2 Corinthians 5

1Whani nunami ukut yugusiput kiyaghfiput tiintastun ayuqut. Liisimakaghput yugusiput tuqukata Kiyaghneq mangteghalguuq qilagmi whangkunnun kiyaghfigkameng. Kiyaghneghem ulimakaqaa mangteghaq, yugem ulimaaqenghitaa. Taana mangteghaq quunpekaghqaaguq. 2Ipa ngillegtukut nunametnguluta qayughllak kiyaghsupiglleghhiikut yugusighraghamnni qilagmi. 3Aatkastun aalleqaput tamaakut yugusighraghaat amsikaghmenneghinnaluta. 4Yugusiput tiintastun ayuqut. Tiintamelluta ngillegtaqukutlu, seghleliightukutlu qayughllak mataghsugigalkeput. Itupill simighyugaqaput yugusinun tuqungigalngughnun. 5Kiyaghneghem yataaghqutkaqiinkut whavek allangughtelleghmun. Whangkunnunllu tuunegkaqaak Taghneghagni liisimakesqelluku allangughtelleghqaghput ipapestaaq apeghiighlleqniluku.

6Enkaam iiwleng ilutaaqukut. Liisimakaghput nemetnguluta yugusimnni, Ataneghmesigatukut. 7Kiyaghtengnguukut ugpeqilleghqun, nakaan esghaqayumteggun. 8Enkaam ilutaaqukut. Unisugaqaput yugusiput nemennaluta Ataneghmi. 9Nemesaghngaamta nalighmeng nemenneghiteghngaamta, efqughsugaqaghput Ataneq. 10Qamaglluta nekevepestaaghyaghqaagukut Christ‑am sivungakun nanqigtesqelluta. Ataasikaghtaamta allgeghullequkut pinilghiimeng nalighmeng seghleghmeng apeghiighutellemtestun yugusimteggun.

11Enkaangam alikaqaghput Ataneq, tamaaken apalluqluku ugpeghtesnaqutkaqaput yuget Christ‑akun. Kiyaghneghem liisimakiinkut natelnguutfut yugni, sunanguq elpesillu liisimakitekut tawatelluta. 12Elpesinun tuguklightesnaqutkengngunghitukut allameng. Itupill ungipaataqamsi whangkunneng elpesinun qukaayugutkesqelluta. Taagken apeghyaqlegughlleqaghpesikut qukaayugutkilghiinun yugem qaastulnginaghhaaneng. Waakigataat sangutanga yugem ilumikegkaa. 13Nallutuyiqngukumta, Kiyaghneghmun ayuquq, iwernga nallutuyiqngunghilkumta, elpesinun ayuquq. 14Christ‑am igleghutngwiinkut piniqelleghmikun. Liisimakngwaaghaghput yugem ataasim tuqumatkegkaqaa qamagtengngwaaghluku yuuk. Tamaaken apalluqluku qamagtengngwaaghluteng yuget tuqukaagut. 15Christ‑am tuqumatkegkaqii qamagtengngwaaghluki yuget. Enkaam kiyaghlleghhiit kiyaghsaqlegullequt ellnganun, nakaan ellmeggnun katam. Tuquluni unguvaghtekaaguq ellngit apalluqluki.

Ilakumtaaghulleq Kiyaghneghmun Christ‑akun

16Whaken kenlekluku kina alngunak sumeghtaghaatkennaniimaaghput nunam yugan sumeghtaghaatkellghatun. Qaywa ataasimeng sumeghtaghaatkegkaqaghput Christ‑a nunam yugan pillghatun, tawaten sumeghtaghaatkennaniimaaghput. 17Kina alngunak Christ‑am piliinneghminigu nutaghaghllugughtaquq. Kiyaghtaalleluga aviighutaquq, iwernga nutaghaghlluk kiyaghtaallgha piinlighaquq. 18Kiyaghneghuuq tawaten pikaq. Ellngan ilaliighutestekaqiinkut ellminun Christ‑akun. Qepghaqalitiinkutlu ilangillu yuget ilaliighutesqelluki ellminun. 19Christ‑akun Kiyaghneghem ilaliighwii qamagtengngwaaghluki yuget, umyugaghmikegpenaki seghleghqellghit. Enkaangam ungipaghqalitkaqiinkut aapghesqelluki naten ellminun ilaliighutangi ellngit. 20Kiyaghneghem kayagtekaqiinkut ungipaghtenguluta Christ‑amun, enkaam whangkutgun tagisqellusi ellminun. Akuzistenguukut Christ‑amun kayemilghiit ilaliighutesqellusi Kiyaghneghmun. 21Christ‑a seghleghqumangitngwaaghtuq, iwernga seghleghqellemnnun Kiyaghneghem aghyuuqaqaa seghleghqegkaaluku. Enkaam Christ‑akun Kiyaghneghem elqughutngangllaqaqiinkut.

Currently Selected:

2 Corinthians 5: ess

Highlight

Copy