1 Timothy 3
3
Igleghutistengit Ugpeqat
1Whaten pilleq ipanguuq: Kina alngunak igleghutistenguyukumi ugpeqanun taana qepghaqaq piyukegkaa piniipigtuq. 2Igleghutista avutngisaghqaaguq, ataasimeng nuliilguyaghqaaguq, nuqenneghtuyaghqaaguq, sumeghtaghaqegsaghqaaguq, yupiinghuyaghqaaguq, upughanghuyaghqaaguq, apeghtughiyaqleguuqlu. 3Suumestenguyaghqaanghituq, suuglluguyaghqaanghituq iwernga nanglleghtaghyaghqaaguq, qanengnaqigasaghqaaguq, maniyuneghtuyaghqaanghituq. 4Igleghutistem igleghutngwaaghyaghqaqii mangteghaghmiini, avaqutanillu apeghtughyaghqaqii veghusnaatefqaami qaatkesqelluni. 5Igleghutista igleghutillgiskumi ellmi katam nengllugutmineng, natenꞌngam aflengakelleqaki ugpeqistengi Kiyaghneghem? 6Igleghutista ugpenghhaanghisaghqaaguq, luuraq qukaayugtepagnayukan enkaam nanqigtellengellequq aghyuughyaghqaaluni Tughneghaghtun. 7Igleghutista pinitun kiyaghsaghqaaguq ugpeqaanghilngughnun akuzitkesqelluku itagnaghluku. Enkaam seghlequughpagningilleqaat, Tughneghaamllu kayaalqepagningilleqaa.
Deacon‑et Kayutkiit Ugpeqat
8Tawateghpigaq Deacon‑etlu pinighluki akuzitkesaghqaagut, ipapighqengngayaghqaagut, wine‑meng meghepagyaghqaanghitut, pakigneghuyaghqaanghitutlu manimeng. 9Pegsaghqaqenghitiit apeghtuusat Kiyaghneghem qayvighqegkii, umyugiitlu seghleghyugisaghqaagut. 10Igleghutistet nakmiighvagilgameng deacon‑kaghqameng qepghaqalilluki liigiknakangit piniitangi yuget. Taagken deacon‑ngughtesnakangit. 11Tawateghpigaq aghnatlu pinighluki akuzitkesaghqaagut, yiillgiyaghqaanghitut, iwernga nuqenneghtuyaghqaagut, ataasiighmesaghqaagutlu sakun tamaghhaakun. 12Deacon‑et ataasimeng nuliilguyaghqaagut, igleghutngwaaghyaghqaqiit avaqutatengllu mangteghaghmiitengllu. 13Tamaakut deacon‑et qepghaqegtat quulvallengyaghqaagut, nalluneqsuknaanghitaatlu ugpeqilleghteng Christ Jesus‑kun.
Naten Ugpeqat Kiyaghtelleghqiit
14Sunanguq qantaghaqun elpenun pilanga, iwernga maaten elpenun latatkanka tamaakut apeghtuusat. 15Enkaam kimaawimakuma latama liisimakesleqaaten naten ugpeqat kiyaghsaghqaatangi Kiyaghneghem nengllugutanganilnguut. Ellnginguut ugpeqistengi unguvalghiim Kiyaghneghem, aghveghaqetaagut, tunemaagutlu ipapilleghmun. 16Nalluneqnaghhangunaki ugpeqaput apeghtuusat Kiyaghneghem qayvightekii seghleghllaguutlu ipapestaaghuutlu:
Christ‑a allgeqaaguq yugusipiguluni,
Kiyaghneghem Taghneghagkenka liisimakestii tamaakut ellngan pikii elqughutngatangi,
yaqulgetlu esghaqaqaat.
Ungipaqegkaaguq nunataghhaani tamaghhaani,
ugpeqegkaqaat nunataghhani tamaghhaani,
taagken qilagmun mayuutkaguq.
Currently Selected:
1 Timothy 3: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
