа̄ӷмини тагислъықа̄ Иисус Христос. Усюқналӷӣ Кияӷнық, лъңина̄гуқ Иглыӷутистыҳлъяк, лъңаңӯқ Умӣлгат умӣлгыт, Атанӷат атанӷыт. 16Лъңӣна̄гуқ туқуңигалңуқ. Кияҳтыңъӯқ ниӷугракыхлъягми рыпалъ китум алңунак тугухпагниңита̄. Китум алңунак ысҳӣгата̄, талўа ысҳаӷна̄нӷита̄. Кияӷныӷым пиклъикык қӯлвалъықлъю, аҳтуӷьяҳқа̄нӷилъықлъю қӯнпырухлъяк. Аминь.

17Қука̄юхтыснаниҳқи тама̄кут аклъюңилңӯт нунами хўани, талўа сиӷимаснаниҳқи аклъюңиңитхун налъюнықналӷӣтхун. Иўырңа сиӷимасқики Кияӷныҳқун. Лъңан иӷлыгутыхпына̄мта тӯнақӣлъю сямың тамаҳа̄ның пиниӷью̄гусиҳқамың. 18Аклъюңилңӯт пинитун писқики, аклъюңитысқики пинитун қыпҳалъыҳқун, иӷлылъңунаки тӯниюкыстаӷлюки иляңитнун югнун. 19Таўатын пикумың кахпахлъықа̄т аклъюңи лъмыхнун. Та̄на аклъюңи аюгилңӯгуқ тунымақ а̄гнакаҳқӣтнилңуқ. Ынка̄м уңувалъыңылъықут уңувалъыпигмың.

20Тимофей, кылыңаклъюки тама̄кут Кияӷныӷым ныӷьюкуткӣ лъпынун. Иқитңалютын ухпықа̄нӷилңӯтнъын тымңитхўаның акузитңитныңлъю, а̄ҳтӣра̄ӷутылъҳитныңлъю. Тама̄кут ухпықа̄нӷилңӯт сюмыӷмыхни лӣсималъыпӣлгунӣқут, иўырңа ипаңунӷитуқ. 21Иляңита пыхсима̄т ухпықилъыҳтың қаюҳлъяк ухпықыхкаңат ипаңунӷилңуқ лӣсималъық.

Кияӷныӷым қуяслъиси.

Currently Selected:

1е Тимофею 6: ess2

Highlight

Compare

Copy