Acts 27

Paul Aglaaskangat Rome‑emun

1Festus‑em Italy‑tesqesugyinkut angyaghpagkun, aglaatestekii Paul‑llu ilangillu anusimingllaghat umiilwaaghmun Julius‑mun. Julius‑enkut pilluwaghtekullghiit aatqelghiit, “Umiilegpigaam Pilluwaghtengi.” 2Taawa angyaghpak Adramyttium‑emeng pi, aghulaqsaqleggiinaaghtekaq nenun Asia‑m esnenganilngughnun. Tawavek uuglluta aghulaqukut. Aristarchus‑em maligtiinkut Thessalonica‑ghmiim. (Thessalonica Macedonia‑melnguq). 3Unaamingani kaatukut Sidon‑mun. Julius‑em pinitungwaaq pikaa Paul, laalightestaqluku ilakumtaaghanun Sidon‑mi, sameng aklukegkaaneng tuunaqluku pisqelluku. 4Sidon‑meng aghulaqukut anuqa aygumun enkaam igleghtukut uqiinellghakun qiighqam Cyprus‑em. 5Igleghaakut esnengakun Cilicia‑mllu Pamphylia‑mllu, taagken nagneghtukut Myra‑mun Lycia‑melngughmun. 6Tamaanteftuq angyaghpak Alexandria‑meng pi, enkaam Umiilwaaghem Julius‑em liigikluku Italy‑nnaqutanga uugtestiinkut.

7Nunmaasqughhaq igleghtukut qafsinegyagllak aghneq, iwernga piyaqliighngaamta kaatukut Cnidus‑mun. Anuqliitem igleghapagningiitesinkut taagavek, igleghtukut uqiinellghakun qiighqam Crete‑em, naghughlluku Salmone. 8Esnengiighhaakun igleghtukut piyaqliighngaamta, kaatukut kangighamun aatqelghiimun, Uqitaghvik Kangighaq, taana qantaghanlenguq Lasea‑meng.

9Tamaanteghllagtukut qenwat yakughnaghtaa taakluku igleghamun, siingenllu Aghneq naghughlleghhii priest‑et aghqerraaghvigat seghleghqellghitnun Jews‑et. Enkaam Paul‑em kelengasaaghii angyaghpagem umiilwaaghi. 10Pikii, “Ukughsi yugni, sumemni whaa elngaatall yakughniighnaqukut igleghallemnni. Iflaaqelteggullu angyaghpagput usituumaan, entaqun talwa tuqulaghaallequkut.” 11Iwernga Umiilwaaghem Julius‑em nagatkaqegkek angyaghpagemllu umiilga, angyaghpaleklu yuuk avelghaghluku Paul. 12Allullutengllu angyaghpagem yugi igleghsukat qayughllak taana kangighaq yakughnalghii angyaghpagmun uksughfiguluni. Kaannaqnaluteng Phoenix‑mun pikat uksughsaghqaaluteng tamaani. Phoenix‑em kangighaa qiighqamelnguq Crete‑mi, northwest‑munllu southwest‑munllu ayuqelghii.

Anuqlilleghllak

13Ikegkemeng anuqataghaaghsan angyaghpagem yugi pikat, “Taanata anuqa utaqakaghput.” Enkaam uyghiita sayugluku telanangaakut Crete‑em esnengiighhaakun. 14Iwernga anuqlighllagtuq nakaghyameng enkaam qiighqameng atghaghteghllagaa. 15Angyaghpak awatmun tengsagu quutmun taglaghnaqutkesaghluta iilqayugtukut enkaam upuupeng tengtestukut. 16Qiighqasqughhaam Cauda‑m uughqanganun lliighusinkut uqiteghraagtukut. Tawani qamuqsaqefut angyaghhaghput piyaqliighutkeghngaamteggu qaakaghput. 17Taagken angyaghpak ayugighsaghaat asighlluku tapghaghmeng. Alingluteng qenaaghllughquunnayukameng Syrtis‑mi telanangat ifkaghqughluki tengtestukut. 18Unaamingani paninang esla almesiqeghllagyagu, angyaghpagem usingan ilangi meghmun ateghqughiit. 19Awakaghaani esla almesiqsagu angyaghpagem sanqutngi ateghqughiit. 20Qafsinegllak aghneq siqinngunani, ighaleqetaangunani piiq eslam seghleghllagem angtalanganeng. Enkaam talwa iilqayugtukut, isigimaqun tuqulaghaannaqelghiikut.

