Acts 26

Paul Mesighalghii Sivungani Umiilgem Agrippa‑m

1Agrippa‑m pikaa Paul, “Taawa mesighaghyaghqaaghtuten, saaqsin akuzi.” Paul‑em iiggeni nengugulluki, pikaa,

2“Umiilegmi Agrippa‑mi, aghneghmi whani elngaatall aneghneghtunga sivugpeni mesighaghnaqelghiinga Jews‑et anaggutelqennikangitneng, 3qayughllak nallukenghitngwaaghaten Jews‑et nangaghneghitlu apalluqutkaqegkangitlu. Enkaam nangllegsipigllunga aaptamken nagataghtesqellunga.

4“Nunamnilnguutlu Jerusalem‑emelnguutlu qamaglluteng Jews‑et liisimakaat kiyaghtaalqa anglinghhaatemneng ima. 5Apeghyugyaqumegteggu liisimakegkaghteng apeghnayaghaatnga iiwleng qaatkutngalghiinga Jews‑et Liilightuusiitnun. 6Whaa Jews‑et tagistaatnga whavek nanqigtesqellunga qayughllak neghyukngukegka Kiyaghneghem unguvaghtilleghqaa tuqukaneng akequsaqegkaa sivunemnnun. 7Taanata akequsaq qula maalghuk siipneqelghiit ramkemta neghyukegkangat allgeghhnaluku, elngaatall maniguutnguluteng Kiyaghneghmun unugtuumaan, aghneghtuumaan. Umiilegmi, iwernga taana ataasiq neghyukilleq apalluqluku Jews‑et nanqigtesugaatnga. 8Sangafsi sumeghtaghaghaqetsi Kiyaghneq unguvaghtipagninginniluku tuqukaneng?

9“Sivunghani agani ugpeqepigtekaqaqa kipullginaalleghllaka elqughutnganiluku aatghaneng Jesus‑em Nazareth‑eghmiim. 10Tawaten pikaagunga Jerusalem‑emi. Chief priest‑eneng pilleghqangegkaagunga anusimingllaghtesnaluki ugpeqalghutet. Tuququghnaqngatki itagnaqepigtekaqanka tuqutesqelluki. 11Uglaghngaan aghyuughtestekaqanka tamaghhiitni synagogue‑nni, whatenllu pisnaqutkegkaqanka, ‘Ugpeqnaniimaaqa Jesus.’ Ugumiyagutepigtekaqanka repall malighqaqaqanka talwa Gentile‑et nunangitnun amyuutkennaluki.

Paul‑em Aapqanga Ugpeqaaghtelleni

12“Tamaaken apalluqluku Damascus‑etunga pilleghqalighlunga, qelellelighlunga chief priest‑eneng. 13Umiilegmi, igleghtaaluta aghneq qukaghitaquqlu esghaghaqa nighuk nighugataghalghii siqineghmeng, kuukgullghii qilagmeng pamaken. Elngaatall nighupiglluni kuukgutkaaguq uvitemnun, igleghalgutemnunllu. 14Qamaglluta ulleghaatukut nunamun. Taagken ma nagaqughaqa whaten pilghii Hebrew‑ghmiistun, ‘Saul, Saul! Sangama amyuutkesinga? Aqnighquuguten elpeneng amyuutkilleghpegun, tawateghpigaq ox‑em aqnighqullghatun ketngighqulleghmikun yugmi maghyaghquusii.’ 15Aaptaqa, ‘Kinanguzin Ataneq?’ Atanghem kiimsighaanga, ‘Jesus‑nguunga, amyuutkegken. 16Nekevi. Aliighvikamken qayughllak nakmikamken qepghaghtengulutenllu liisimakistengulutenllu. Apeghnaketen tamaakut esghaqaghten aghneghmi whani, tamaakutlu kelgusaghqanka kinguvaqun aliighvikegkumken. 17Yuguliiqnaaghamkenllu elpek katam yugpeneng, Gentile‑enengllu. Ellngitnun kayaggnaqngwaamken 18esghaghtestesqelluki, tunulluki mamlegmeng qiivesqelluki nighughmun, tunulluki Tughneghaam aghtughyaghqaanghillghaneng qiivesqelluki Kiyaghneghem aghtughyaghqaanghillghanun. Taagken Kiyaghneghem seghevulleqii seghleghqellghitneng, ilalleqiillu tamaavek aaftekaminun ugpeqillghitgun whangamneng.’

Paul‑em Aapqanga Qepghaqani

19“Umiilegmi Agrippa‑mi, qaatkegkaqaqa taana esghaghwaalqa qilagmeng. 20Sivuklunga ungipaqiinga Damascus‑mi taagken Jerusalem‑emi, tamanganillu Judea‑mi. Ungipaqiinga Jews‑enunllu Gentile‑enunllu avuteghqelluki seghleghqennanighluki qiivesqelluki Kiyaghneghmun, pinitunllu pisqanka ipapighqutkesqelluku avuteghqelluteng seghleghqennaniimatangi. 21Tawaten ungipaqilqa apalluqluku Temple‑mi Jews‑et tugulunga tuqunnaqutkegkaqaatnga. 22Iwernga Kiyaghneghem kayusiitaqaanga whavemun kenlanga, enkaam sivugpesigun nekevlunga aapghaqa Christ‑a pingwaaghllagnunllu ukavantalghiinunllu. Aapqaqa taananguuq ataasiq uuknaliqistetlu Moses‑emllu uuknaliqutkegkaat. 23Pikaagut Christ‑a ikfiqepestaaghlleqniluku enkaam sivuliiluni unguvaghyaghqaaniluku tuqulleghmeng. Apeghyaghqaanilukullu nighuga yugulillghem yugnunllu Gentile‑enunllu.”

Festus‑em Nallungughhnikanga Paul

24Paul mesighaamaluku Festus‑em akilghuughllakaa, “Paul, nallungughtuten! Liitelleghllagpek nallungughtestaaten!”

25Iwernga Paul‑em pikaa, “Governor Festus‑mi, nallungughtellghitunga, liisimalunga ipameng akuzinguunga. 26Umiilgem Agrippa‑m liisimakngwaaghaa tamaana enkaam tetugpenaan aleghqughaqa. Liisimakaqa nagaquqaqii qamaglluki tamaakut qayughllak aksaqluku pikaanghitut. 27Umiilegmi Agrippa‑mi, ugpeqaqsikii uuknaliqistet igaqegkiit? Liisimakamken ugpeqaqaten!”

28Umiilgem Agrippa‑m aaptekaa Paul, “Sumeghpenii‑i whaa takesqughhaan aleghqughlunga ugpeghtesnaqsingaa Christ‑ameng?”

29Paul‑em kiimsiqaa, “Takesqughhaaghngaan, nalighmeng taakluku aleghqughyaghngaamken yughaatkengngwaamken Kiyaghneghmun ugpeghesqelluten. Ellnginaghpek yughaatkengngunghitamken, yughaatkengngwaamsi qamagllusi nagallghiini whangamneng aghneghmi whani, whangamtun lliighesqellusi iwerngaqun qiipraghutngunasi!”

30Taagken Umiilek Agrippa, Governor Festus, Bernice, tamaakutlu ilangi nekevuutkat. 31Aanluteng ellmeggneng aleghquutkat, “Uumun yugmun sameng apalliitukut tuqutusighqameng nalighmeng anusimingllaasighqameng.” 32Agrippa‑m pikaa Festus, “Aanesnayaghaghput Umiilegpigaghmun nanqigtesqelluni pikaanghisaqan.”

Currently Selected:

Acts 26: ess

Highlight

Copy