2 Peter 3
3
Akequsaq Atanghem Tagilleghqaanun
1Ilakumtaamni, ukut alghiitkii latalleghma elpesinun. Tamaghhaagkenkun latalleghma neqangughtesnaqutkamsi liisimakegkaghpesineng. Sumeghtaghiisqesugamsi tamaakuneng ipapighqellusi. 2Elpesinun neqamikesuganka agleghnalghiit uuknaliqistet uuknaliqutkegkiit. Neqamikesugaqallu qelghusaq Atanemta Yugulighistem aapqaa apostle‑egpesigun. 3Liigikngwaaghyaghqaqaghsi una: kingulighni aghneghni legasiighwaghtelguyaghqaaguq; tamaakunguut malighqutaqngalghiit seghleghnun piyukegkameggnun. Legasiighwaatkelleqaat Kiyaghneghem akequsaa, 4whaten pillequt, “Jesus akeqikaaguq taginqiglleqniluni. Naagu? Ima sivuneput tuqulaghaatellghitneng, paninang sangwaa qamaglluni almesiqaqaa nunam piinlillghaneng.” 5Nakmiiqaagut avelghasingwaaghnaluku una ipapilleq: neghighluku Kiyaghneghem akuzitmikun ulimakaqaa qilaga, ulimakaqaallu nuna meghmeng, meghqunllu. 6Taagken Kiyaghneghem meghmeng ulevesluku nuna naafqegkaqaa. 7Iwernga taaggun akuzitkun Kiyaghneghem aflengakaqii qilagallu nunallu naafqesaghqaaluki keneghqun. Aflengaknguut kenlanga aghneghanun nanqigtillghem. Tawanillu aghneghmi naafqelleqii yuget avelghasingwaaghikat ellmineng.
8Ilakumtaamni, puygugpenaan una! Ataneghmi aghneq ataasiq thousand ayumiqullghestun ayuquq, thousand ayumiqullghet ataasitun aghneghtun ayuquq. 9Ataneq egnaanginneghituq akequsani piyaghqaaluku, ilangita yuget sumeghtaghallghistun. Yeghlegi nekeggmetutaqiisi qayughllak kina alngunak iflayugunghilkanga. Itupill tamaghhaan yuuk avuteghqesqesugaa seghleghqellghitneng.
10Iwernga Aghnegha Atanghem tagillequq teglegniightetun. Tawani Aghneghmi qilaga aviighusaghqaaguq eftughuuteghllagmeng. Sangwaat qamaglluteng qilagamelnguut kenghem ughuglleqii. Qamagllutengllu nunamelnguut paneghllequt. 11Qamaglluteng tamaakut ughugyaghqaatangitneng, elpesi yugni natelnguunaqetsi? Kiyaghtaallesi pelungillit, Kiyaghneghmunllu ayuqlit, 12utaqiimalusi Aghneghanun Kiyaghneghem. Pinaqellghaghsi qamaglluku pinitun pitek aghneq tagiragkiighesqelluku. Tawani aghneghmi kenghem naafqelleqaa qilaga, maatneghemllu ughuglleqii sangwaat qamaglluki qilagamelnguut. 13Iwernga whangkuta utaqiinguukut Kiyaghneghem akequsaqegkaaneng. Pikaaguq nutaghameng qilagangllaghlleqniluni nutaghamengllu nunangllaghlleqniluni. Tawani elqughutngalghiinginaat kiyaghllequt.
14Enkaangam ilakumtaamni, utaqiimalusi tawavek Aghneghmun pinaqellghaghsi qamaglluku pelungiteklu afkuyiiteklu Kiyaghneghem esghaamallghani. Nekeggmeteklu Ellngani. 15Sumeghmikiteggu Atanemta nuqetutillgha elpesineng yugulillengesqeqaghllusi. Piniqegkamta ugpeqaalgutemta Paul‑em aapqaqii taakut ataasit lataaqngamisi peghqinellelighluni Kiyaghneghtameng. 16Latatkegkaqii tamaakut qamaglluki latamikun. Nalighneghi Paul‑em latangan liigikneghlluguut. Yuget liigikellepagilnguut, ugpeqillepagilnguut allangughtaqiit sameng pisiitangi latanganilnguut. Tawatenllu piiqiit ilangi Akuzitet Igaqegkat enkaam naafqengnguut ellmeggneng.
17Ilakumtaamni, liisimakutegpesineng saaqutangi qaatkusigalnguut liilightuusanun, kelengatek. Aghulaqutestegpenasi anaggutngalghiinun apeghtughillghitnun. Tawaten pikufsi malghuklinaanghitusi ugpeqegkaghpesineng. 18Iwernga nagneghtek wataqaaghaq liisimakluku Jesus Christ‑a, Ataneghput, Yugulighistevut, nagneghteklu wataqaaghaq piniqellghakun. Enkaam Christ‑a usuqelteggu, quulvaalteggu maaten, quunperugllaklu! Amen.
Currently Selected:
2 Peter 3: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
