Acts 25

Paul Nanqigtesulghii Rome‑em Umiilegpigaanun

1Festus kaasami Caesarea‑mun igleghutinaluni, pingayut aghneghet atughluki aghulaqegkaq Jerusalem‑emun. 2Tawani chief priest‑etlu, igleghutistengitallu Jews‑et ungipitkaat, Paul seghleliighqiighllakaaniluku Jews‑eneng. 3Sagiqutkaat Festus‑mun, Paul tagitesqelluku Jerusalem‑emun qayughllak aksaqluku tuqusukaat tumangani. 4Iwernga Festus‑em pikii, “Paul kelengakaqaghput Caesarea‑mi. Qantaghaqun uteghnighyaghqaagunga, 5igleghutistegpesi maliggnakangatnga. Elngaatall tawani sameng anaggusimakan apeghnakangat.”

6Festus Jerusalem‑emetaghaqaq pingayuneng inglulek nalighmeng qula aghneq, taagken Caesarea‑tkaq. Unaamingani nanqigtivigem aqumutagkenkun aqumluni aqfastekaa Paul. 7Tagisatgu, Jerusalem‑eghmiit Jews‑et kanglluqaghlluku anaggutaataghllagumanikaat iwernga ipapighqepagningitkiit anaggutellghi. 8Paul mesighaqaq, “Qaatkiganneghitanka Jews‑et Liilightuusiit, seghletun pingigatunga Temple‑mi, seghletun pimangitaqa Rome‑em Umiilegpigaa.”

9Festus‑em efqughsugluki Jews‑et aaptekaa Paul, “Jerusalem‑emi whangamnun nanqigtesugsiin?”

10Paul‑em kiimsiqaa, “Nakaa! Whaa Umiilegpigaam nanqigtivigani nekevghaanga enkaam tamaaken apalluqluku whani nanqigsaghqaagunga. Liisimakngwaaghan Jews‑enun anaggutellghitunga. 11Anaggusimakuma Rome‑em liilightuusaan pillghani repall tuqusaghqaalunga, anagnaqnaanghitaqa tuqulleq. Iwernga Jews‑et anaggunnillghat temngingukan, kitum alngunak Jews‑enun sastekanganga, taana yuuk qaatkunnaanghituq Rome‑em liilightuusaanun. Rome‑em Umiilegpigaanun nanqigtesugtunga.”

12Festus‑enkut agghilgutkullghiit agghinneghmeng taaqsameng Paul‑em piyukellghaneng, Paul pikaa, “Nanqigtesugulghiiten Umiilegpigaghmun, Umiilegpigaghmun aglaghllequten.”

Festus‑em Aapqanga Paul Umiilegmun Agrippa‑mun

13Taam kingungiighhaaneng Umiilek Agrippa kaatkaq Caesarea‑mun kelqelluku nayani Bernice, quyaknaluku Governor Festus. 14Tamaansimalukek Festus‑em ungipamsugutkaa Agrippa Paul‑meng. Pikaa, “Governor‑ngughsalghiinga Felix‑em yuuk anusimingllaghvigmetestaqeftaa maani. 15Jerusalem‑emellunga chief priest‑etlu, igleghutistengitallu Jews‑et ungipaataatnga Paul‑em anaggutellghaneng. Taagken aaptaatnga whangamnun tuqutestesqelluku, 16iwernga kiimsiqaqanka, ‘Whangkuta Rome‑eghmiini kinkut alngunak nanqigtegpenaki tuqusigataput. Liilightuusaput whaten pikaagut, ‘Seghletun pinikaat, sivukluni apeghtesaghqaaguq ipa pimatanga anaggunnistet nagatestekluki. Taagken liigikelleqaghput salleghqaghput.’ 17Enkaam Paul‑em anaggunnistengi tagilaghaasata aga unaamingani aqumegkaagunga nanqigtivigkun, tagitestekaqaqallu Paul. 18Anaggunistengi nekevuulluteng seghletun pillghi apeghyaqmegteki sumeghtaghaatkellemtun seghleghtutkanghiteftut. 19Taawanginaghhaq aaghtiiraaghumakangat ugpeqilleghmeggneng, taanallu yuuk aatqelghii Jesus‑meng tuqumaniluku, iwernga Paul‑em sagiqutkaqaa unguvaamaniluku. 20Liisimakepagunghitutemneng tamaakut, Paul aaptaqa nanqigtesugutanga Jerusalem‑emi. 21Iwernga Paul‑em kiimsighaanga, ‘Nanqigtesugtunga Umiilegpigaghmun. Kelengakestinga kenlanga aglaghtestelleghpenun ellnganun.’ Enkaam anusimingllaghvigmun kanaghtesneqigtaqa kenlanga aglaghtestelleghqamnun Umiilegpigaghmun.”

22Agrippa‑m pikaa Festus, “Whangallu nagasugaqa Paul.” Pikaa, “Unaami nagalleqan.”

23Unaamingani Agrippa‑nkuk Bernice‑enkuk iitqak qerngughutfigllagmun elngaatall aarraghwaaghlutek umiilgem aatkaaneng, maligtestekluki umiilgitlu pilluwaghtet, igleghutistengillu Caesarea‑m. Taagken Festus‑em itghutesqegkaa Paul. 24Festus‑em pikii, “Umiilegmi Agrippa‑mi, elpesillu qamagllusi whaanlengughni, una yuuk esghaqesi, Paul‑nguuq. Qamaglluteng Jews‑et maanlenguut, Jerusalem‑emelnguutlu qikeghqukegkaqaat whangamkun repall akilghuutkegkaqaat tuqusaghqaaniluku. 25Iwernga nanqigsaqegka sameng apalliiteftuq tuqusaghqaaluni. Ellmineng nanqigtesukaatanganeng Umiilegpigaghmun aglaghtesnaluku piiqaqa. 26Iwernga latatgun sameng ipapighqengngalghiimeng apeghyaghqiitunga Umiilegpigaghmun uumeng yugmeng ayuqelghiimeng. Enkaam tagitaqa sivugpesinun, kiyang elpenun Umiilegmi Agrippa‑mi! Neghyukaqa aapqughaaqumteggu sameng latasighqameng naalkefiknayukamkun. 27Whangamni temnginguuq aglaghtestekumkun anusimingllaghaq Umiilegpigaghmun sameng anaggutelleghmeng apallungunaan.”

Currently Selected:

Acts 25: ess

Highlight

Copy