Romans 15

Efqughteki Ilasi, Efqughtefqaafsi Elpesineng

1Whangkuta ugpeqilleghtuqani kayusiisaghqaqaput ugpeqilleghqestaaghhaat seghleliinghata. Efqughsaghqaanghitukut whangkunneng. 2Itupill, tamaghhaamta efqughhnaqelteggu ugpeqaalgutfut ellngan katam pinighqelleghqaanun, ugpeqilleghtughtesqelluku. 3Talwa Christ‑a efqughsimangituq ellmineng katam. Yeghlegi igaqegkaaguq Akuzitni Igaqegkani, “Yuget seghlequulghiit elpeneng, seghlequullghit tekitaqut whangamkun.” 4Sivunghani Akuzitet Igaqegkat igaqegkaagut apeghtughnaluta. Nuqenneghtustiinkut, kayemiinkutlu sighimallengnayukamta. 5Nuqenneghtullghenkuk, kayemellghenkuk Kiyaghneghtaaguk. Ellngan kiyaghteslisi itagnaqullusi katam Christ Jesus‑em pillghatun. 6Taagken qamagllusi qerngaghpesi ataasistun usuqelleqaghsi Kiyaghneq, Atanga Atanemta Jesus Christ‑am.

Pinilghiit Ungipat Jews‑enunllu Gentile‑enunllu Pinguut

7Tamaaken apalluqluku tugukliitullusi katam Christ‑am tugukliqayugukangisi elpesi. Tawaten pikufsi yuget usuqelleqaat Kiyaghneq. 8Amenqun Christ‑a qepghaghtengughtekaalghii Jews‑enun liigikesqelluki Kiyaghneq iiwleng ipapiiquq. Tamaaken apalluqluku Jews‑et liisimakngwaaghaat Kiyaghneghem piyaghqaqii akequsaqegkani sivunghitnun. 9Christ‑a tagikaalghiillu Gentile‑enun usuqesqelluku Kiyaghneq nangllegtallghanun. Igaqngaaq Akuzitni Igaqegkani,

“Enkaangam usuqelleqamken akulngitni Gentile‑et,

ilagaghllequngallu usuqilleghmeng ateghpenun.”

10Akuzitni Igaqegkani igaqngaaqlu whaten,

“Gentile‑eni, quyatek maligullusi Kiyaghneghem yugitnun!”

11Alla Akuzitni Igaqegkani igaqngaaq,

“Usuqiteggu Ataneq, qamagllusi Gentile‑eni;

usuqiteggu, qamagllusi yugni!”

12Isaiah pikaaguq,

“Kingungha Jesse‑m tagillequq igleghunnaluki Gentile‑et,

enkaam ellngakun sighimallequt.”

13Kiyaghneghuuq sighimastilghii. Imighlisi quyalleghllagmengllu nekeggmelleghmengllu ugpeqelleghpesigun ellnga. Taagken sighimallengataghaghllequsi aghtughyaghqaanghillghakun Agleghnalghiim Taghnegham.

Paul‑em Latatkegkanga Qepghaqani

14Ugpeqaalgutemni, liisimakngwaaghamsi piniipigtusi yugni. Liisimakaqallu liigikngwaaghluki ayuqasi apeghtuusat Kiyaghneghmeng ayuqelghiit, enkaam apeghtuusaqlegwaasi ilangitnun. 15Iwernga tetullngunanga latakaqamsi sameng ilangitneng neqangughhnalusi tamaaken. Tawaten lataanga qayughllak Kiyaghneghem tunusightughaanga 16qepghaghtengulunga Christ Jesus‑mun Gentile‑enun. Priest‑etun ayuqaqunga ungipaqinemni Pinilghiineng Ungipaaneng Kiyaghneghem Gentile‑enun. Tawaten ungipaqiiqunga ellngit tunusatun ayuqesqelluki tuguklighyugnalghii Kiyaghneghmun. Agleghnalghiim Taghnegham agleghnaghtestaa tunusaq.

