2 Corinthians 4

Yugem Kayaatellgha Kiyaghneghemllu Aghtughyaghqaanghillgha

1Enkaam Kiyaghneghem nangllegtalleghmikun qepghaqalitiinkut whaken qepghaghyaghqameng. Tamaaken apalluqluku iilqayugigatukut. 2Ighsayagutkaqaput aksaqegkatlu kayngunalghiitlu. Puughsigataput yuget, allangughsigataputlu Kiyaghneghem akuzitangi. Whateghlluwaaqlu apeghtuusaqaqaput Kiyaghneghem ipapillghi, enkaangam yuget liilleqiinkut natelnguutfut esghaamanghani Kiyaghneghem. 3Ungipaqegkaput Pinilghiit Ungipat saapngakata, saapngaat iflayaghqaghhiinaghnun. 4Ellngita ugpeqigataat ungipaghput qayughllak Tughneghaam, uum nunam kiyaghneghan, ayaastekaqii umyugiit. Esghanghitestaqaa nighuga Pinilghiim Ungipam nighughqellghaneng Christ‑am ayuqelghii. Christ‑a Kiyaghneghtun ayuquq. 5Whangkunneng katam ungipaqngunghitukut, itupill ungipaqngwaaghput Jesus Christ‑a Atanghuniluku. Qepghaghtekaghpesikut Jesus apalluqluku. 6Kiyaghneghuuq whaten pikaq, “Yeqay nighuk kuukgulli mamlelleghmeng!” Ellnganguuq ataasiq Kiyaghneq kuukgutestilghii nighugmeng ilumnnun. Taaggun nighugkun liitaghput nighughqellgha Kiyaghneghem, kuukgullghii Jesus Christ‑am gginaaneng.

7Iwernga whangkunnun Kiyaghneghem kanaghtekaqaa taana nighuk kuukgutesqelluku ilumnni. Whangkuta qikustun qantaghqastun ayuqukut, enkaam tamangan liigikelleqaat aghtughyaghqaanghiteghllak Kiyaghneghtaaniluku, whangkunneng pingunghinniluku. 8Seghleliillengaqukut allaaghhiinatun iwernga kayaalqigatiinkut. Ilangakun kukragyullengaqukut iwernga sighimallghiisigatukut. 9Amyuqetaatkellengaqukut, iwernga Kiyaghneghem unisigatiinkut; aqnighqwaallengaqukut, iwernga tuqungigatukut. 10Iiwleng tuqullgha Jesus‑em yugusimnnituq, esghiisqelluku unguvallgha Jesus‑em yugusimnni. 11Unguvanguluta iiwleng yakughnallghanitukut tuqullghem apalluqluku Jesus, esghiisqelluku Jesus‑em unguvallgha yugusimnni tuqukayugni. 12Enkaam whangkuta yakughnallghanitukut tuqullghem qayughllak qepghaatngukefut Kiyaghneq. Iwernga qepghallemta kenlengilngughmeng unguvallengestengngwiisi.

13Igaqngaaq Akuzitni Igaqegkani, “Ugpeqaqa Kiyaghneq enkaam akuzitkaqaqa.” Ugpeqilleghput tawatetuq igaqestetun. Whangkutallu ugpeqaghput Kiyaghneq enkaam akuzitkaqaghput. 14Liisimakaghput Kiyaghneghem unguvaghtekaqaa Ataneq Jesus. Whangkutallu unguvaghlleqiinkut Jesus‑kun. Taagken aglaalleqiinkut qerngaamta elpesillu tawantelleghminun. 15Qamaglluteng tamaakut apeghiiqat whangkunnun elpesinun ayuqut. Kiyaghneghem nangllegtallghan nulasleqii yuget ugpeqilghiit Christ‑akun. Enkaam iqamsiqayulleghllak Kiyaghneghmun nulallequq, quulvallengeghllagllequqlu.

Kiyaghtaalleq Ugpeqilleghqun

16Enkaam iilqayugigatukut. Qaywa yugusiput kayaalikestaghyaghngaata, taghneghaput nutaghtengnguut aghhutanga tamaghhaan. 17Seghleliilleput sasqughhaagut muluyaghqaanghitut. Iwernga tamaakut yataaghqutngwiinkut allgeghtesqelluku Kiyaghneghmeng kenlengilnguq quyalleghllak. Enkaam seghleliilleput avangilngughestun ayuqut. 18Sumeghtaghaatkumanginiigataput seghleliilleput. Itupill sumeghtaghaatkaqaput esghaghpagningilkeput. Qantaghaqun seghleliilleput kenletghuullequt, iwernga quyalleghput esghiigalkefut quunpekaghqaaguq.

Currently Selected:

2 Corinthians 4: ess

Highlight

Copy