1 Timothy 4

Iqlengalghiit Apeghtughistet

1Agleghnalghiik Taghneghak whateghlluwaaq piik kingulighni aghneghni ilangita yuget peglleqaat ugpeqilleghteng Christ‑akun. Tawaten pillequt qayughllak qaatkelleqegkangit iqlengalghiit tughneghaat, apeghtuusiitlu. 2Tawatelnguut apeghtuusat iqlengalghiineng pinguut. Iqlengiqelleteng aapghaqiit ipapigsugnighqelluki. Nagannaniqaqiit umyugateng liisimakilghiit elqughutngalleghmengllu anaggutngalleghmengllu. 3Tawatelnguut yuget nengughutesnanighiiqut, ilangillu neqem neghesnanighaqiit. Iwernga Kiyaghneghem ulimaaqii qamaglluki neqet neghyaghqaaluki iqamsiqayagutaqluki. Ugpeqat liisimakilghiit ipapilleghmeng liisimakiit tamaakut. 4Kiyaghneghem ulimaaghi qamaglluteng pinilghiinguut. Enkaam ighsaksaghqaanghitut tugukliimakumeng iqamsiqayagulluki. 5Akuzitangakun Kiyaghneghem, yughakunllu aaftekaagut agleghnaghluki.

Pinilghii Qepghaghtenga Christ Jesus‑em

6Tamaakut apeghtuusat liigikestengngwaaqufki ugpeqaalgutegpenun, pinilghiingullequten qepghaghtenga Christ Jesus‑em. Ugpeqillghen iknaqughlleqaa liisimanginaqufki ipapillghet ugpeqat ugpeqaqegkangit, pinilghiitlu apeghtuusat qaatkegkaghten. 7Nagategpenaki sasiinghilnguut ungipaghaatet tengvimun ayuqelghiit Kiyaghneghem ipapillghanun. Yeghlegi peghqigsaatkigu Kiyaghneghmun ayuqelghii kiyaghtaalleq. 8Yugusim ulapellgha pinightuq, iwernga kiyaghtelleghput Kiyaghneghem piyukellghatun ayuqelghii pinighataghaghtuq. Kayusiisaghqaqiinkut whani unguvallemnni, tuunglighhaanillu unguvallghem. 9Taana pilleq ipanguuq, enkaam qamagtengngwaaghluni ugpeqsaghqaaguq. 10Tamaaken apalluqluku qepghaghllaguukutlu sagiqliightengnguukutlu yugnun ugpeqesqelluku ipapilleq. Tawaten piikut qayughllak neghyukaghput unguvalghii Kiyaghneq, Yugulighistengat qamaglluteng yuget, kiyang tamaakut ugpelghiit ellngakun.

11Qeleghqi apeghtughqi tamaaken. 12Kitumun alngunak palaqestegpenaan anglinghhaamallghen. Iwernga ugpeqanun usputaawi akuzilleghpegun, salleghpegun, piniqelleghpegun, ugpeqilleghpegun, pelungilluten kiyaghtelleghpegun. 13Kaatellemnun kenlanga, ugpeqat qerngughunneghata atightuutaqiki Akuzitneng Igaqegkaneng, ungipaqitaqiki, apeghtughaqiki. 14Atuqaqigu taghneghagnekun tunusaq ilugpenilnguq. Taana tunusaq tuunegkaaguq elpenun uuknaliqelleghqun Elder‑et iigtighaqngaten. 15Pinaqellghen qamaglluku piiqiki qelghutkanka. Tawaten yuget liilleqaat pillguughlleghhiiten. 16Piraamsingwaaghluten kiyaghtaalleghpenillu apeghtughilleghpenillu. Tawaten pikuvek elpeneng yugulillequten, tamaakutlu nagatesteten.

Currently Selected:

1 Timothy 4: ess

Highlight

Copy