2 Corinthians 8
8
Ugpeqat Tuunillghat
1Ugpeqaalgutemni, whangkuta liisimakesuwamsi Kiyaghneghem nangllegtallghaneng ugpeqanun yughaghvigitni Macedonia‑m. 2Ikfiqliightelleghllagita nanghiighsaghallengesteghllakaqiit. Qaywa aklumaghllagyaghngaaghmeng, paninang quyamaghllakaagut repall ighlegpenateng tuunikaagut kayusighnaluki ilangi ugpeqat. 3Ungipaatamsi tuunikaagut tuunyaghqaghtutalmegestun, talwa tuuniighataghaqaagut. Tawaten pikaagut qayughllak ellngit tuuniyulghiit. Kitum alngunak pisqumangitii. 4Talwa aapuquuteghllakaagut tuunilgusighinaluteng Kiyaghneghem yugitnun. 5Tuunillghat uglaqaaguq sighimakellemnneng. Sivukluteng ellmeggneng pegtut Ataneghmun, taagken whangkunnun piyukellghakun Kiyaghneghem. 6Titus elpesinitaqngami piinlighikaaguq qerngughtilleghpesineng manimeng. Enkaam kayemaghput kayusiisaghtiisqellusi apeghiighesqelluku nangllekusaghsi tunusaq. 7Salleghpesigun tamaghhaakun pinitun piiqusi: ugpeqilleghpesigun, akuzilleghpesigun, liisimalleghpesigun, kayusighiyukestalleghpesigun, piniqilleghpesigunllu whangkunnun. Maatemillu pinitun piiqitek tuunilleghpesigun.
8Qelghunghitamsi tuunisqellusi, iwernga ungipaatngwaamsi naten ilangit tuunimatangi. Enkaam tuunilleghpesi ipapighqelleqaa piniqilleghsi ipangutanga. 9Liisimakaghsi piniqingalleghllaga Atanemta Jesus Christ‑am. Aklungighllagmini tawalliima ellmineng katam aklumaaghtekaaguq elpesi apalluqlusi. Tawaten pikaaguq aklungighisqeqaghllusi aklumalleghmikun.
10Awatangani elpesi qerngughtiyuwhaaqaagusi manimeng, tuunikaagusillu qayughllak tuuniyulghiisi. Sumemni whatelluku piyaqufsigu, itagnaghnayaghtusi, 11nagneghusaqufsigu piinliqaghsi! Sagiqngakaagusi qerngughtiyuwhaaghaqngafsi manimeng. Enkaam sagiqenqigllusi apeghiighteggu qerngughtekaghsi. Tuunitek tuunilleghqaghpesistun. 12Tuuniyupigtekufsi Kiyaghneghem tuguklighlleqii tunusasi. Piyukaqaa yuuk tuunisqelluku tuunyaghqalgukan, iwernga avangiskan tuuninghisaghngaan.
13Nuuqragtistesugunghitamsi ilasi nuuqragtinghisimaluki. 14Maaten llileghllaglusi ayuqusi enkaam kayusighyaghqaqasi tamaakut aklulghiit. Iwernga aklukufsi taawa ellngita kayusighlleqiisi. Tawaten pikufsi kayusiitullequsi enkaam atunem pillequsi. 15Katam Akuzitet Igaqegkat igaqellghistun, “Yuuk saghnaghllakaq suyvaghsimangituq, iwernga yuuk saghnapagumangilnguq aklunaanghituq.”
Titus‑enkut Qepghalgutkullghiit
16Iqamsiqayugvikaqa Kiyaghneq qayughllak Titus kayusighiyugtesteghllakanga elpesineng katam whangkutestun. 17Titus angeghqumakaaguq elpesinun pisqesamteggu. Elpesinun piyupigtekaaguq, taana ellngan piyukelqaa. 18Ugpeqaalgutfut Titus‑mun maligutesnaqaghput. Qamagtengngwaaghluteng ugpeqat qerngughutkayuget yughaghvigni usuqepigtaqaat ungipaqillghaneng Pinilghiineng Ungipaneng. 19Taananginaagpenaan, ugpeqat nakmikegkaqaat maligutesqelluku whangkutgun, tuuniyaghtuqumta nangllekusameng tunusameng ugpeqanun. Tawaten pinguukut usuqellengesqelluku Ataneq, yugnunllu liitesqelluku kayusighiyulleghput.
20Piraamsinguukut kitumun alngunak seghlequufqaamta pisqelluta naten aflengakaqutfut taana tunusaghllak. 21Enkaam tamaaken apalluqluku atuqsugaqaghput Kiyaghneghmi elqughutngalghii, yugnillu elqughutngalghii.
22Titus‑enkugnunllu maligutesnaqaghput ilanga ugpeqaalgutfut. Awen esghaghnaluku natetulanga piiqaghput, piyalghiikut iiwleng kayusighiyukestaghluni ayuqeftuq. Wanlegi maaten kayusighiyugllagughtuq qayughllak neghyukeghllakangisi. 23Titus qepghalgutkaqa, qepghalgusighaqaanga kayusiinnalusi. Taakuklu ugpeqaalgutek ugpeqat yughaghvignilnguut kayagtekaqagket. Quulvaghllagluku Christ‑a ayuqaak. 24Enkaam Corinth‑eghmiini, esghaghtesteggu piniqilleghsi taakugnun yugegnun. Taagken piniqilleghpesi ipapighqesleqiit ugpeqat yughaghvignilnguut sangan qanatkellemnneng elpesi.
Currently Selected:
2 Corinthians 8: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
