2 Corinthians 10
10
Paul‑em Aapqanga Qepghaqani
1Ilangita yugpesi piiqaatnga tetugtaghnilunga elpesininnemni, iwernga tetugiganniiqaatnga elpesininneghinnemni. Whanga Paul, whangamneng katam, Christ‑am qusevegngallghakunllu piniqellghakunllu, 2tetugtesneghitaghhnakefsinga laalighfikenqigtekumsi. Iwernga tetugyaghqaqenghilkumki tamaakut yuget pilghiit kiyaghtengngunilunga nunam yugistun, elngaatall tetugnaanghitanka. 3Nunametngughngaamta pilluwiigatukut nunam yugan pilluwallghistun. 4Guututet pilluwaasiput nunam yugan guututkenghitii. Guututeput Kiyaghneghem aghtughyaghqaanghillghaneng pilguut. Naafqesaqlegwiit ayepsugilnguut mingllutet anguyagem nekefquqii yuget uvitangitgun. 5Taakutgun guututetgun naafqaqaput anguyagem iqlengii, sumeghneghitlu aangaayugneghet. Apeghtughillghita amigighaqiit yuget liitelleghqiitneng Kiyaghneghmeng. Katam pilluwaghtet tugutellghistun anusimingllaghyaghqameng, whangkutallu tugwaaqaput qamaglluki sumeghneghet qaatkutesqelluki Christ‑amun. 6Christ‑amun qaatkutngngwaaqufsi, taawa aghyuughiyaghqaaghllequkut qaatkunneghilngughnun.
7Nanqigtiiqusi esghallghiinaghpesigun. Christ‑amun pikepestaaghnikufsi, neqamikluku whangkutallu Christ‑am pikiinkut, elpesistun. 8Kayngukigataqa qanatkivleghapalqa Atanghem igleghutistengughtestekanganga elpesinun. Tawaten pikaaguq whangkunnun kayemesqelluku ugpeqilleghsi, nakaan naafqennaluku. 9Sumeghtaghaghpenasi alingesnaqutkengngunilusi latamkun. 10Ilangita piiqiit Paul‑em latangi seghleghllaguniluki aghsaaghmikaghnganiluki, naqam whangkunninneghmini, aghsaan ayuqaquq, akuziyiitaquqlu! 11Tamaakut yuget tawaten pikat liigiklitgu sameng pilleghput latatgun, tamaakunguut ataasit piyaghqaput ellngitnun pikumta.
12Inglunnaqutkennaanghitukut tamaakunun aangaayuglleghhiinun. Sumeghtaghaghaqut aangniluteng qayughllak ungipaatutaqelghiit aangniluteng. Nalluughhaghmeng! 13Qukaayugutkennaanghitaghput alngunak qepghaqaq Kiyaghneghem kayagusimangilkanga whangkunnun. Iwernga qukaayugutkengnginaghlleqaghput qepghaqaq kayagutkaa whangkunnun. Elpesillu ilatngaasi qepghaqamnnun. 14Sivulighpigaagukut ungipaqiyaghtuqani elpesinun Pinilghiineng Ungipaaneng Christ‑am. Enkaam alpagigataghput qepghaqaq Kiyaghneghem kayagutkaa whangkunnun. 15Qukaayugutkelleqaghput taananginaq qepghaqaq pikaghput, nakaan ilangita qepghaqaat. Ugpelleghtughtekufsi sighimaakut kayusighataghiisqelluta qepghaqamnneng. 16Enkaam ungipaqiyaghtughllequkut Pinilghiineng Ungipaneng ilangitnun nunat. Qukaayugutkesugunghitaghput qepghaqaq ilangita apeghiiqaat.
17Iwernga igaqngaaq Akuzitni Igaqegkani whaten, “Kina alngunak qukaayugsukumi, qukaayugutkelligu Atanghhiinaq.” 18Atanghem tugukliigatii pinighnilghiit. Itupill Atanghem tuguklighaqii tamaakut pinighniluki pikani.
Currently Selected:
2 Corinthians 10: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
