2 Thessalonians 2
2
Seghlepestaaghet Piyaghqaagut
1Ugpeqaalgutemnni, ungipaasugamsi tagilleghqaaneng Atanemta Jesus Christ‑am, qerngughutelleghqamnnengllu ellnganun. 2Umyugasi qapragaghtesunghitngwaaghaput nalighmeng kakavesunghitaput nagaququfsigu Aghnegha Atanghem kaasimaniluku. Entaqun kitum uuknaliqutkegkaqaa, nalighmeng kitum ungipaqegkaqaa, nalighmeng kitum latatkumaniluku whangkunnun pikaqaa. 3Iwernga puughtestegpenasi! Taana Aghnegha Atanghem kaannaanghituq kenlanga yuget malighqutaqsugnanilghitnun Kiyaghneghem igleghutillghanun, kaatellghanunllu Seghlepestaaghem Yugem. (Ellnga naafqesaghqaaguq hell‑mi.) 4Taam yugem kipullginaaghlleqii kiyaghnengllaqat nalighmeng manigughyaghqat, tamaakuneng ellmineng qulighpigaaghsaghqaaguq. Enkaangam iteghluni Kiyaghneghem Temple‑nganun aqumluni Kiyaghneghunillequq.
5Neqamikenghistegguu salin elpesinillunga ungipaatkaqegkemsi tamaaken? 6Liisimakaghsi kitum maaten nuqneqaqaa Seghlepestaaq Yuuk tagilleghqaaneng. Wetku aghneni kaaskan tagillequq. 7Aawallu qayvighsimangilnguq aghtughyaghqaanghillgha seghleghqellghem qepghaaghsimaaq nunami. Iwernga maaten kitum kimaawistaqaa taana seghleghqelleq. Kimaawististenga tawaten pillequq kenlanga Kiyaghneghem iqitestellghanun. 8Taagken Seghlepestaaq Yuuk aliightesllequq, iwernga Atanghem Jesus‑em tagikumi tuqulleqaa aneghneghaneng qaneghmi, naafqelleqaallu nighugllagakun tagilleghmi. 9Sivutghulluku Atanghem Jesus‑em tagilleghqaa, Seghlepestaaq Yuuk tagillequq aghtughyaghqaanghillelighluni Tughneghaghmeng. Taana Yuuk allaaghlluwhaghtisighwaaghllequq allaaghhiinaghmeng saghiighanalghiineng. 10Atuqelleqiillu allaaghhiinaat seghleghet puughhnaluki tuquyaghqat. Tuquyaghqaagut qayughllak ugpeqsunghilkangat ipalleq yugulisighqaqsaqeseng. 11Tamaaken apalluqluku Kiyaghneghem puughneqguutesleqii ugpeqesqelluki sangwaat ipangunghilnguut. 12Enkaam qamagtengngwaaghluteng ugpeqinghilnguut ipapilleghmeng nanqigsaghqaagut aghyuughyaghqaaluteng qayughllak pinighyuugusiqegkangat seghlleghqelleq.
Nakmikegkaagusi Yugulilleghmun
13Ugpeqaalgutemnni, iiwleng iqamsiqayagusaghqaqamsi Kiyaghneghmun, elpesi piniqegkiitni Atanghem. Iqamsiqayugvikaqaghputlu Kiyaghneq qayughllak nakmikegkaqiisi yugulisqellusi ima piinlighyuwhaallghaneng nunam. Yugulikaagusi pelungighsallghakun Agleghnalghiim Taghnegham, ugpeqelleghpesigunllu ipapilleq. 14Tawaten kiyaghtaalleghmun Kiyaghneghem tagsiqaqiisi Pinilghiitgun Ungipatgun ungipaqegkamegteggun; tagisqaqiisi piliitesqelluku nengighqaghsi pinighnallgha Atanemta Jesus Christ‑am. 15Enkaam ugpeqaalgutemnni, aghuliitekestaghtek, ugpeqekestaghteggu ipapilleq apeghtuutkaghput elpesinun ungipaqillemteggunllu latallemteggunllu.
16Kiyaghneghem Atamta, piniqistemta, nangllegtalleghmikun tuunegkaqiinkut kenlengilngughmeng ilutulleghmeng, pinilghiimengllu sighimalleghmeng. Atanemta Jesus Christ‑am ellngan katam, Kiyaghneghemllu Atamta, elkegkenka 17ilutughsaghlisillu, iknaqughsaghlisillu tamaghhaakun pinilghiikun qepghalleghpesigunllu akuzilleghpesigunllu.
Currently Selected:
2 Thessalonians 2: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
