1е Тимофею 5

Апыҳтуӷалъҳыт Кияҳтылъыҳқӣтнун Ухпықат

1Аӷью̄ҳпына̄н сӣванлъық ю̄к, иўырңа кавьюңуна̄н налъҳусяӷақигу атакылӷӣстун. Уюқлъӣт югыт аңлыгуткылӷӣстун пӣқики. 2Сӣванлъыӷыт аӷнат на̄кылӷӣстун пӣқики, ынка̄м уюқлъӣт аӷнат наягыстун пӣқики, қилӣӷьюкыфқӣта.

3Каюсӣтики угиңиӷат афлъыңакистыңӣткат. 4Иўырңа угиңиӷақ авақутаҳтукуми налиӷмың ылътуӷаҳтукуми, кылгулъит ныңлъюгутмыхнун кияҳсюгнилютың Кияӷныӷым кияҳтысқылъҳатун. Афлъыңакылъыӷмыхтыхун аңаюқатың акинақылъықӣт ынка̄м ыфқуҳлъықа̄т Кияӷнық. 5Угиңиӷақ илякўа̄ӷӣткақ сиӷимаңӯқ Кияӷныҳқун. Ынка̄м унухтӯма̄н, аӷныҳтӯма̄н юӷа̄маңина̄гуқ каюсӣтысқылъюни. 6Иўырңа угиңиӷақ тыӷигниқңинақуми лъңаның ыфқуҳналюни, уңуваӷңа̄ӷми туқукастун аюқсяҳқа̄гуқ. 7Қылыҳқи ухпықат тама̄кут писқылъюки ынка̄м китум алңунак сыӷлықӯнӷилъитки. 8Китум алңунак афлъыңакынӷилъкумики илякўа̄ни, ўата лъми катам ныңлъюгутни, таўатын пилъыӷмикун пыхтыкақа̄ ухпықилъыни. Ынка̄м сыӷлыӷатаӷа̄лъықуқ ухпықа̄нӷилңуӷмың.

9Угиңиӷақ ю̄к пиңают уксюҳтуткалӣмакан, ныңуҳтыка̄канлъю ата̄симың, а̄тҳа игақсяӷңа̄ӷми аюқуқ угиңиӷат атылӷутӣтхун. 10Амалъықа тамаңан лӣсимака̄т қыпҳалъыхтуляңа, катам авақутани пинитун аңлистылъҳатун, упуӷаныҳтуляңа, ухпықа̄лгутми итыгӣт уӷвуҳтуӷақлъюки, каюсиӷӣқлъюни сыӷлылӣлӷӣның, қӯнпыңлъю пинитун пӣқылӷӣ.

11Иўырңа нутаӷат угиңиӷат а̄тҳит игақыхпынаки атылӷутатхун. Югусӣта пиюкылъҳан сякниқысныӷистың угӣӷьюхлъықут. Таўатын пимакумың на̄фқылъықа̄т акықилъыҳтың Христосымун. 12Ынка̄м Кияӷныӷым нанқихлъықӣ аӷью̄ӷьяҳқа̄люки қаюҳлъяк на̄фқыхкаңат акықилъыҳтың. 13Та̄м ся̄ӷўакун иҳсянитаҳтақӣ, итҳӣтуҳтақӣ, йӣлъхитуҳтақӣ, янутқуныҳтуҳтақӣ, акузиткақӣтлъю сяңўа̄т акузиткысяҳқақынӷилъкытың. 14Ынка̄м итагнаӷатаӷаӷнаяҳтут нутаӷат угинҳат угӣӷьяқуйың, таӷнуҳаңлютың, афлъыңакысқылъюкилъю ныңлъюгутаңит. Таўатын пикумың аңуяк сыӷлықӯӷвигӣтыслъықа̄т хўаңкунъың. 15А̄ўалъю иляңи нутаӷат угиңиӷат ухпықа̄наниӷлютың малигусима̄т Туӷныӷаӷмун. 16Ухпықақ аӷнақ илякўа̄лгукуми угиңиӷаның, лъңан каюсӣсяҳқақӣ. Ынка̄м иляңита ухпықат каюсӣнъыӷисяӷңа̄ӷмыхтыки аюқӣт. Та̄хкын ухпықат каюсӣлъықӣт угинӷиӷат афлъыңакистыңӣткат.

17Пресвитерыт иглыӷутиюқат юӷаӷвигми, та̄куңинаҳа̄гныңлъю қыпҳалӷӣт апыҳтуӷилъыҳқун, уңипақилъыҳқунлъю, қӯлваӷақитыки малӷуҳқылъюки акилыҳтӯсӣт. 18Қаюҳлъяк Акузитыт Игақыхкат пӣт: «Вол тутмалӷӣ зерномың малъӣӷналюки, ныӷысқылъюку зерномың сюгругӣтиҳпына̄н». Амалъықа: «Қыпҳаҳта акилыҳтуӷьяҳқа̄гуқ қыпҳалъҳанун».

19Нагатыхпынаки килъю алңунак авуткилӷӣт Пресвитерымың анахусиманилюку, ўыткуқун авуткилӷӣ лӣсимакистылгукан ма̄лӷугыгның налиӷмың пиңаюның. 20Кина алңунак сыӷлыҳқумаңинақан, аӷью̄ӷнакын сыӷлыҳқынъанӣсқылъюку ухпықат мануңитни. Таўатын пикувгу иляңи тама̄кут алиңылъықут.

21Тама̄кут қылгутанка лъпынун қа̄ткысқылъюки, пакихутифқа̄вык налиӷмың танӣлъқифқа̄вык писқылъютын. Таўатын қылӷамкын ысҳа̄манӷитни Кияӷныӷымлъю, Христос Иисусымлъю, накмикыхкатнилъю яқулгытни. 22Ӣхтиӷаҳтыхпына̄н кина иглыӷутистыкаҳқа̄люку юӷаӷвигми. Та̄юҳқыхкувык илялъкӣнъаюкавык сыӷлыҳқылъҳанун. Кияҳтыкыста̄ пылюңилъютын.

23Мыҳӣнаӷмың мыӷыхпынаң, иўырңа виноңӣҳаӷмың мықаӷақлъютын каюткылъықан ақсяқуҳпынун, қинуюга̄талъыҳпынунлъю. 24Иляңита югыт сыӷлыҳқылъҳит алӣтңўа̄ӷақут, талўа сялин нанқихтылъҳилъютың. Иўырңа иляңита югыт сыӷлыҳқылъҳит алӣҳсяҳқа̄гут киңувақўа̄қун. 25Таўатыҳпигақ аныӷныҳқилъҳат алӣтңўа̄ӷақут, иўырңа тама̄кут алӣнъыӷилңӯт ӣӷңана̄нӷитут.

Currently Selected:

1е Тимофею 5: ess2

Highlight

Compare

Copy