17Enkaam qukaayugtaqunga qepghaqamneng Kiyaghneghmun Christ Jesus‑kun. 18Akuzitkesaghqaqanka Christ‑am apeghiiqaghhiinii whangamkun. Ellnganguuq Gentile‑eneng qaatkutestilghii Kiyaghneghmun ungipaqillemkunllu qepghaqamkunllu. 19Tawaten pikaaguq aghtughyaghqaanghillghakun allaaghlluwhaghtillghet, aghtughyaghqaanghillghakunllu Agleghnalghiim Taghnegham. Ungipaqngwaaqaqanka Pinilghiit Ungipat Christ‑ameng ayuqelghiit tamaghhaani Jerusalem‑emeng taagaverugllak Illyricum‑emun. 20Iiwleng piyukelqesaghaqa ungipaqnaluki Pinilghiit Ungipat nunani nagaquusigalngughni Christ‑ameng. Tawaten pikaagunga qayughllak nekeftiyugunghilnguunga tunemakun ilangan yugem piinliqaakun. 21Katam Akuzitni Igaqegkani igaqngalghii whaten,

“Tamaakut salin ungipaasigalnguut ellnganeng, esghaghlleqaat, salinllu nagaquusigalnguut ellnganeng, liigikelleqaat.”

Paul‑em Laalighhnaqellgha Rome‑emun

22Tamaaken apalluqluku uglaghngaan elpesinun pipagningitaqunga qayughllak ilangitni nunani ungipaqiiqelghiinga. 23Iwernga maaten apeghiighaqa qepghaqaqa maani. Uglalghiini ayumiqulleghni elpesinun piyupigtaqsaghtunga, 24enkaam sunanguq maaten laalighfiklamsi Spain‑mun pitkelluku. Laalighutaghtellemta kingunganeng sunanguq kayusightengnga aghulaqnaqegkuma Spain‑mun. 25Iwernga elpesinun pivagilgama, Jerusalem‑mennaqaqunga kayusiinnaluki Kiyaghneghem yugi tamaanlenguut. 26Ugpeqat Macedonia‑melnguutlu, Achaia‑melnguutlu quyakusiqluku tuunikaagut manimeng kayusiinnaluki aklumalghiit akulngitnilnguut Kiyaghneghem yugan Jerusalem‑emi. 27Quyakusiqluku tawaten pikaagut. Taakut Gentile‑et asengemiit Jews‑et qayughllak allgeghutkaalghiit Kiyaghneghem quyastillghaneng ellngitgun. Enkaam Gentile‑et kayusighyaghqaqiit Jews‑et ugpeqiit Jerusalem‑emelnguut tuyughluki manimeng. 28Whaa kelqennaqaqa Gentile‑et maningat Jews‑enun. Apeghiiqumkun una qepghaqaq tuunluku mani ellngitnun, laalighfiksaghtughlleqamsi, taagken Spain‑ellequnga. 29Liisimakaqa kaaskuma elpesinun, pilgullequnga Christ‑am iingunaan quyastellghaneng.

30Ugpeqaalgutemni, Atanemteggun Jesus Christ‑akun, piniqellghakunllu Taghnegham, maligullusi whangamnun yughaatkeghllakaghtengnga Kiyaghneghmun kayusiitesqellunga. 31Yughaghtek Kiyaghneghmun paqniighsiisqellunga ugpeqaanghilngughneng Judea‑mi. Yughaatkiteggullu qepghaqaqa Jerusalem‑emi tuguklighyugniisqelluku Kiyaghneghem yugitnun. 32Taagken Kiyaghneghem piyukelqegkagu, elpesinun pillequnga quyallelighllaglunga, enkaam pinighyuuggneqigllequnga laalighfikumalusi. 33Kiyaghneq nekeggmellelitilghii tamaghaghpesinilli. Amen.

Currently Selected:

Romans 15: ess

Highlight

Copy