Romans 13

Qaatkelluki Aangwaaghet Igleghutilghiit

1Tamaghhaghmi qaatkusaghqaaguq aangwaaghughtekanun igleghutistenun. Kina alngunak igleghutistengunaanghituq wetkuqun Kiyaghneghem igleghutistengughtestekumigu. Igleghutistenguut qayughllak Kiyaghneghem nekegtekaqii igleghutisqelluki. 2Kitum alngunak qaatkenghilkumiki igleghutistet, qaatkigatii Kiyaghneghem nakmikegkii. Enkaam aghyuughteslequq. 3Pinitun pikayuget alikigatiit igleghutistet, iwernga seghletun pikayuget aliksaghqaqiit. Aliksunghilkufsiki igleghutistet, pinitun pitek, enkaam usuqelleqiisi. 4Igleghutistet Kiyaghneghem qepghaghtekii aneghneghqelleghqaghpesinun. Iwernga seghletun pikufsi, aliknakesi, qayughllak Kiyaghneghem qelghumii aghyuughesqelluki seghletun pikat. Kiyaghneghem qepghaghtekii, aghyuughistekiillu seghletun pilghiinun. 5Tamaaken apalluqluku qaatkiteki igleghutistet. Qaatkiteki qayughllak Kiyaghneghmun aghyuughtesunghilnguusi. Iwernga taananginaq apalluunghituq. Qaatkiteki qayughllak liisimakaghsi qaatkutelleq elqughutngaaq.

6Taakuklu apalluqlukek llivikaqasi tax‑esi, qayughllak igleghutistet qepghaagut Kiyaghneghmun qepghaqaten pineghmegteki. 7Enkaangam tax‑et asengesi qamaglluki llivikiteki igleghutestegpesinun. Siivakitekillu quulvaghtekillu qamaglluki.

Piniqluki Ilasi

8Asengegpenaan kina alngunak, iwerngaqun piniqelleghsi asengeknginaghteggu ilagpesinun. Kitum alngunak piniqegkumiki yulgutni qaatkengngwii iinguniita Liilightuusat. 9Igaqngaat Liilightuusani whaten,

“Gelgaghniighpenang, Yugtaghpenang, Teglegpenang, Qiliiqetiqegpenang.”

Qaatkelleqaten taakut qelghusat, alngunaklu qelghusat, qaatkegkuvgu una qelghusaq:

“Piniqluku yulguten piniqelleghpetun elpeneng.”

10Kina alngunak piniqikumi yulgutmineng, seghletun pinaanghitii. Piniqilleghmikun qaatkutnguuq iinguniitnun Liilightuusat.

11Tamaakut piteki qayughllak liisimakaghsi pilleghqaq kaasimaaq. Qavalghiistun ayuqusi iwernga maaten taghtughyaghqaaghtusi. Yugulilleghput tughaaghtuq ugpeghyuggaallemnneng. 12Unuk alpagyaghtughtuq, whaa aghsaghtungestaghaa. Taaqeltekingam atuqneghmeng seghleghet yuget piiqegkangit mamlegmi. Enkaam tugulteki pilluwaasighqat nighugmi. 13Pinitun kiyaghtelta katam yugestun kiyaghlleghhiit nighugani aghneghem. Seghletun teghigniqefqaamta, suumefqaamta, alngunak sex‑kun seghleghqefqaamta, pilluwutefqaamta, aqinatefqaamta. 14Itupill akulghaaghestun aateggu Ataneq Jesus Christ‑a, sumeghtaghaatkefqiitallu atuqnaluki yugusighpesi piyukellghit.

Currently Selected:

Romans 13: ess

Highlight

Copy