Revelation 7
7
144,000 Israel‑eghmiit
1Tamaakut kingungitneng esghaghanka estamat yaqulget nekevghallghiit estamani kangighiitni nunam. Yaqulget nuqneqeftiit estamat anuqet anuqlinghitesqelluku nunami nalighmeng kelliini nalighmeng alngunak uqfigni. 2Taagken esghaghaqa ilanga yaqulek mayulghii asivaghmeng tugumiilek nalluniighutanganeng unguvalghiim Kiyaghneghem. Yaqulgem akilghuugii estamat yaqulget Kiyaghneghem tuunegkii aghtughyaghqaanghilleghmeng naafqesqelluku nuna, kelliillu. 3Yaqulgem pii, “Naafqegpenaan nuna nalighmeng kellii nalighmeng uqfiget! Utaqiitek kenlanga seal‑ellemnnun qawiitgun qepghaghtengi Kiyaghnemta.” 4Taagken nagaqughanka qafsingutangi yuget seal‑elaghtuqiit qawiitgun. Yuget uglaghtalangit 144,000‑nguftut tamaghhiitneng ramkenganeng Israel‑em.
5Judah‑m ramkenganeng 12,000‑nguftut,
Reuben‑em ramkenganeng 12,000‑nguftut,
Gad‑em ramkenganeng 12,000‑nguftut,
6Asher‑em ramkenganeng 12,000‑nguftut,
Naphtali‑m ramkenganeng 12,000‑nguftut,
Manasseh‑m ramkenganeng 12,000‑nguftut,
7Simeon‑em ramkenganeng, 12,000‑nguftut,
Levi‑em ramkenganeng, 12,000‑nguftut,
Issachar‑em ramkenganeng, 12,000‑nguftut,
8Zebulun‑em ramkenganeng, 12,000‑nguftut,
Joseph‑em ramkenganeng, 12,000‑nguftut,
Benjamin‑em ramkenganeng, 12,000‑nguftut.
Yulgughuteghllaget Maniguqangat Kiyaghneq
9Taam kingunganeng esghaghanka uglapestaaghllaget yulghuteghllaget kitum alngunak kestepagningilkangi! Tamaghhiitneng pinguftut nunataaneng, ramkeneng, yugneng, ulunengllu. Nekevghatnguftut umiilgusim aqumutam, Penniighaghaamllu sivugkenkun. Qiipaghaalluteng qatelghiineng, tugumiighlutengllu palm‑em uqfigan avayiitneng. 10Akilghuuteghllagtut,
“Yugulilleq Kiyaghnemta pikaa umiilgusigni aqumutagni aqumgalghii, Penniighaghaamllu!”
11Qamaglluteng yaqulget nekevuutut uvitangitni umiilgusim aqumutam, elder‑etlu, estamatlu unguvalghiit. Taagken sekequutut nunamun sivungakun umiilgusim aqumutam, manigughaat Kiyaghneq. 12Piit,
“Amen! Kiyaghneghput tamaghhaghmi usuqligu,
nighughqelligu, iqamsiqayugvikligu,
quulvaghligu qayughllak ellnganguuq peghqinellelek,
aghtughyaghqaanghillelek, iknaqelleleklu.
Ellnga tawatetuq quunperugllak kenlengunaan!
Amen!”
13Taagken ataasim elder‑eneng aaptaanga, “Kinkungaawat qatelghiimeng qiipaghaghngalghiit, nakenllu pingwaat?”
14Kiimsighaqa, “Yuguniiq, elpek liisimakaten.” Elder‑em piinga, “Taakunguut suflughutkat seghleliighrukutaaghllagmeng. Penniighaghaam aawakun aghvigluki qiipaghateng, qateghtestekaqiit.
15Tamaaken apalluqluku nekevghatnguut sivugkeni Kiyaghneghem umiilgusiin aqumutagkeni.
Manigughaqaat aghneghtuumaan unugtuumaan Temple‑ngani.
Aqumgalghiim umiilgusigni aqumutagni azigutighlleqii nayuutngalleghmineng.
16Iyatiqnanighllequt,
nalighmeng meqsugyugnanighllequt.
Siqinghem nalighmeng alngunak uguqnaghllalghiim ugunnaanghitii.
17Penniighaghaq umiilgusim aqumutam saaghwanilnguq penniighniightekelleqaat.
Maghyaghqughlleqii sengngulghiinun meghnun unguvallelitikayugnun, Kiyaghneghemllu quningightughlleqii.”
Currently Selected:
Revelation 7: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