21Yuget neghegpenateng muluughllagyata Paul‑em nekevluni pikii, “Ukughsi yugni, nagatkaqsaqufsinga kennayanghilnguukut Crete‑meng enkaam aghsaan seghleliighnayanghitusi, saghyangiinnayanghitusi. 22Iwernga iilqayugpenasi, nalighhiinaghsi tuqunaanghituq iwerngaqun angyaghpagiillequkut. 23Unuk Kiyaghneghem yaqulgan takukaqaanga. Taanata Kiyaghneq manigughaqegkegka, ellngan pikaanga. 24Yaqulgem piinga, ‘Paul, alingegpenang, kaallequten Rome‑emun, nekevellequten sivungakun Umiilegpigaam. Yughaatkegkaqutegpeneng angyaghpagmetelguteten qamaglluki Kiyaghneghem yugulilleqii.’ 25Enkaam quyatek, ugpeqiinga Kiyaghneghqun tawatetngwaaghesqelluku ungipaatellemtun. 26Iwerngaqun angyaghpagiillequkut qiighqami.”

27Qula estamat siipneqluku unuk Kelliimi Adriatic‑mi tengtiinkut. Taakwani unugem qukaani yulaaghet piiqut quutmun tughwaaghsugninniluta. 28Tapghaq uqigkutighluku meghmun ateghsaqmegteggu yuginaq yaagneq uusqaghtutkaftuq. Tazingapighqaaghyamta tapghaq ateghllaataghyaqmegteggu akimigaq yaagneq uusqaghtutkaliimalghii. 29Yulaaghet alingegkat angyaghpak qalmesinnayukan enkaam estamaneng uyghighaat kingungakun. Taagken yughaghtut aghhragkiighesqelluku. 30Angyaghpagem yulaaghi anagnaqegkat sivuyaga angyaghpagem uyghiitelighnaqesighwaaghutkelluku, angyaghhaq meghmun ateghtekaat. 31Iwernga Paul‑em pikii umiilwaaqlu pilluwaghtetlu, “Ukut yuget aghulaqegkata kayutepagiillequkut enkaam elpesi tuqulaghaallequsi.” 32Enkaam pilluwaghtet angyaghhaq keputkaat.

33Aghtaghaghnaqaqaallu Paul‑em qamaglluki neghesqughwaaqii, pikii, “Qula estamat siipneqluku aghneq neghelqunghitusi qayughllak elngaatall kelengaruulghiisi. 34Tamaaken apalluqluku neghesqughwaaghnaqamsi iknaqughtesqellusi. Nalighhiinaghsi tuqunaanghituq talwa aqnighhnaanghituq.” 35Nepiighyami neqekrangllameng tugulluni igamsiqayugvikluku Kiyaghneq manungitni ikulluni neghegkaq. 36Yuget ilutughsaghyisteng ellngitlu qamaglluteng neghuutkat. 37Qerngaghllagemta angyaghpagmelngughni 276‑nguukut. 38Qamaglluteng neghuunneghmeng apeghiighyameng angyaghpak uqengellinaluku wheat‑a meghmun ateghqughaat.

Angyaghpagiitelleq

39Aghsagu quutmeng esghaatut, taawanginaq liisuqenghitaat natungutanga. Iwernga kangighalguftuq esnalegmeng enkaam taaggun tamlagnaqsugtut. 40Kepuulluki uyghiitet unitkiit meghmelluki, petugutiiklu aquutak naghighquqiit. Taagken sayugluki telaanangat sivuyagmelnguut tengtestut tespikavek esnamun. 41Iwernga angyaghpagem sivuyaga aghqitaghisan kingunga qagighllaget kagimtaat.

42Pilluwaghtet piyaghiit anusimingllaghat tuququghnaluki luuraq quutmun pugimluteng navek anagnayukata. 43Iwernga umiilwaaghem tuqutesugumangitkaa Paul enkaam iinghutkii. Yeghlegi qelqii pugimaqayuggaat quutmun tagliisqelluki. 44Tamaakut pugimellgilnguut angyaghpagem ikellghaakun tuguluki taglaghnaqesqegkii quutmun. Tawaten qamaglluta yaywaaseng uuglleghaatukut quutmun.

Currently Selected:

Acts 27: ess

Highlight

Copy