2 Thessalonians 1
1
1Ukut latat Paul‑meng, Silas‑meng Timothy‑mengllu pinguut. Ugpeqanun Thessalonica‑melngughnun Kiyaghneghem Atamta pingitnun, Atanghemllu Jesus Christ‑am.
2Nangllegtalleqlu nekeggmelleqlu elpesinun pinguuk Kiyaghneghmeng Atameng, Ataneghmengllu Jesus Christ‑ameng.
Nanqigtilleghqaq Christ‑am Tagillghani
3Ugpeqaalgutemnni, iiwleng iqamsiqayagusaghqaqamsi Kiyaghneghmun. Elqughutngaaq tawaten pilleghqaghput, qayughllak ugpeqineghtughtaghalghiisillu, piniqutaghaghlusillu lliightusi. 4Tamaaken apalluqluku qanatkaqamsi ilangitnun ugpeqat Kiyaghneghem yughaghvigitnilngughnun. Aapghaqaghput nuqetutineghtulleghsillu, ugpeqilleghsillu qaywa amyuutkellengeghngaaghpesi, ikfiqellengeghngaaghpesillu.
5Tamaakut ipapighqaat Kiyaghneghem nanqigtillgha elqughutngalghiinguuq. Enkaam Kiyaghneghem aapghiisi itagnaghnilusi kiyaghtesqellusi Ataneghpagulleghmini qayughllak ikfiqutkengngukesi. 6Kiyaghneghem piyaghqaqaa sangwaa elqughutngalghii: ikfiqesaghqaqii tamaakut ikfiqestilghiit elpesineng. 7Enkaam elpesi ikfiqelghiini Kiyaghneghem meghnaalisnaaghiisi ikfiqelleghmeng whangkutallu maligulluta. Tawaten pillequq aliightekumiki Ataneq Jesus, iknaqeghllalghiitlu yaqulgi. Qilagmeng ukigllequt keneghmelluteng kumaghughngalghiimi. 8Taagken Jesus‑em aghyuughlleqii tamaakut nallukilghiit Kiyaghneghmeng, qaatkusigalnguutlu Pinilghiineng Ungipaaneng Jesus‑meng ayuqelghiit. 9Aghyuughnaqngwiillu kenlengilngughmeng naafqelleghmeng, iqitesnaqnguutlu Ataneghmeng, nighuganengllu aghtughyaghqaanghillghan. 10Tamaakut piyaghqaagut tawani Aghneghmi Ataneq Jesus tagikan. Qamaglluteng yuget ugpeqikat ellnganeng usuqelleqaat, saghiighayagulleqaatlu. Elpesi akulngitnillequsi qayughllak ugpeqegkesi ungipaq aapqaghput elpesinun.
11Enkaam quunpeng yughaatkaqamsi whaten: Kiyaghneghem apeghlisi kiyaghtengngunilusi ellmi kiyaghtesqesulleghmitun. Aghtughyaghqaanghilleghmikunllu naamiglligu qamaglluku piyukelleghsi pinilleghmun, qepghallghillu ugpeqilleghpesi. 12Enkaam aatgha Atanemta Jesus‑em quulvallengellequq elpesigun, elpesillu ellngakun quulvallengellequsi nafughtallghakunllu nangllegtallghakunllu Kiyaghnemta, Atanemtallu Jesus Christ‑am.
Currently Selected:
2 Thessalonians 1: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.