2 Thessalonians 3
3
Yughaatkitekut
1Ugpeqaalgutemnni, taaqniitkun sameng piighaataqaghlamsi. Yughaatkitekut Atanghem ungipaa mingirragkiighesqelluku, yugnunllu quulviisqelluku, katam elpesi pilleghpesistun. 2Yughaatkitekutlu Kiyaghneghmun yugulisqelluta seghleghneng yugneng, qayughllak uglalghii yuuk ugpeqillelgunghituq.
3Iwernga Ataneq ataasiighmetuq; iknakqughsaghlleqiisillu paqniighsaghlleqiisillu Tughneghaghmeng. 4Atanghem nalluneqniighumaa whangkunnun qaatkutnguusi qelellemnnun, qaatkumanginaghlleqaghsillu.
5Atanghem liigikeslisi wataqaaghaq Kiyaghneghem piniqellghaneng, Christ‑amllu nuqetutineghtullghaneng.
Qamaglluteng Ugpeqat Qepghaghlit
6Ugpeqaalgutemnni, aatghakun Atanemta Jesus Christ‑am qelghamsi iqitngasqellusi tamaghhiitneng ugpeqaalgutegpesineng ighsanitalghiinengllu malighqutaqigalngughnengllu apeghtuutkamnneng elpesinun. 7Elpesi katam liisimakaghsi ayuqesighaghyaghqaqsaghaghpekut; elpesinilluta ighsanitiqumangitukut. 8Tugukliigataput neqet kinkuneng alngunak tukfillngunaki. Iwernga unugtuumaan, aghneghtuumaan qepghaqaagukut, ughleghiiqaagukut uqigtuqutnguyunghitutemnneng nalighhiinaghpesinun. 9Elpesinun aapsaqleguyaghtukut kayusiitesqelluta, yeghlegi qepghaqaagukut aflengaknaluta whangkunneng usputaanaluta elpesinun ayuqesighiisqelluta. 10Talwa elpesinilluta whaten qelqaqegkemsi, “Kina alngunak qepghaghyunghilnguq neghestegpenaan.”
11Tawaten pikaagukut qayughllak nagaqughaqukut ilasinguq ighsanitaghtut, qepghaghyugigatut, yeghlegi yanutqwaaqiinguq yuget. 12Aatghakun Atanghem Jesus Christ‑am qelghaputlu kayemaputlu tawatelnguut yuget ighsanitiqefqiita allgheghutesqelluki kiyaghusighqiitneng.
13Ugpeqaalgutemnni, qinuyagutegpenasi pinitun pineghmeng. 14Kina alngunak qaatkusunghilkan sameng pillemnnun ukutgun latamteggun, suumqennakesi kinkungutangi. Enkaam iqitngalghaasi ellnganeng kaynguyugesqelluku anaggutellghaneng. 15Iwernga kiyaghutegpenaan anguyaguluku, itupill kelengasaaghteggu ugpeqaalgutkelluku.
Taaqniitet
16Atanghem ellmineng katam nekeggmellelitikayugem, nekeggmellelisilli iiwleng sami tamaghhaani. Ataneq tamaghhaaghpesinilli.
17Whanga, Paul whanga katam iiggemneng igaqaqa piniqilqa elpesinun. Tawaten igaghaqunga qamaglluki latamkun elpesinun liisimakesqelluki whangamneng pingutangi.
18Nangllegtallgha Atanemta Jesus Christ‑am tamaghhaghpesinilli.
Currently Selected:
2 Thessalonians 3: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
