2 Timothy 4

1Christ Jesus tagikumi igleghutinaluni Ataneghpagulleghmini, nanqiglleqii unguvalghiitlu tuqukatlu. Enkaam nagasimanghegkeni Kiyaghneghenkuk Christ Jesus‑enkuk, qelghamken 2ungipaqiki Pinilghiit Ungipat. Sagiqluten ungipaqiki yugnun nagasugughngaata nalighmeng nagasugunghiteghngaata. Nekeggmelluten apeghtughilleghpegun ugpeghtesnaqiki, ineghtiki anaggutellghitneng, kayemikillu. 3Pilleghqaq taginguuq yuget nagasugnanighllequt ipapignun apeghtuusanun. Ivaghillequt piyukegkameggneng apeghtughistelghutneng nagatepigesnaghnaluki nagaqughyukegkaghhiinateng. 4Nagasugnanighllequt ipapilleghmun, nagasugyagullequt temnginun ungipaghanun. 5Iwernga elpek iiwleng nekeggmelluten, nagneghutigu sangwaa piyaghqan ikfiqngughngaaghpek, ungipaqikestaa Pinilghiineng Ungipaneng. Elpek qepghaghtekegkangaten Kiyaghneghem, apeghiighhu qamaglluku qepghaqaq elpenun pisqegkaa.

6Whanga aghqutkesaghqaaghsimaanga Kiyaghneghmun, tuqulleghqaqa kaasaghtuumaaq. 7Pilluwaamaaqa pinilghii pilluwalleq, apeghiighaqa kilgaaqulqa, ataasiighmesimanginaqaagunga Ataneghmun. 8Enkaam taawa Kiyaghneghem utaqiitngwaa whangamnun qaghpanga elqughutngallghem. Atanghem elqughlluku nanqigtistem akileghtughlleqaanga Nanqigtillghem Aghneghani. Whanganginaagpenanga iwernga akileghtughlleqii qamaglluki tamaakut qelanelghiit tagilleghqaaneng.

Paul‑em Taaqniitngi

9Pinaqellghaagken qamagllukek tagiragkiighi whangamnun. 10Demas‑em piniqsaliisimaa nunam kiyaghtaallgha enkaam unisimaanga, aghulaqumaaq Thessalonica‑mun. Crescens Galatia‑simaaq enkaam Titus Dalmatia‑mun pimaaq. 11Luke‑nginaghhaq whangamnituq. Mark aqfaluku kelqennaken qayughllak kayutkepigtaqa qepghallemni. 12Tychicus Ephesus‑mun kayagsimaaqa. 13Troas‑mellunga unitkaqagka qaasligka Carpus‑enkuni. Taginaqegkuvek tagitaghhnakegken. Tagitaghhnaketenllu iimgat iganka, kiyang taakut amiirameng ulimaaghet.

14Alexander‑em siilumeng sangllaghtem elngaatall seghletun pikaqaanga. Atanghem aghyuughnaaghaa tawaten pillghaneng. 15Elpeklu kelengakluku tawaten pinayukangaten qayughllak ungipaghput ugumikepigtaa.

16Nanqigtistemun aglaasuwhaaghaqngatnga kitum alngunak mesighaasaghtullghitaanga, yeghlegi uniqaghaatkaqaatnga. Yughaatkaqanka Kiyaghneghmun akinaqefqiita pisqelluki tawaten pillghitneng. 17Iwernga Ataneq whangamnitkaaguq. Iknaqusiqaqaangallu ungipaqesqelluki iinguniita Pinilghiit Ungipat qamaglluki Gentile‑et nagaqiisqelluki. Enkaam Kiyaghneghem yugulikaqaanga tuqutelleghqameng. 18Atanghem yuguliyaghqaqaanga tamaghhaaneng seghleghem sughugallghaneng, enkaam paqnanangunaan aglaalleqaanga qilagmelngughmun Ataneghpagulleghminun. Ellnganun usuqilleq quunperugllak kenlengunaan. Amen.

19Ungipaataghhnaketen Priscilla‑nkuk Aquila‑nkuk, Onesiphorus‑enkutlu nengllugutkullghiit suumqaqankanguq. 20Erastus unegtekaaguq Corinth‑mi; qinuyugutanganeng Trophimus unitkaqaqa Miletus‑mi. 21Uksughvagilgan taginaqeghllagi.

Eubulus‑enkut, Pudens‑enkut, Linus‑enkut, Claudia‑nkut, ilangitallu ugpeqaalgutet ungipaatesqiisi suumqaqiisinguq. 22Ataneq taghneghaghpenilli, quyaslisillu.

Currently Selected:

2 Timothy 4: ess

Highlight

Copy