2 Corinthians 3

Qepghaghtengi Nutagham Akequsam

1Whangkuta usuqesaayuggnaqlaataghestaa whangkunneng katam? Nalighmeng ilangistun aklukingustaa latameng aapghesqelluta elpesinun, nalighmeng elpesineng? 2Elpesi, elpesi katam whangkuta latakamsi, igaqngaasi ilumteggun tamanganun liisimakesqellusillu atightiisqellusi. 3Whateghlluwaaq latanguusi Christ‑ameng pit whangkunnun tuyuqii. Latatkegkaanghitusi ink‑akun nalighmeng lliivneqegtatgun uyghagteggun. Latatkegkaagusi yuget ilungitgun Taghneghagkenkun unguvalghiim Kiyaghneghem.

4Tawaten piikut qayughllak neghyullelguukut Kiyaghneghmi Christ‑akun. 5Whangkunneng pikninaanghitaghput qepghaghyaqleguniluku taana qepghaqaq. Kiyaghneghem piyaqlegughtestaqiinkut qepghaqamun. 6Ellngan qepghaghyaqlegughtestiinkut nutaghamun akequsamun. Taana nutaghaq akequsaq igaqngalghiingunghituq liilightuusaq, iwernga Taghneghagneng ayuquq. Igaqngalghiim Liilightuusam tagitaa tuqulleq, iwernga Taghnegham tuunaa unguvalleq. 7Liilightuusat igaqegkaagut uyghagteggun, enkaam Kiyaghneghem nighughqellgha aliiqaaguq Liilightuusat tuunaqngata. Moses‑em gginaa kuukgutkaaguq taagken nighughqelleghmeng, qaywa gheveghngaan Israel‑eghmiit esghaghpagningitkaat gginaa. Liilightuusat tuqustiyaghqaagut qayughllak yuget qaatkenghilkangit. Liilightuusat nighughqestighllagumakata, 8natenmi angkaan qepghallgha Kiyaghneghem Taghneghagkenka nighughqestiighataghaghlleqa! 9Liilightuusaq nanqigtiyaghqaakan yugmeng aghyuughyaghqaaluki nighughqengngayaghtuq; anaggutellghinniluteng yuget pilghiit natenmi angkaan nighughqengngalleghtulleqat! 10Tawaten pinguukut qayughllak nighugataghalghiingughtuq nighughqelleq maaten, taana nighughqengngayalghii sivunghani aviighusimaaq. 11Nighughqellelguyaqan tawaten mulughraakameng, natenmi angkaan nighughqellegulleqa mulughllagyaghqameng quunperugllak!

12Taana sighimakutemnneng tetugigatngwaaghtukut. 13Moses‑etun ayuqenghitukut, gginani saaputiqaa enkaam Israel‑eghmiit esghaamangitaat nighugllak aviighullghii. 14Umyugiit liigikepagningiitkaagut, whavemun kenlanga umyugiit saapngaat taagken ataasimeng saaputameng, atightuneghmegteki neghightat akequsat. Taana saaputaq iqisaghqaaguq Christ‑anginaghhaghqun. 15Talwa aghneghmi whani, atightuneghmegteki Liilightuusat Moses‑mun tuunegkat, umyugiit saaputameng saapngaaqut. 16Iwernga yuuk qiivneghmini Ataneghmun saaputaa iqitaquq. 17Maaten Ataneq Taghneghaalghii, kina alngunak Atanghem Taghneghagkeneng pilgukumi, itemngallelguuq. 18Qamagtengngwaaghluta saaputangunaki gginaput esghaghlleqaghput nighughqellgha Atanghem. Taana ataasiq nighughqelleq tagilghii Ataneghmeng Taghneghaaguq, allangughtiinkut ellngasugnightesqelluta aangataghaghluku nighughqelleghmeng.

Currently Selected:

2 Corinthians 3: ess

Highlight

Copy