Romans 14

Nanqigtegpenaan Ugpeqaalguten

1Upughateggu yuuk ugpeqilleghqestaaghhaq akulegpesinilnguq. Aaghtiiraaghusiqegpenaan sangwaa ugpeqegkaa elqughutngatanga nalighmeng anaggutngatanga. 2Ataasim yugem ugpeqaa neghyaghqaaniluni alngunak neqmeng. Iwernga yuuk ugpelleghqestaaghhaq neghaquq nunivagseghaghhiinaghmeng. 3Yugem neghegkayugem alngunak neqmeng, siivakligu yuuk neqayuk nunivagseghaghhiinaghmeng. Yugem neghegkayugem nunivagseghaghhiinaghmeng, nanqiggneghilligu yuuk neqayuk alngunak neqmeng, qayughllak Kiyaghneghem tugukliimaa. 4Kinanguniluten piiqsin nanqigtilghii kitum qepghaghtenganeng? Qepghaghtem piliitistenginaan nanqiglleqaa pinitun pimatanga nalighmeng seghletun pimatanga. Atanghem qepghaghtenga pinitun pillequq qayughllak Atanghem kayusighyaqlegukanga pinitun pisqelluku.

5Yugem ugpeqaa ataasiq aghneq megnunaghataghaghniluku ilangitneng aghneghneng. Ilangan yugem ugpeqii qamaglluteng aghneghet tawatelkunniluki. Tamaghhaghmi yugem umyugagni ataasiightengngwaaghlikek. 6Kitum alngunak ugpeqegkumigu megnunaghluku aghneq tawaten piiquq quulvaghnaluku Ataneq. Kitum alngunak neghegkumigu alngunak neqa tawaten piiquq quulvaghnaluku Ataneq, qayughllak iqamsiqayugvikaqegkanga Kiyaghneq neqmeng. Kitum alngunak neghyunghilkumiki ilangi neqet tawaten piiquq quulvaghnaluku Ataneq, iqamsiqayugvikaqegkangallu Kiyaghneq. 7Unguvangigatukut whangkunnun, tuqungigatukutlu whangkunnun. 8Unguvakumta, Ataneghmun unguvanguukut. Tuqumakumta, Ataneghmun tuqullequkut. Enkaam unguvayaghngaamta nalighmeng tuquyaghngaamta Atanghem pikiinkut. 9Christ‑a tuquluni, unguvaghtekaaguq Atanghunaluni unguvalghiinunllu tuqukanunllu. 10Elpesi, sangan nanqigtaqesteki ugpeqaalgutesi? Sanganllu siivakigasteki ugpeqaalgutesi? Neqamikluku, qamaglluta nekevyaghqaagukut sivungakun Kiyaghneghem, ellnganun nanqigtesqelluta. 11Akuzitni Igaqegkani igaqngaaq,

“Ataneq piiq, qayughllak whanga unguvalghiinga Kiyaghneq,

tamaghhaghmi yuuk segesqughquullequq whangamnun,

tamaghhaghmillu yugem usuqelleqaa Kiyaghneq.”

12Enkaam qamaglluta Kiyaghneghmun apeghyaghqaqaghput salleghput, sanganllu tawaten pimatfut.

Ugpeqaalguten Seghleghqestegpenaan

13Enkaangam taaqelta nanqigtunneghmeng. Yeghlegi, umyugaput ataasiightelteki ugpeqaalgutfut naagtestefqaan nalighmeng seghleghqestegpenaan pilteggu. 14Ataneghqun Jesus‑kun liisimakngwaaghaqa avangituq iinghutkameng neqmeng. Iwernga yugem ugpeqegkumigu sangwaa iinghutkaaluku, taawa ellngani iinghutkaaguq. 15Ugpeqaalguten uniighmiqumakan sameng neghegkaghpeneng, taawa piniqnaniimaan. Neghegkaghpenun naafqestegpenaan ugpeqillgha Christ‑am tuqumatkegkaa. 16Ugpeqegkan pinightuq; akuzitkestegpenaan seghleghuluku. 17Qayughllak Kiyaghneghem Ataneghpagullghani sangwaat neghegkaputlu meghegkaputlu megnunanghitut. Ukut megnunaghtut: elqughutngalleq, nekeggmelleq, quyalleqlu; taakut Agleghnalghiigneng Taghneghagneng pinguut. 18Taakut atuqluki qepghaatilghiim Christ‑amun, efqughlleqaa Kiyaghneq, itagnaqelleqaatlu yuget.

19Enkaam atuulteggu nekeggmellengestiyaghqaq, kayemututeltallu ugpelleghtughtaghaghnaluta. 20Naafqegpenaan Kiyaghneghem qepghallgha apalluqluku neqa. Qamaglluni neqa neghyaghqaaguq, iwernga anaggutngaaq neghelleghqaq alngunak neqmeng seghleghqestiyaghqaq kitumeng. 21Itagnaghyaghqaaguq kemekragtunghitelleq, wine‑etunghitelleq, sangwaallu alngunak naagtestiyaghqaq ugpeqaalgutegpesinun. 22Kiyaghneghhiinaqlu liisimaksaghqaqatek tamaakut ugpeqegkaghten. Quyangaaquq yuuk atuqneghminiki ugpeqegkani elqughutnganiluki seghleghnitkegpenaki. 23Iwernga yugem neghegkani, ugpeqegkumigu anaggutnganiluku, Kiyaghneghem nanqiglleqaa qayughllak pinghilkanga sangwaa ugpeqegkani. Sangwaa alngunak ugpeqegkani anaggutnganiluku atuqumakumigu seghleghqellequq.

Currently Selected:

Romans 14: ess

Highlight

Copy