2 Corinthians 9
9
Kayusighilleq Ugpeqaalgutnun
1Latatkenghisaghngaamkun ayuqaqa tunusaq tuyughyaghqaghsi Kiyaghneghem yugitnun Jerusalem‑em. 2Liisimakamsi kayusighiyuglusi ayuqusi enkaam qanatkaqamsi ugpeqiitnun Macedonia‑m. Whaten pikaagunga, “Awatangani ima ugpeqaalgutet Achaia‑melnguut yataaghqegkaagut tuuninaluteng.” Sagiqelleghpesi allulluki ugpeqat maanlenguut tuuniyugtestekaqiitlu. 3Iwernga kayaggnaqanka ilangi ugpeqaalguteput elpesinun. Apalluqaqa qanatkilqa elpesineng temngingufqaan pisqelluku. Yataaghqesqesugamsi katam whanga pisqellemtun elpesi, 4luuraq Macedonia‑ghmiit ilangita maliggnayukangatnga Corinth‑mun. Esghaqumisi yataaghqellghillusi tunusaghqaghpesineng, taawa whangkuta kayngusaakelleqiinkut, elpesillu kaynguyugllequsi. 5Enkaam sumeghtaghaghtunga sivumni kayagtekestaghnaluki ilangi ugpeqaalguteput. Tawaten kayusiilleqiisi yataaghqesqelluku akequsaqegkaghsi tunusaq. Taagken kaaskuma tunusaghsi apeghiighngallequq, enkaam yuget liisimakelleqaat tuuniyulleghsi, nakaan qayughllak tuuniyaghqaategpesineng.
6Neqamikluku una, yuuk palaghhaghmeng piitutmeng piitesighaqumi, palaghhaan saghnallequq. Yuuk uglaghluku piitutmeng piitesighaqumi, uglaghluku saghnallequq. 7Tamaghhaghpesi sumeghtaghaatkiteggu tuunilleghqaghtutalesi. Ighlegumaghpesi tuunigpenasi nalighmeng tuuniyaghqaategpesineng. Iwernga quyakusiqluku tuuniiqitek qayughllak Kiyaghneghem piniqii tawatelnguut tuunistet. 8Kiyaghneghem tuunyaqlegwiisi aklukegkaghpesineng qaayghulluku. Enkaam iiwleng sameng alngunak pilwaaqellequsi, siipngaanllu kayusiitesqelluki ilasi. 9Akuzitni Igaqegkani igaqngaaq,
“Ighlellngunani tuuniiquq aklumalghiinun;
pinitun pingallgha nagneghyaghqaaguq quunpeng.”
10Kiyaghneghuuq tuunikayuk piitutmeng piitesighaghtemun, neqmengllu neghyaghqameng. Tuunelleqaa qamaglluku piitun aklukegkaghsi, nagusleqiillu. Enkaangam unataghllagllequsi qayughllak ighlegilnguusi. 11Sakun tamaghhaakun aklungighisleqiisi, naranꞌngunaan tuunisqellusi salleghmi tamaghhaani. Enkaam tuunilleghpesigun whangkutgun uglalghiim iqamsiqayugvikelleqaat Kiyaghneq. 12Kiyaghneghem yugita Jerusalem‑emelnguut allgeghlleqiit aklukegkateng tunusaghpesigun. Enkaam yulghuteghllaget iqamsiqayulleghmeng tevughallequt Kiyaghneghmun. 13Tuunyaghqaghpesigun ipapighqellequsi ugpeqinganilusillu qaatkutnganilusillu Pinilghiinun Ungipaanun Christ‑am. Tamaaken apalluqluku yuget usuqelleqaat Kiyaghneq. Usuqelleqaatlu ighlellngunasi tuunilleghpesineng Jerusalem‑eghmiinunllu ilangitnunllu. 14Enkaangam piniqepigllusi yughaatkelleqiisi apalluqluku piniqelleghrugllak Kiyaghneghem tuunꞌngakanga elpesinun. 15Yeqay iqamsiqayugvikelteggu Kiyaghneq tunusaanun akuzitet apeghpagningilkangat.
Currently Selected:
2 Corinthians 9: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
