Titus 1

1Ukut latat Paul‑meng pinguut qepghaghtenganeng Kiyaghneghem, apostle‑nganengllu Jesus Christ‑am. Kayagtekaagunga kayusiitesqelluki Kiyaghneghem nakmikegkii yuget ugpelleghtughtaghiisqelluki, liitesqellukullu ipapilleq. Taam ipapillghem kayusighlleqii yuget kiyaghtelleghqiit Kiyaghneghem piyukellghatun. 2Taagken ataasimeng ipapilleghmeng sighimallelguukut kenlengilngughmeng unguvalleghmeng. Iqlengiqigatngwaaghem Kiyaghneghem akequsaqegkaqaa taana unguvalleq ima ayumirugllaggaaneng. 3Enkaam pilleghqaghlluwaaghmini Kiyaghneghem liitestekaqaa taana kenlengilnguq unguvalleq ungipamikun. Whangamnun neghyukutkaqaa ungipani enkaam ungipaqaqaqa qelghutellghatun Kiyaghneghem Yugulighistemta.

4Ukut latat Titus‑mun pinguut, ighnepikamken ugpeqillemtegnegun. Kiyaghneghem Atam, Christ Jesus‑emllu Yugulighistemta quyaslitenllu nekeggmellelguslitenllu.

Titus‑em Qepghaqaa Crete‑mi

5Unitkaqamken Crete‑mi, apeghiighesqelluku qepghaqaghput apeghiillghilnguq. Nakmiightiisqesugamken Elder‑kaghqameng yughaghvignun tamaghhiitni town‑et. Neqamikluki qelghutkanka: 6Elder‑kaghqaq avutngisaghqaaguq; ataasimeng nuliilguyaghqaaguq, avaqutiillu ugpeqaayaghqaagut; nelliqneghuyaghqaanghitut, qaatkusigasaghqaanghitutlu. 7Igleghutistengutmineng Kiyaghneghem qepghaqaanun, Elder‑a avutngisaghqaaguq. Yukeghqenghuyaghqaanghituq, nalighmeng kaatqaghtaamanguyaghqaanghituq, nalighmeng suumestenguyaghqaanghituq, nalighmeng suuglluguyaghqaanghituq, nalighmeng pakigneghuyaghqaanghituq aklungighinaluni. 8Itupill upughanghuyaghqaaguq, piniqistekaghqaqaa pinillghem. Nuqenneghtuyaghqaaguq, elqughutngayaghqaaguq, taghneghagmikun pelungisaghqaaguq, nuqetutiyaghqaaguq alngunak seghleghmeng. 9Ellnga ataasighmesaghqaaguq ipapignun apeghtuusanun apeghtughallengelleghmitun. Atuqluki ipapiget apeghtuusat kayemelleqii yuget, liigikesleqiillu apeghtughistesighwaaghet anaggutnganiluki.

10Uglaapigtut qaatkusugigalnguut, temngi akuzilghiit puughtilghiit ilameggneng, kiyang tamaakunguut apeghtughilghiit Gentile‑et ugpeqiit circumcise‑eyaghqaaniluki. 11Taaqestiki tawaten apeghtughillghitneng. Temngimeng apeghtughilleghmegteggun alngunaseghaghqaqiit iinguniita nengllugutet. Apeghtughiiqut apeghtuusaghqaqenghilkemeggneng; tawaten piiqut aklungighipigesnaghnaluteng. 12Ataasim Crete‑eghmiim uuknaliqistem pikaqii, “Crete‑eghmiit quunpeng iqlengaghtut, ugighsalghiistun teghikusastun ayuqut, ighsanitalghiinguutlu negheghllaget.” 13Tawaten pillgha ipanguuq. Taana apalluqluku qevuulluki aghyuughqi Crete‑eghmiit ugpeqiit ugpeqesqelluki ipapiget apeghtuusat. 14Ungipaatiki nagannanighlitkinguq Jews‑et temngi ungipaghaatangit. Qaatkennanighlitkinguq yuget qelghusangllaqiit. Taakunguut ighsakikat ipapigneng apeghtuusaneng. 15Sangwaa qamaglluni pelungituq tamaakunun pelungilngughnun. Iwernga sangwaa qamaglluni pelunginneghituq tamaakunun pelunginneghilngughnun. Kiyaghtengnguut seghleghqelleghmi, ugpeqigataatlu Christ‑a. Umyugiitlu sumeghneghitlu nukeggnaghtekaagut, enkaam liigiksaghqaananiimaat pinilleqlu seghlelleqlu. 16Liisimakniiqaat Kiyaghneq iwernga kiyaghtaallghita ipapighqaqaat nallukutanga: ugumiknipigtut, qaatkusigatut, sasiinghitutlu sangwaa alngunak pinitun pinaanghitaat.

Currently Selected:

Titus 1: ess

Highlight

Copy