Revelation 5
5
Iimgat Igat, Pennighaghaqlu
1Taagken esghaghanka iimgat igat aghenqigneghan iigganilluki aqumgalghiim umiilgusim aqumutagkeni. Taakut iimgat igat igaghvikegkaaftut inglugtun, umegluteng maaghraghvinlek seal‑eneng. 2Taagken esghaghaqa aghtughyaghqaanghilnguq yaqulek. Iglagtuluni aaptilghii, “Kina itagnaghyaghqaawa ikughyaghqaaluki maaghraghvinlek seal‑ellghet qelpeghsaghqaaluki iimgat igat?” 3Taawa avangituq kitumeng alngunak qilagmi, nalighmeng nunami, nalighmeng nunam asingani itagnalghii qelpeghsaghqaaluki iimgat igat, esghaghyaghqaalukillu ilungit. 4Enkaam qiyaaghwaghllagtunga qayughllak naalkenghilkangat kina alngunak itagnalghii qelpeghsaghqaaluki iimgat igat, esghaghyaghqaalukillu ilungit. 5Taagken ataasim elder‑eneng piinga, “Qiyagpenang! Ii‑i, lion‑a. Judah‑m ramkenganeng pinguuq, David‑emllu kingunqaa. Kayaalqiistenguuq enkaam ellnga itagnaghtuq ikughyaghqaaluki maaghraghvinlek seal‑ellghet qelpeghsaghqaaluki iimgat igat.”
6Taagken esghaghaqa Penniighaghaq nekevghalghii saaghwani umiilgusim aqumutam. Qukiitniteftuq estamat unguvalghiit, elder‑etlu. Penniighaghaq esghaqaaluni nikimqun tuqutkaq. Maaghraghvinlegneng sighunelguftuq, maaghraghvinlegnengllu iyelguftuq. Taakut iyet maaghraghvinlek taghneghaqii Kiyaghneghem, kayagtekii tamaghhaanun nunam. 7Penniighaghaam takuluku umiillgusigni aqumutagni aqumgalghii, aghenqigneghan iigganeng tuwii iimgat igat. 8Tuguyaki iimgat igat, taakut estamat unguvalghiit, yuginaqlu estamat siipneqluku elder‑et sekequutut nunamun sivungakun Penniighaghaam. Tamaghaghmeng tugumiiqluteng harp‑meng, gold‑mengllu sagneghhaghneng esleqngalghiit incense‑meng. Incense‑et yughaqiit Kiyaghneghem yugita. 9Ilagaghtut nutaghameng ilagaatmeng whaten:
“Itagnaghtuten tuguyaghqaaluki iimgat igat,
ikughyaghqaalukillu seal‑ngit.
Tuqutkaalghiiten, aawhpenengllu tukfiqaqaten yuget Kiyaghneghmun.
Ellngit tamaghhiitneng pinguut ramkeneng,
uluneng, yugneng, nunataanengllu.
10Enkaam Ataneghpagullghanitestaten,
priest‑ngughtestatenllu Kiyaghnemnnun,
umiilgestunllu igleghutillequt nunami.”
11Esghapagumalunga nagaqughanka mengit yaqulelghuteghllaget. Uglaapiglleghhiit kestepagningilnguut. Nekevghatnguftut uvitangani umiilgusim aqumutam, estamatlu unguvalghiit, elder‑etlu. 12Iglagtuluteng piiqut,
“Penniighaghaq tuqutkaq,
itagnaghtuq allgeghsaghqaaluku aghtughyaghqaanghilleq,
aklungi, peghqinelleq, iknaqelleq, quulvalleq,
nighughqelleq, usuqelleqlu!”
13Taagken nagaqughanka tamaghhaghmeng ulimaaghet, qilagmelnguut, nunamelnguut, nunam asinganilnguut, kelliinilnguutlu. Qamaglluteng pilghiit aqumgalghiimunllu umiilgusigni aqumutagni, Penniighaghaghmunllu,
“Usuqillengitek, quulvallengitek, nighughqellengitek, aghtughyaghqaanghillelguteklu quunperugllak kenlengunaan!”
14Taagken estamat unguvalghiit piit, “Amen,” elder‑etlu sekequulluteng nunamnun, manigughagket Kiyaghneghenkuk, Penniighaghaankuk.
Currently Selected:
Revelation 5: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
