Revelation 6

Penniighaghaam Qelpeghquqangi Seal‑ellghet

1Taagken esghapagaqa Penniighaghaam qelpeghtekanga sivuliq seal‑elleq taakuneng maaghraghvinlegneng seal‑elleghneng. Tawanteftut estamat Unguvalghiit, nagaqughaqa ataasiq pilghii, “Tagi!” Menga kallugestun tengngaalghii. 2Taagken esghaghaqa qatelghii kuuni. Igleghutistenga ughluvelguftuq, qaghpalitaatlu. Ellnganguuq kayaalqiikaq anguyagmineng, enkaam aanuq kayaalqiimanginaghnaluni.

3Penniighaghaam qelpeghsaqminigu tuunglighhaa seal‑ellghem, nagaqughaqa tuunglighhaa Unguvalghii pilghii, “Tagi!” 4Ilanga kuunim aanuq, kavilnguuftuq. Igleghutistenga pilleghqalitaat yuget nekeggmetunnaniitesqelluki tuququutesqelluki. Tuunegkaatlu savigpagrugllagmeng.

5Taagken Penniighaghaam qelpeghsaqminigu pingayiitanga seal‑ellghem, nagaqughaqa pingayiitangat Unguvalghii pilghii, “Tagi!” Esghaghaqa tagnelghii kuuni. Igleghutistenga aapqaasilguftuq iiggmini. 6Nagaqughaqa mestun ayuqesugnilnguq akulngitni estamat Unguvalghiit pilghii, “Quart‑em imaa wheat‑a akikaa ataasim denarius‑em. Pingayut quart‑em imii barley‑t akikii ataasim denarius‑em. Iwernga naafqegpenakek olive‑em mesiigha, wine‑allu.”

7Taagken Penniighaghaam qelpeghsaqminigu estamiitanga seal‑ellghem, nagaqughaqa estamiitangat Unguvalghiit pilghii, “Tagi!” 8Esghaghaqa aghsaallaak kuuni. Igleghutistengan aatqeftaa Tuqulleq, Hades‑em maligtaa. Pilleghqalitkaaftuk tuquqiisqelluki estamaghqellghan nunam yugi savigpagkun, paneghaatelleghqun, aqnighneghqun, ugwighsalghiitgunllu teghikusiitgun nunam. 9Taagken Penniighaghaam qelpeghsaqminigu tallimiitanga seal‑ellghem, esghaghanka asinganilluki aghqefigem unguvasiit tuququqat. Tuqutkaqegkangit qayughllak ugpeqegkaqegkangit Kiyaghneghem akuzitangi, ungipaqumanginaqiitlu. 10Akilghuughllagtut, “Kaay Aghtughyaghqaghhaanghiteghllak Ataneq, agleghnaghtutenllu, ipapiguutenllu! Tamaakut nunam yugi tuququqat whangkunneng, naten tagkaan utaqiinnaqsiki nanqigsaghqaalukillu aghyuughyaghqaalukillu?” 11Taagken ataasikaghtiita unguvasiit tuqutkat qatelghiimeng atkuyaalitkiit, meghnaaliightesqegkiitlu. Tawaten piyaghqaagut qayughllak ilangi ugpeqaalgutngit, Christ‑amllu qepghaghtengi tuqusaghqaagut ellngita tuqutellghistun. Enkaam meghnaalinaqut kenlanga uglaghtalngit naamigtekata tamaakut tuqusaghqat.

12Esghapagaqa Penniighaghaam qelpeghsaqminigu aghvinliitanga seal‑ellghem nuna ufsuguteghllagtuq. Siqineq tagneghtaa suvinalghiitun qiipaghaghtun ulimakatun goat‑em melqwaneng. Tanqiqllu esleqngalghii aawestun lliightuq. 13Ighaleqetaaghet qilagameng ifkaquutut nunamun katam tawaten qigumangilnguut figs‑et ifkaquullghiit uqfigmeng anuqeghllagem ufsugutellghatun. 14Qilaga aviighutuq iimgat igat imellghistun, qamaglluteng naayghatlu qiighqatlu nuughquutut nemeggneng. 15Taagken nunam umiilgi, igleghutistengi, pilluwaghtet umiilgit, aklungilnguut, qiilngumightikayuget, tamaghhaghmeng qepghaghtelaaghet, qepghaghtelaaghunghilnguutlu iightuutut qayeni, akulngitnillu uyghaget naayghani. 16Naayghanunllu uyghagnunllu akilghuugut, “Ulleghvikikut iighesqelluta gginaaneng aqumgalghiim aqumutagkeni umiilgusim, sakraalleghllaganengllu Penniighaghaam! 17Kaatuq Aghneq aghyuughilleghqaghllagak whangkunnun enkaam kitumngam anaglleqagu!”

Currently Selected:

Revelation 6: ess

Highlight

Compare

Copy