1 Timothy 5
5
Apeghtughallghet Kiyaghtelleghqiitnun Ugpeqat
1Aghyuughpenaan siivanlleq yuuk, iwernga kavyungunaan nallghusaghaqigu atakelghiistun. Uyuqliit yuget anglegutkelghiistun piiqiki. 2Siivanlleghet aghnat naakelghiistun piiqiki, enkaam uyuqliit aghnat nayagestun piiqiki, qiliighyukefqiita.
3Kayusiitiki ugingighat aflengakistengiitkat. 4Iwernga ugingighaq avaqutaghtukumi nalighmeng eltughaghtukumi, kelgullit nengllugutmeggnun kiyaghsugniluteng Kiyaghneghem kiyaghtesqellghatun. Aflengakelleghmegteggun angayuqateng akinaqelleqiit enkaam efqughlleqaat Kiyaghneq. 5Ugingighaq ilakwaaghiitkaq sighimanguuq Kiyaghneghqun. Enkaam unugtuumaan, aghneghtuumaan yughaamanginaaguq kayusiitesqelluni. 6Iwernga ugingighaq teghigniqnginaqumi ellmineng efqughhnaluni, unguvaghngaaghmi tuqukastun ayuqsaghqaaguq. 7Qeleghqi ugpeqat tamaakut pisqelluki enkaam kitum alngunak seghlequunghillitki. 8Kitum alngunak aflengakenghilkumiki ilakwaani, wata ellmi katam nengllugutni, tawaten pilleghmikun pegtekaqaa ugpeqilleni. Enkaam seghleghataghaallequq ugpeqaanghilngughmeng.
9Ugingighaq 60 uksughtutkaliimakan, nengughtekaakanllu ataasimeng, aatgha igaqsaghngaaghmi ayuquq ugingighat atelghutiitgun. 10Amalleqa tamangan liisimakaat qepghallegtulanga, katam avaqutani pinitun anglistellghatun, upughaneghtulanga, ugpeqaalgutmi itegiit ughvughaqluki, kayusighiiqluni seghleliilghiineng, quunpengllu pinitun piiqelghii.
11Iwernga nuteghat ugingighat aatghit igaqegpenaki atelghutatgun. Yugusiita piyukellghan sakniqesneghisteng ugiighyugllequt. Tawaten pimakumeng naafqelleqaat akeqilleghteng Christ‑amun. 12Enkaam Kiyaghneghem nanqiglleqii aghyuughyaghqaaluki qayughllak naafqegkangat akeqilleghteng. 13Taam saaghwakun ighsanitaghtaqii, itghiitughtaqii, yiillgitughtaqii, yanutquneghtughtaqii, akuzitkaqiitlu sangwaat akuzitkesaghqaqenghilketeng. 14Enkaam itagnaghataghaghnayaghtut nuteghat uginghighat ugiighyaquyeng, taghnughhangluteng, aflengakesqellukillu nengllugutangit. Tawaten pikumeng anguyak seghlequughvigiitesleqaat whangkunneng. 15Aawallu ilangi nuteghat ugingighat ugpeqaananighluteng maligusimaat Tughneghaghmun. 16Ugpeqaq aghnaq ilakwaalgukumi ugingighaneng, ellngan kayusiisaghqaqii. Enkaam ilangita ugpeqat kayusiinneghisaghngaaghmegteki ayuqiit. Taagken ugpeqat kayusiilleqiit uginghighat aflengakistengiitkat.
17Elder‑et igleghutiyuqat yugaghvigmi, taakunginaghhaagnengllu qepghalghiit apeghtughilleghqun, ungipaqilleghqunllu, quulvaghaqiteki malghughqelluki akileghtuusiit. 18Qayughllak Akuzitet Igaqegkat piit, “Ox‑a tutmalghii grain‑meng malliighnaluki, neghesqelluku grain‑meng sugrugiitighpenaan.” Amalleqa, “Qepghaghta akileghtughyaghqaaguq qepghallghanun.”
19Nagategpenaki kinkut alngunak avutkilghiit Elder‑meng anaggusimaniluku, wetkuqun avutkilghii liisimakistelgukan maalghugegneng nalighmeng pingayuneng. 20Kina alngunak seghleghqumanginaqan, aghyuughnaken seghleghqennaniisqelluku ugpeqat manungitni. Tawaten pikuvgu ilangi tamaakut alingellequt.
21Tamaakut qelghutanka elpenun qaatkesqelluki, pakiggutifqaavek nalighmeng taniilqifqaavek pisqelluten. Tawaten qelghamken esghaamanghitni Kiyaghneghenkut, Christ Jesus‑enkut, nakmikegkatlu yaqulget. 22Iigtighaghtegpenaan kina igleghutistekaghqaaluku yughaghvigmi. Taayughqegkuvek ilalkiinnayukavek seghleghqellghanun. Kiyaghtekestaa pelungilluten.
23Meghhiinaghmeng meghegpenang, iwernga wine‑ngiighhaghmeng meqaghaqluten kayutkelleqan aqsaqughpenun, qinuyugaatalleghpenunllu. 24Ilangita yuget seghleghqellghit aliitngwaaghaqut, talwa salin nanqigtellghilluteng. Iwernga ilangita yuget seghleghqellghit aliighsaghqaagut kinguvaqwaaqun. 25Tawateghpigaq aneghneghqillghat aliitngwaaghaqut, iwernga tamaakut aliinneghilnguut iighnganaanghitut.
Currently Selected:
1 Timothy 5: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
