1 Timothy 2
2
Apeghtuusat Maniguutelleghmeng
1Sivukluku kayemamken yughaatkesqelluki qamaglluki yuget, tungsiitesqelluki Kiyaghneghmun aklukegkiitneng, iqamsiqayagunnaketenllu Kiyaghneghmun. 2Yughaatkiki umiilget, qamagllukillu igleghutilghiit, kiyaghsaghqaaluta nekeggmelluta maniguusimaluta, quulvaamalukullu Kiyaghneq. 3Tawatelnguq yughalleq pinightuq, efqughnaghtuq Kiyaghneghmi Yugulighistemnni, 4qayughllak qamaglluku yuuk yugulillengesugaa, liitesugaallu ipapilleq. 5Taawa ataasiinaaguq Kiyaghneq, ataasiinaaguqlu ilaliighutista Kiyaghneghmunllu yugnunllu. Taananguuq yuuk Christ Jesus. 6Ellmineng tuunegkaaguq aghqutnguluni itemunnaluki seghleghqellghitneng qamaglluki yuget. Taananguuq pilleghqaghlluwaaq Kiyaghneghem kelgutillgha yugulillengesugniluki yuget qamaglluki. 7Tamaaken apalluqluku Kiyaghneghem nakmikegkaqaanga ungipaqistengulunga, apostle‑ngulunga. Kayagtaanga apeghtiisqelluki Gentile‑et ugpeqilleghmengllu ipapilleghmengllu. Ipa ungipaatamken, iqlengiqngunghitunga!
8Tamaghhaani yughaghvigni yugiinaat yughiisqesuganka. Tamaakungulit kiyaghlleghhit qaatkulluteng Kiyaghneghem piyukellghanun. Yughaghlit nengugulluki iiggeteng sakraallngunatengllu aaghtiiraallngunatengllu. 9-10Piyukankallu aghnat pinighnallghit kelgutesqelluki pinitun pilugullghitgun. Aatkiit mallegngafqiita nalighmeng kayngunaghyaghqaafqiita. Itupill pinighnalleteng kelgullitki aneghneghqilleghmegteggun, nakaan nuyaqegsaghwaalleghqun nalighmeng gold‑mengllu pearl‑mengllu ullngaqluteng nalighmeng akituqameng aatkameng aalluteng. Tawaten pilleq elqughutngaaq aghnanun maniguutkayugunilghiinun Kiyaghneghmun.
11Yuget apeghtughinghata yughaghvigni aghnat nagasaghqaagut nepiighngaghmeng, malighqutaqluteng. 12Aghnat apeghtughistesugigatanka nalighmeng igleghutistengusugigatanka yugnun. Nepiighngayaghqaagut, 13qayughllak Kiyaghneghem ulimayuggaaqaqaa Adam, taagken Eve. 14Adam‑ngunghituq puughtellengegkaq, iwernga aghnaaguq puughtellengegkaq enkaam seghleghqestengughtekaaquq. 15Iwernga aghnat ighniightuqumeng taghnughhaghneng yugulillengellequt nagneghumakuyeng neghyukluku Jesus, piniqimanginaqumeng ilameggneng, kiyaghsimanginaqumengllu agleghnaghluku kiyaghtaalleghmeng qusevegtellelighluteng.
Currently Selected:
1 Timothy 2: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
