1 Timothy 6
6
1Qamaglluteng qepghaghtelaaghet siivakeghllaglitki tamaakut piliitisteteng, enkaam kitum alngunak seghletun akuzitkenghillikek aatgha Kiyaghneghem, apeghtughilleghputlu. 2Qepghaghtelaaghet piliitistengit ugpeqaalgutngukata siivakataghaghlitki qayughllak ugpeqaalgutkegkangit. Enkaam qepghaataghaghlitki qayughllak kayusiingwiit ugpeqaalguteteng piniqegkateng. Tamaakut apeghtuusaqikillu ungipaqikillu.
3Kina alngunak apeghtughikumi allanguluku tamaakuneng apeghtuusaneng, itagnaqenghitii apeghtuusapigi Atanemta Jesus Christ‑am. Ellngan apeghtuusaan ungipaatiinkut Kiyaghneghem piyukellghatun kiyaghtelleghqameng. 4Kina alngunak allatun apeghtughilghii aangaayugneghllaguuq, liigikigatuq sameng alngunak. Aaghtiiraaghyuneghtuuqlu qaniqsuneghtuuqlu akuzitneng. Tawaten pillghem allgeghtaqii: aqinalleq, aghivatelleq, seghlequughutelleq, ugpequnnanilleq. 5Tawatelnguut quunpeng aaghtiiraaghutestiiqut. Umyugiit sumeghneghlluugtaqut enkaam liisimaknanighaqaat ipapilleq. Sumeghmeggni qepghaaskumegteggu Kiyaghneq aklungighilleqniluteng piiqut. 6Iwernga allgeghuteghllagllequkut kiyaghtekumta Kiyaghneghem kiyaghtesqesullghatun itagnaqluku pitutalvut. 7Allgeghaqngamta nunamun kelqutngitukut, tuqukumtallu kelqutelgunaanghitukut. 8Enkaam itagnaghllequkut neqelgukumta, aatkalgukumta. 9Iwernga tamaakut aklungighiyulghiit nanghiiqullengaqut. Seghleghem piyukellghita tugwaaqii enkaam temngitwhaghllagughtaqut. Taagken piyukellghita sayugaqii naafqelleghmun. 10Manimeng piniqilleq akuqaa qamaglluni seghleghem. Ilangita yuget pegtaqaat ugpeqilleghteng qayughllak manitughqaaghllagyulghiit. Enkaam ellmeggneng qivghughllagughtaqut.
Neqamiksaghqat
11Iwernga elpek Kiyaghneghem yukaaten, enkaam iqitngaluten tamaakuneng. Sagiqutiki elqughutngalleq, kiyaghten Kiyaghneghem kiyaghtesqellghatun, ugpeqillelighluten, piniqillelighluten, nuqenneghtuluten, nangllegtaghluten. 12Pilluwaatigu ugpeqilleq qayughllak tawaten pilluwalleq pinilghiinguuq. Tugugullu kenlengilnguq unguvalleq. Kiyaghneghem tagsiqaqaaten tugukliisqelluku taana unguvalleq aapghaqngavgu ugpeqillghen ugpeqalghutnun. 13Qeleghnaqamken nagasimanghani Kiyaghneghem, unguvallelitikam samun tamaghhaanun unguvalghiinun, nagasimanghanillu Christ Jesus‑em, kiimsighilaataqughikam Pontius Pilate‑mun. 14Qelghamken piraamsiluten qaatkesqelluki qamaglluki qelgutkanka elpenun. Nagneghutiki kenlanga Atanemta Jesus Christ‑am uteghninqiglleghanun. Tawaten pikuvek kitum alngunak anagguniluten pinaanghitaaten. 15Kiyaghneghem pilleghqaghlluwaaghmini tagisleqaa Jesus Christ‑a. Usuqnalghii Kiyaghneq, ellnginaaguq Igleghutisteghllak, ellnganguuq Umiilgat umiilget, Atanghat atanghet. 16Ellngiinaaguq tuqungigalnguq. Kiyaghtengnguuq nighugrakegllagmi repall kitum alngunak tughaaghpagningitaa. Kitum alngunak esghiigataa, talwa esghaghnaanghitaa. Kiyaghneghem piklikek quulvalleqlu aghtughyaghqaanghilleqlu quunperugllak. Amen.
17Qukaayugtesnanighqi tamaakut aklungilnguut nunami whani, talwa sighimasnanighqi aklungingitgun nalluneqnalghiitgun. Iwernga sighimasqiki Kiyaghneghqun. Ellngan ighlegutegpenaamta tuunaqiinkut sameng tamaghhaaneng pinighyuugusighqameng. 18Aklungilnguut pinitun pisqiki, aklungitesqiki pinitun qepghalleghqun, ighlellngunaki tuuniyukestaghluki ilangitnun yugnun. 19Tawaten pikumeng kagpaglleqaat aklungi ellmeggnun. Taana aklungi ayugilnguuguq tunemaq aagnakaghqiitnilnguq. Enkaam unguvallengellequt unguvallepigmeng.
20Timothy, kelengakluki tamaakut Kiyaghneghem neghyukutkii elpenun. Iqitngaluten ugpeqaanghilnguut temngitwhaneng akuzitngitnengllu, aaghtiiraaghutellghitnengllu. Tamaakut ugpeqaanghilnguut sumeghmeggni liisimallepiilguniiqut, iwernga ipangunghituq. 21Ilangita pegsimaat ugpeqilleghteng qayughllak ugpeqegkangat ipangunghilnguq liisimalleq.
Kiyaghneghem quyaslisi.
Currently Selected:
1 Timothy 6: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
